CAB. XIII

1Nish ayns y hoghtoo vleïn jeig jeh ree Jeroboam, ghow Abijah toshiaght dy reill harrish Judah. 2Ren eh reill three bleeaney ayns Jerusalem: (va ennym e voir myrgeddin Michaiah inneen Uriel jeh Gibeah) as va caggey eddyr Abijah as Jeroboam. 3As hoie Abijah e heshaght ayns order-caggee lesh armee dy gheiney dunnal, eer da-eed thousane dy reih deiney: hayrn Jeroboam seose myrgeddin e heshaght-chaggee n’oï, lesh kiare-feed thousane, reih deiney, va niartal ayns caggey.

4As hass Abijah er cronk Zemaraim ayns thalloo Ephraim, as dooyrt eh, Clasht rhym’s, uss Yeroboam, as ooilley Israel. 5Nagh lhisagh toiggal ’ve eu dy dug y Chiarn, Jee Israel, yn reeriaght harrish Israel da David son dy bragh, dy jarroo dasyn as da e vec liorish conaant saillit? 6Ny-yeih, ta Jeroboam mac Nebat, sharvaant Solomon mac Ghavid er ghoaill er dy irree-magh noi e hiarn. 7As t’eh er haglym huggey deiney eddrym cloan Velial, ta er niartaghey ad-hene noi Rehoboam mac Solomon, tra va Rehoboam aeg, as lhag-chreeagh, as nagh voddagh eh shassoo nyn ’oï. 8As nish, ta shiu kiarail dy hassoo magh noi reeriaght y Chiarn, ta cairys mec Ghavid; as ta shiu sheshaght vooar, as ta mêriu lheiyee airh ren Jeroboam diu son jeeghyn. 9Nagh vel shiu er hilgey magh saggyrtyn y Chiarn mec Aaron, as ny Leviteyn, as er n’yannoo diu hene saggyrtyn lurg cliaghtey ny ashoonyn jeh cheeraghyn elley? myr shen quoi-erbee ta chebbal eh-hene dy ve ny haggyrt lesh dow aeg as shiaght reaghyn, foddee eh ve ny haggyrt dauesyn nagh nee jeeghyn ad. 10Agh er ny son ainyn, she’n Chiarn y Jee ain, as cha vel shin er hreigeil eh; as ta ny saggyrtyn shirveishee’n Chiarn, mec Aaron, as ta ny Leviteyn cooilleeney nyn oik. 11As t’ad chebbal gys y Chiarn, dagh moghrey as fastyr, ourallyn-losht, as oural-millish: yn arran casherick myrgeddin t’ad soiaghey magh ayns order er y voayrd casherick, as y kainlere dy airh lesh e lampyn, dy lossey dy chooilley fastyr: son ta shinyn freayll currym y Chiarn nyn Yee; agh ta shiuish er hreigeil eh. 12As cur-my-ner, ta Jee hene mârin son nyn leeideilagh, as e haggyrtyn lesh trumpetyn feiyral, dy hroggal larm nyn ’oï eu: O chloan Israel, ny jean-jee caggey noi’n Chiarn Jee nyn ayraghyn, son cha jig eh lhieu.

13Agh hug Jeroboam er deiney dy lhie follit, dy heet mygeayrt er y chooyl oc: myr shen dy row Judah eddyr y daa heshaght, chammah rhymboo as nyn yeï. 14As tra yeeagh Judah nyn yeï, cur-my-ner, va’n caggey rhymboo as er nyn gooyl: as deïe ad gys y Chiarn, as ren ny saggyrtyn ny trumpetyn y helm. 15Eisht hug deiney Yudah yllagh ard assdoo: as myr va deiney Yudah gyllaghey, haink eh gy-kione, dy ren Jee Jeroboam y woalley as ooilley Israel, roish Abijah as Judah. 16As roie cloan Israel er-chea roish Judah: as ren Jee y livrey ad gys nyn laue. 17As ren Abijah as e phobble ad y stroie lesh cragh vooar: myr shen dy huitt sheese marroo jeh Israel jeih thousaneyn as da-eed, reih deiney. 18Myr shoh va cloan Israel er nyn goyrt fo-chosh ec y traa shen, as hooar cloan Yudah laue yn eaghtyr, er-y-fa dy dug ad nyn marrant er y Chiarn Jee nyn ayraghyn. 19As hie Abijah er-eiyrt’s Jeroboam, as ghow eh voish ard-valjyn, Beth-el as e baljyn, as Jeshanah as e baljyn, as Ephraim as e baljyn. 20Chamoo ren Jeroboam coural arragh ayns niart rish lhing Abijah: as woaill y Chiarn eh, as hooar eh baase.

21Agh daase Abijah niartal, as phoose eh kiare mraane jeig, as hooar eh daa vac as feed, as shey inneenyn jeig. 22As y chooid elley jeh obbraghyn Abijah, as e raaidyn, as e raaghyn, t’ad scruit ayns lioar y phadeyr Iddo.