CAB. I

1As va Solomon mac Ghavid er ny niartaghey ayns e reeriaght, as va’n Chiarn e Yee mârish, soiaghey seose eh dy ard ayns pooar as ooashley. 2Eisht loayr Solomon rish ooilley Israel, rish captanyn ny thousaneyn as ny keeadyn, as rish ny briwnyn, as rish dy chooilley chiannoort ayns Israel, ard-gheiney yn chenndeeaght. 3Myr shen hie Solomon as ooilley yn pobble mârish seose gys yn ard-ynnyd va ec Gibeon, son ayns shen va cabbane-agglish Yee, va Moses sharvaant y Chiarn er n’yannoo ’syn aasagh. 4Agh arg Yee va David er chur lesh eh seose veih Kirjath-jearim, gys y voayl va David er n’yannoo aarloo er e hon: son v’eh er hoiaghey seose cabbane er e hon ec Jerusalem. 5Myrgeddin, yn altar prashey va Bezaleel mac Uri, mac Hur, er n’yannoo, hug eh eh kiongoyrt rish cabbane-agglish y Chiarn: as ren Solomon as y pobble taaghey huggey. 6As hie Solomon seose gys shen gys yn altar prashey fenish y Chiarn, va ec y chabbane-agglish, as heb eh thousane oural-losht er.

7’Syn oie cheddin hoilshee Jee eh-hene da Solomon, as dooyrt eh rish, Jean geearree cre nee’m er dty hon. 8As dooyrt Solomon rish Jee, T’ou er hoilshaghey ard vyghin da David m’ayr, as er choyrt mish dy reill ’syn ynnyd echey. 9Nish, O Hiarn Yee, lhig da dty yialdinys da David m’ayr ve er ny chooilleeney: son t’ou er n’yannoo mish my ree harrish pobble, myr joan ny hooirey ayns earroo. 10Cur dou nish creenaght as tushtey, dy voddym goll magh as cheet stiagh roish y pobble shoh: son quoi oddys briwnys ad shoh dty phobble ta whilleen ayns earroo? 11As dooyrt Jee rish Solomon, Er-yn-oyr dy row shoh ayns dty chree, as nagh vel oo er yeearree berchys, cooid, ny onnor, ny bioys dty noidyn, chamoo t’ou er yeearree bea veayn; agh er hirrey creenaght as tushtey er dty hon hene, dy vod oo briwnys my phobble, harrystoo ta mee er n’yannoo uss dty ree. 12Ta creenaght as tushtey giallit dhyt, as ver-ym dhyt berchys, as cooid, as onnor, lheid as nagh row ec veg jeh ny reeaghyn va royd, chamoo vees y lheid ec veg hig dty yeï.

13Eisht haink Solomon gys Jerusalem veih e yurnah gys yn ard-ynnyd va ec Gibeon, raad va’n cabbane-agglish, as ren eh reill harrish Israel. 14As ren Solomon chaglym cooidjagh fainee as markee: as va echey thousane as kiare cheead fainagh, as daa housane jeig markiaght, ad shoh hoie eh ayns ny ard-valjyn fainee, as marish y ree ec Jerusalem. 15As hug y ree er argid as airh ec Jerusalem dy ve cha palchey as claghyn, as ny biljyn-cedar dy ve myr ny biljyn-sycamore ta ’sy choan. 16As va ec Solomon cabbil veih Egypt, as snaie lieen: ghow marchanyn y ree yn snaie ec lheid y phrice. 17As haink ad seose, as hug ad lhieu veih Egypt fainagh, son shey cheead shekel dy argid, as cabbyl son shiaght-feed as jeih: as myr shoh hug ad lhieu cabbil son ooilley reeaghyn ny Hittiteyn, as son reeaghyn Syria, liorish nyn ghellal.