CAB. I

1Paul ostyl Yeesey Creest liorish oardagh Yee nyn saualtagh, as y Chiarn Yeesey Creest, eh ta nyn dreishteil; 2Gys Timothy, my vac hene ayns y chredjue: Grayse, myghin, as shee veih Jee nyn Ayr, as Yeesey Creest nyn Jiarn. 3Myr ghuee mee ort dy uirriaght kinjagh ec Ephesus, tra hie mee gys Macedonia, dy voddagh oo raaue y choyrt da paart gyn dy ynsaghey sushtal erbee elley, 4Chamoo dy chur geill da raaghyn fardalagh, as coontey fegooish bun ny baare er sheelogheyn, ta doostey questionyn [streeuagh], ny smoo na ynsagh crauee, ta ayns credjue. 5Nish ta graih lhieeney yn anney, ayns cree glen, as cooinsheanse vie, as credjue firrinagh: 6Veih ta paart er n’gholl er-shaghryn, as er hyndaa gy-lhiattee gys argane fardalagh; 7Geearree dy ve fir-ynsee yn leigh, fegooish toiggal cre t’ad dy ghra, ny cre mychione t’ad loayrt. 8Agh ta fys ain dy vel y leigh mie, my ta dooinney jannoo ymmyd lowal jeh; 9Toiggal shoh, nagh vel y leigh jeant cour y dooinney ynrick, agh cour ny mee-reiltee as ny mee-viallee, cour ny mee-chrauee as peccee, cour deiney olk as neu-chasherick, cour nyn lheid ta coyrt nyn ayraghyn as moiraghyn dy baase, cour dunveryn, 10Cour maarderee, ny chour ocsyn ta cur rish peccah neu-ghooghyssagh, ny chour ocsyn ta geid deiney, cour breageryn, cour persoonyn oaiagh, as my ta red erbee elley ta noi ynsagh follan, 11Cordail rish sushtal gloyroil yn Jee bannit, va er ny choyrt gys my churrym. 12As ta mee cur booise da Creest Yeesey nyn Jiarn, t’er my niartaghey, son dy ghow eh mee dy ve firrinagh, pointeil mee gys oik y chirveish; 13Mish va roïe loayrt dy olkyssagh [noi Creest], as my hranlaasagh, as eulyssagh. Agh hooar mee myghin, er-yn-oyr dy ren mee eh dy neu-hushtagh, ayns mee-chredjue: 14As va grayse nyn Jiarn erskyn towse orrym, lesh credjue, as graih ta ayns Creest Yeesey. 15Ta shoh raa firrinagh, as feeu ard-soiagh ve jeant jeh, dy daink Yeesey Creest gys y theihll dy hauail peccee; jeu ta mish yn ard er. 16Ny-yeih, er-yn-oyr shoh hooar mee myghin, aynym’s dy voddagh Yeesey Creest hoshiaght soilshaghey magh dy chooilley hurranse-foddey, son sampleyr dauesyn yinnagh ny lurg shoh credjal aynsyn gys bea dy bragh farraghtyn. 17Nish gys y Ree dy bragh beayn, va er-dy-rieau, nagh vod ve er ny akin, gys yn ynrycan Jee creeney, dy row ooashley as gloyr, son dy bragh as dy bragh. Amen. 18Yn currym shoh ta mee dy hreishteil hood, vac Timothy, cordail rish y phadeyrys va jeant ro-laue my-dty-chione, dy vod oo liorish shen prowal oo hene dty hidoor mie, 19Freaylley credjue, as cooinsheanse vie: liorish scarrey roo shoh, ta paart dy bollagh er stroie nyn gredjue. 20Jeu shoh ta Hymeneus as Alexander; ad ta mee er livrey gys y drogh-spyrryd, dy vod ad gynsaghey dyn dy loayrt goan mollaghtagh.