CAB. VI

1Lhig da whilleen sharvaant as ta fo’n whing, nyn mainshteryn hene y choontey feeu jeh dy chooilley onnor: nagh bee scammylt er ny choyrt da ennym Yee, as e ynsagh. 2As adsyn ta mainshteryn Creestee oc, ny lhig daue soiaghey beg jeu, er-yn-oyr dy nee braaraghyn ad: agh lhig daue shirveish ad ny s’arryltee, son dy vel ad jeh’n [un] chredjue, as ayns graih [Yee], goaill ayrn cooidjagh jeh’n bannaght. Ny reddyn shoh ynsee as coyrlee. 3My ta dooinney erbee gynsaghey er aght elley, as nagh vel eh geiyrt da goan slayntoil, dy jarroo goan nyn Jiarn Yeesey Creest, as da’n ynsagh ta cordail rish craueeaght; 4T’eh moyrnagh, er beggan tushtey, agh branlaadee mysh questionyn as arganeyn streeuagh, voue ta cheet troo, anvea, oltooan, drogh-ouryssyn, 5Pleadeilyn camlaagagh deiney dy aignaghyn neu-ghlen, as follym jeh’n irriney, jeeaghyn er cosney dy ve craueeaght: veih nyn lheid jean oo hene y scarrey. 6Agh ta craueeaght lesh aigney booiagh cosney mooar. 7Son cha dug shin lhien nhee erbee stiagh ’sy theihll shoh, as te shickyr nagh vod mayd nhee erbee y choyrt lhien magh ass. 8As my ta beaghey as coamrey ain, lhig dooin ve booiagh lhieu. 9Agh t’adsyn ta soit er ve berchagh tuittym ayns miolagh, as ribbey, as ayns ymmodee sayntyn olk as ommijagh, ta baih deiney ayns toyrt-mow as coayl-anmey. 10Son saynt argid fraue dy chooilley olk: da’n chooid cheddin choud as va paart miandagh er, t’ad er n’gholl er-shaghryn veih’n chredjue, as er vroddey ad-hene trooid lesh mooarane torchaghyn. 11Agh uss, O ghooinney dy Yee, chea veih ny reddyn shoh: as eiyr da ynrickys, craueeaght, credjue, graih, surranse, meenid. 12Bee dty hidoor dunnal son y chredjue, gow greme er y vea veayn, gys shen t’ou myrgeddin er dty eam, as er n’ghoaill rish credjue mie kiongoyrt rish ymmodee feanishyn. 13Ta mee cur currym ort fenish Yee, ta bioghey dy chooilley nhee, as kiongoyrt rish Creest Yeesey, ren tra v’eh roish Pontius Pilate gymmyrkey feanish mie; 14Dy vreill oo yn sarey shoh slane, gyn foill, derrey cheet nyn Jiarn Yeesey Creest: 15Shen nee eshyn ayns traa cooie y hoilshaghey, ta’n ynrycan Ard-reiltagh bannit, yn Ree dy reeaghyn, as Chiarn dy hiarnyn; 16Echeysyn ny-lomarcan ta’n vea dy bragh farraghtyn, baghey ’sy toilshey nagh vod dooinney erbee roshtyn huggey, eh nagh vel dooinney erbee er vakin, ny cha vod fakin: huggeysyn dy row ooashley as pooar dy bragh farraghtyn. Amen. 17Cur currym orroosyn ta berchagh ’sy theihll shoh, nagh bee ad ard-aignagh, ny treishteil ayns berchys neu-hickyr, agh ayns y Jee bio, ta cur dooin dy palchey dy chooilley nhee dy ghoaill soylley jeu: 18Dy jean ad mie, dy bee ad berchagh ayns obbraghyn mie, aignagh dy rheynn, arryltagh dy choyrt da ny boghtyn; 19Coyrt seose ayns stoyr nyn gour oc hene undin mie ry-hoi yn traa ta ry-heet, dy vod ad greme y ghoaill er y vea veayn. 20O Timothy, freill shen ny ta er ny choyrt gys dty churrym, shaghney glare mee-chrauee as fardalagh, as streeu mychione yn ynsagh shen ta far-enmyssit creenaght: 21Liorish geiyrt da shoh, ta paart er n’gholl er-shaghryn veih’n chredjue. Grayse dy row mayrt. Amen.