CAB. III

1Ta shoh raa firrinagh, my ta dooinney geearree oik aspick, t’eh geearree obbyr vie. 2Shegin da aspick eisht ve gyn loght, sheshey-poost un ven, tastagh, sheelt, jeh ymmyrkey-bea mie, aggindagh dy choyrt oltaghey-bea, aghtal dy ynsaghey; 3Cha nee iuder-feeyney, ny builltagh, ny sondagh er cosney scammyltagh, agh surransagh, cha nee fer streeuagh, ny sayntoilagh; 4Dooinney ta gymmyrkey reill mie ayns e hie hene, as e chloan fo smaght lesh slane sheeltys; 5(Son mannagh vel fys ec dooinney kys dy reill e hie hene, kys nee eh kiarail y ghoaill jeh agglish Yee?) 6Cha nee fer gerrit ’sy chredjue, er-aggle dy bee eh troggit seose lesh moyrn, as dy duitt eh fo briwnys y drogh-spyrryd. 7Shegin da myrgeddin goo mie ve echey vouesyn ta mooie; er-aggle dy duitt eh fo scammylt, as ribbey yn drogh-spyrryd. 8Myrgeddin shegin da ny shirveishee ve soccaragh, cha nee chengey lhiam as lhiat, nagh bee ad neu-heelt ayns feeyn, gyn ve sondagh er cosney scammyltagh, 9Freayll folliaght y chredjue ayns cooinsheanse ghlen. 10As lhig daue shoh myrgeddin ve hoshiaght er nyn browal; eisht lhig daue goaill orroo oik y chirveishagh, my t’ad dyn foill. 11Shegin da ny mraane oc myrgeddin ve dy ymmyrkey fudagh, cha nee scammyltee, agh sheelt, ynrick ayns dy chooilley nhee. 12Lhig da ny shirveishee ve sheshee-poost un ven, reill nyn gloan, as nyn lught-thie hene dy mie. 13Son t’adsyn t’er chooilleeney oik y chirveishagh dy firrinagh, er gheddyn daue hene raad mie [gys oik syrjey], as lane dunnallys ayns y chredjue, ta ayns Creest Yeesey. 14Ny reddyn shoh ta mee scrieu hood, jerkal dy heet hood dy gerrit: 15Agh my uirr-ym foddey, dy vod fys ve ayd kys lhisagh uss oo hene y ymmyrkey ayns thie Yee, ta agglish yn Jee bio, yn pillar as undin yn irriney. 16As son shickyrys, s’mooar ta’n folliaght dy chraueeaght: va Jee er ny hoilshaghey ’syn eill, er ny heyrey liorish y spyrryd, er ny akin liorish ainleyn, er ny phreacheil gys ny Ashoonee, er ny chredjal ayn ’sy theihll, er ny ghoaill seose ayns gloyr.