CAB. XI

1As tra va Rehoboam er jeet gys Jerusalem, haggil eh jeh thie Yudah as Venjamin nuy-feed thousane reih deiney caggee, dy chaggey noi Israel, dy hyndaa yn reeriaght reesht gys Rehoboam. 2Agh haink goo’n Chiarn gys Shemaiah yn dooinney dy Yee, gra, 3Loayr rish Rehoboam mac Solomon ree Yudah, as rish ooilley Israel ayns Judah as Benjamin, gra, 4Myr shoh ta’n Chiarn dy ghra, Cha jed shiu seose, chamoo nee shiu caggey noi nyn mraaraghyn: chyndaa-jee dy chooilley ghooinney gys e hie, son ta’n red shoh jeant liorym’s: as v’ad biallagh da goan y Chiarn, as hyndaa ad reesht veih goll noi Jeroboam.

5As ren Rehoboam cummal ayns Jerusalem, as hrog eh ard-valjyn son fendeil ayns Judah. 6Hrog eh Beth-lehem, as Etam, as Tekoa, 7As Beth-zur, as Shoco, as Adullam, 8As Gath, as Mareshah, as Ziph, 9As Adoraim, as Lachish, as Azekah, 10As Zorah, as Aijalon, as Hebron; ta ayns Judah, as ayns Benjamin, ard-valjyn voallit. 11As ren eh ny ynnydyn lajer y yannoo ny s’troshey, as hug eh captanyn ayndoo, as stoyr beaghey, as ooil, as feeyn. 12As ayns dagh ard-valley hug eh eïllaghyn-caggee, as shleiyghyn, as ren eh ad erskyn-towse lajer, son va Judah as Benjamin fo e reill.

13As va ny saggyrtyn as ny Leviteyn ooilley er nyn jaglym cooidjagh huggey veih ooilley ardjyn Israel. 14(Son daag ny Leviteyn nyn gleebyn, as nyn gummallyn, as haink ad gys Judah as Jerusalem: son va Jeroboam as e vec er yiooldey ad veih oik y taggyrt y chooilleeney gys y Chiarn. 15As doardee eh da hene saggyrtyn son ny ard-ynnydyn, as son ny jouyil, as son ny jallooyn v’eh er n’yannoo). 16As mâroosyn haink gys Jerusalem ass ooilley tribeyn Israel, lheid as va nyn greeaghyn soit dy hirrey gys y Chiarn Jee Israel, dy hebbal oural gys Chiarn Jee nyn ayraghyn. 17Myr shoh ren ad reeriaght Yudah y niartaghey, as chum ad seose Rehoboam mac Solomon three bleeaney: son choud shen jimmee ad ayns raad Ghavid as Solomon.

18As ghow Rehoboam huggey Mahalath inneen Jerimoth mac Ghavid son ben, as Abihail inneen Eliab, mac Jesse: 19Ren gymmyrkey cloan da; Jeush, as Shamariah, as Zaham. 20As ny lurg ecksh, ghow eh Maachah inneen Absalom, ren gymmyrkey da Abijah, as Attai, as Ziza, as Shelomith. 21As bynney lesh Rehoboam Maachah inneen Absalom, erskyn ooilley e vraane as e cho-lhiabbee: (son ghow eh hoght mraane jeig, as three-feed co-lhiabbagh, as v’echey hoght mec as feed, as three-feed inneen). 22As ren Rehoboam Abijah mac Maachah yn ard-er-reill mastey e vraaraghyn: son v’eh kiarail dy yannoo eh ny ree. 23As ghell eh dy creeney ayns soiaghey yn chooid elley jeh e chloan harrish ny ard-valjyn fencit trooid ooilley cheeraghyn Yudah as Venjamin: as hug eh daue beaghey ooasle: as ghow eh da hene ymmodee mraane.