CAB. XII

1As haink eh gy-kione tra va Rehoboam er n’yannoo shickyr jeh’n reeriaght, as er niartaghey eh-hene, dy hreig eh leigh’n Chiarn, as ooilley Israel mârish. 2As haink eh gy-kione, ayns y wheiggoo vleïn jeh [reill] ree Rehoboam, dy daink Shishak ree Egypt seose noi Jerusalem (er-yn-oyr dy row ad er n’yannoo peccah noi’n Chiarn). 3Lesh daa cheead jeig fainagh, as three-feed thousane markiaght: as va’n pobble erskyn earroo haink mârish ass Egypt; ny Lubimee, ny Sukkiimee, as ny Ethiopianee. 4As ghow eh ny ard-valjyn voallit va lesh Judah, as haink eh noi Jerusalem.

5Eisht haink Shemaiah yn phadeyr gys Rehoboam, as gys princeyn Yudah, v’er nyn jaglym cooidjagh ec Jerusalem ayns aggle roish Shishak, as dooyrt eh roo, Myr shoh ta’n Chiarn dy ghra, Ta shiuish er n’aagail mish, as shen-y-fa ta mish myrgeddin er n’aagail shiuish ayns laue Shishak. 6Er shoh, ren princeyn Israel, as y ree ad-hene y injillaghey, as dooyrt ad, Ta’n Chiarn cairagh. 7As tra honnick yn Chiarn dy ren ad ad-hene y injillaghey, haink goo’n Chiarn gys Shemaiah, gra, T’ad er injillaghey ad-hene, shen-y-fa, cha jean-yms ad y stroie, agh ver-ym traa sodjey daue, as cha bee my chorree er ny gheayrtey magh er Jerusalem liorish laue Shishak. 8Ny-yeih, nee ad eshyn y hirveish, dy vod ad toiggal cre ta eddyr y chirveish aym’s, as shirveish reeriaghtyn ny cheeraghyn. 9Myr shoh haink Shishak ree Egypt seose noi Jerusalem, as ghow eh ersooyl tashtaghyn thie’n Chiarn, as tashtaghyn thie y ree, ghow eh ooilley: hug eh lesh ersooyl myrgeddin ny scapeyn airhey va Solomon er n’yannoo. 10’Syn ynnyd oc, ren ree Rehoboam scapeyn prashey, as livrey eh ad fo currym ard chaptanyn y ghard, va freayll arrey ec giat thie’n ree. 11As tra hie yn ree gys thie yn Chiarn, haink y gard dy ghoaill ad, as hug ad lhieu ad reesht gys shamyr y ghard. 12As son dy row eh er injillaghey eh-hene, va jymmoose y Chiarn er ny hyndaa veih, nagh ren eh stroie eh dy bollagh: as er-yn-oyr ayns Judah dy row reddyn foast goll er dy mie.

13Myr shoh ren ree Rehoboam eh-hene y niartaghey, as reill ayns Jerusalem: son va Rehoboam bleïn as da-eed dy eash, tra ghow eh toshiaght dy reill, as ren eh reill shiaght bleeaney jeig ayns Jerusalem, yn ard-valley va’n Chiarn er reih ass ooilley tribeyn Israel, dy choyrt e ennym ayn: as va ennym e voir Naamah yn Ammonitess. 14As ren eh olk, er-yn-oyr nagh hoie eh e chree dy hirrey yn Chiarn. 15Nish obbraghyn Rehoboam, toshiaght as jerrey, nagh vel ad ayns lioar ny kynneeyn scrieu Shemaiah yn phadeyr, as Iddo yn fakyder? As va caggey kinjagh eddyr Rehoboam as Jeroboam. 16As ren Rehoboam cadley marish e ayraghyn, as v’eh oanluckit ayns ard-valley Ghavid, as ren Abijah e vac reill ayns e ynnyd.