CAB. II

1Ta mee coyrlaghey er-y-fa shen, hoshiaght ooilley, dy bee aghinyn, padjeryn, yeearreeyn, as toyrt-booise er ny yannoo son dy chooilley ghooinney: 2Son reeaghyn, as son ocsyn ooilley ta ayns ard-reill; dy vod mayd leeideil bea feagh as sheeoil ayns dy chooilley chraueeaght as ynrickys. 3Son ta shoh mie as booisal ayns shilley Yee nyn saualtagh: 4Eh saillish dy chooilley ghooinney dy ve er nyn sauail, as dy heet gys tushtey jeh’n irriney. 5Son ta un Jee ayn, as un er ta loayrt eddyr Jee as deiney, yn dooinney Creest Yeesey; 6Hug eh-hene ny lhiassaghey son ooilley, dy ve er ny hoilshaghey ayns traa cooie. 7Gys shoh va mee er my oardaghey ny phreachoor, as ostyl (ta mee loayrt yn irriney ayns Creest, as cha vel mee ginsh breg) fer-ynsee ny Ashoonee ayns credjue as firrinys. 8Saillym er-y-fa shen dy jean deiney padjer y ghoaill dy chooilley raad, troggal seose laueyn glen, fegooish corree as mee-hreishteil: 9Myrgeddin neesht dy jean mraane ad-hene y hoiaghey magh ayns coamrey fudagh, lesh ymmyrkey arrymagh, as sheeltys: cha nee lesh folt feeit, ny airh, ny pearlyn, ny coamrey costal; 10Agh (shen ta cheet jesh da mraane ta goaill-rish craueeaght) lesh obbraghyn mie. 11Lhig da’n ven gynsaghey dy feagh lesh slane biallys. 12Agh cha surr-ym ben dy ynsaghey, ny dy ghoaill urree hene pooar harrish y dooinney, agh dy ve ny host. 13Son va Adam hoshiaght er ny chroo, as eisht Aue. 14As cha nee Adam [va hoshiaght] mollit, agh y ven myr v’ee miolit va oolee. 15Foast, bee ee er ny hauail ayns gymmyrkey-lhiannoo, my nee ad tannaghtyn ayns credjue as graih, as craueeaght lesh sheeltys.