CAB. IV

1Nish ta’n Spyrryd ginsh dy plain, dy jean paart ayns ny laghyn s’jerree tuittym veih’n chredjue, coyrt geill da spyrrydyn molteyragh, as ynsagh drogh-spyrrydyn; 2Ginsh vreagyn ayns craueeaght-foalsey, yn chooinsheanse oc creoghit lesh yiarn jiarg; 3Lhiettal dy phoosey, as sarey dy reayll veih bee, ta Jee er chroo dy ve er ny ghoaill lesh toyrt-booise lioroosyn ta credjal as toiggal yn irriney. 4Son ta ooilley cretooryn Yee mie, as dyn nhee erbee dy ve mee-lowit, my te er ny ghoaill lesh toyrt-booise: 5Son te er ny chasherickey liorish goo Yee, as padjer. 6My nee oo ny braaraghyn y choyrt ayns cooinaghtyn jeh ny reddyn shoh, bee oo dty hirveishagh vie dy Yeesey Creest, troggit ayns goan y chredjue, as ynsagh mie, huggey t’ou er roshtyn. 7Agh raaghyn mee-chrauee shenn vraane cur dy lhiattee, as gow myr reih dy gholl er dty hoshiaght ayns craueeaght. 8Er son shirveish y challin cha vooar yn ymmyd t’ayn: agh ta craueeaght vondeishagh gys dy chooilley nhee, myr ta gialdyn echey jeh’n vea ta nish ayn, as jeh shen ta ry-heet. 9Ta shoh raa firrinagh as feeu ard-soiagh ve jeant jeh. 10Son er y choontey shen ta shin chammah laboragh, as surranse scammylt, er-yn-oyr dy vel shin treishteil ayns y Jee bio, ta ny Haualtagh da dy chooilley ghooinney, erskyn ooilley dauesyn ta credjal. 11Ny reddyn shoh jean y harey as cur roue. 12Ny lhig da dooinney erbee beg y hoiaghey jeh dty aegid, agh bee dty hampleyr dauesyn ta credjal, ayns goo, ayns ymmyrkey-bea, ayns graih, ayns spyrryd, ayns credjue, ayns glennid. 13Derrey hig-ym, bee kiaralagh dy lhaih, dy choyrlaghey, dy ynsaghey. 14Ny bee mee-rioosagh jeh’n ghioot t’aynyd, va er ny chur dhyt liorish phadeyrys, tra hie oo fo laueyn ny shirveishee casherick. 15Smooinee dy dowin er ny reddyn shoh, jean oo hene dy slane y vaarail orroo; dy vod y bishaghey ayd’s ayndoo ve er ny hoilshaghey da dy chooilley ghooinney. 16Cur tastey dhyt hene, as da dty ynsagh; jean tannaghtyn ayndoo: son ayns jannoo shoh, nee oo chammah oo hene y hauail, as adsyn ta dy dty chlashtyn.