CAB. X

1As hie Rehoboam gys Shechem: son gys Shechem va ooilley Israel er jeet dy yannoo eh ny ree. 2As haink eh gy-kione tra va Jeroboam mac Nebat er chlashtyn shoh (son v’eh ayns Egypt, raad v’eh er-chea veih fenish Solomon yn ree) dy hyndaa Jeroboam ass Egypt. 3As hug ad fys as deïe ad er: myr shen haink Jeroboam, as ooilley Israel, as loayr ad rish Rehoboam, gra, 4Ren dty ayraghyn yn whing ain trome orrin, nish er-y-fa shen jean uss red ennagh y lhaggaghey jeh bondiaght dewil dt’ayrey, as e whing hrome hug eh orrin, as nee mayd uss y hirveish. 5As dooyrt eh roo, Tar-jee hym reesht kione three laa. As hie’n pobble rhymboo.

6As ghow ree Rehoboam coyrle jeh ny shenn gheiney va fir-choyrlee Solomon e ayr, rish y lhing echey, gra, Cre’n choyrle ver shiu dou, dy voddym ansoor y choyrt da’n pobble shoh? 7As loayr ad rish, gra, My vees oo dooie da’n pobble shoh, as ad y wooiys, as glare vie y chur daue, bee ad dty harvaantyn son dy bragh. 8Agh cha ghow eshyn coyrle ny shenn gheiney, as ghow eh coyrle jeh ny deiney aegey, v’er ve troggit mârish, va shirveish kiongoyrt rish. 9As dooyrt eh roo, Cre’n choyrle ver shiu dou, dy voddym ansoor y choyrt da’n pobble shoh, t’er loayrt rhym, gra, Lhaggee yn whing hug dty ayr orrin? 10As loayr ny deiney aegey e choasanyn rish, gra, Myr shoh ver oo ansoor da’n pobble ren loayrt rhyt, gra, Ren dty ayr yn whing ain trome, agh jean uss eh red ennagh s’eddrym dooin; myr shoh jir uss roo, Bee’n vair-veg aym’s ny s’chee na slheeasid m’ayrey. 11Son ayns wheesh as dy dug m’ayr quing trome erriu, neem’s eh ny s’trimmey: ren m’ayr shiu y chustey lesh kippyn, agh neem’s shiu y chustey lesh scorpionee. 12Myr shen haink Jeroboam as ooilley yn pobble gys Rehoboam er y trass laa, myr va’n ree er n’oardaghey, gra, Tar-jee reesht hym kione y trass laa. 13As dansoor yn ree ad dy baggyrtagh: as hreig ree Rehoboam coyrle ny shenn gheiney, 14As dansoor eh ad lurg coyrle ny deiney aegey, gra, Ren m’ayr yn whing eu trome, agh neem’s eh ny s’trimmey: ren m’ayr shiu y chustey lesh kippyn, agh neem’s shiu y chustey lesh scorpionee. 15Myr shen cha dug y ree geill da’n pobble: son va’n chooish veih Jee, dy voddagh y Chiarn e ghoo y chooilleeney, loayr eh liorish Ahijah yn Shilonite rish Jeroboam mac Nebat.

16As tra honnick ooilley Israel nagh dug y ree geill daue, dansoor yn pobble y ree, gra, Cre’n ayrn t’ain ayns David? As cha vel eiraght erbee ain ayns mac Jesse: ersooyl-jee dy chooilley ghooinney gys nyn gabbaneyn, O Israel: as nish, Ghavid, jeeagh da dty hie hene. Myr shen hie ooilley Israel gys nyn gabbaneyn. 17Agh er son cloan Israel va cummal ayns ard-valjyn Yudah, ren Rehoboam reill harrystoo. 18Eisht hug ree Rehoboam huc Hadoram, va currym y cheesh er; as ren cloan Israel y chlaghey eh, dy dooar eh baase. Agh ren ree Rehoboam siyr dy hayrtyn seose ’sy ainagh, dy chosney roish gys Jerusalem. 19As dirree Israel magh noi thie Ghavid gys y traa t’ayn jiu.