CAB. XIV

1Myr shoh chaddil Abijah marish e ayraghyn, as doanluck ad eh ayns ard-valley Ghavid, as ren Asa e vac reill ayns e ynnyd: rish y lhing echeysyn va shee ec y cheer jeih bleeaney. 2As ren Asa shen ny va mie, as cairagh ayns shilley’n Chiarn e Yee. 3Son ghow eh ersooyl altaryn ny jeeghyn quaagh, as ny ard-ynnydyn, as vrish eh sheese ny jallooyn, as yiare eh sheese ny keylljyn oc. 4As hug eh currym er Judah dy eiyrt er y Chiarn Jee nyn ayraghyn, as dy reayll yn leigh, as ny annaghyn. 5Hug eh sheese, myrgeddin, ny ard-ynnydyn as ny jallooyn ayns ooilley ard-valjyn Yudah; as va’n reeriaght ayns shee fo e reill.

6As hrog eh ard-valjyn voallit ayns Judah: son va fea ’sy cheer, as cha row veg y chaggey rish ny bleeantyn shen, son dy row’n Chiarn er choyrt fea da. 7Shen-y-fa dooyrt eh rish Judah, Lhig dooin ny ard-valjyn shoh y hroggal, as jannoo voallaghyn mygeayrt-y-moo, as tooryn, giattyn, as boltyn, choud as ta’n cheer foast lhien hene: er-y-fa dy vel shin er n’eiyrt er y Chiarn nyn Yee, ta shin er n’eiyrt er, as t’eshyn er chur fea dooin er dy chooilley heu: myr shen ren ad troggal, as haink eh lhieu. 8As va ec Asa sheshaght-caggee dy gheiney va gymmyrkey targettyn, as shleiyghyn, ass Judah three cheead thousane, as veih Benjamin, daa cheead as kiare-feed thousane, ayns coamrey-caggee as tayrn bowaghyn: v’ad shoh ooilley deiney trean as niartal ayns caggey.

9As haink magh nyn ’oï Zerah yn Ethiopian, lesh sheshaght-caggee dy yeih cheead thousane, as three cheead fainagh, as haink ad gys Mareshah. 10Eisht hie Asa magh n’oï, as hayrn ad magh ayns order-caggee ayns coan Zephathah ec Mareshah. 11As deïe Asa gys y Chiarn e Yee, as dooyrt eh, Hiarn, te yn un chooid dhyt’s dy hauail, edyr y ve lesh mooarane, ny lesh beggan: cooin lhien, O Hiarn nyn Yee; son ort’s ta nyn marrant, as ayns dt’ennym ta shin goll noi’n earroo mooar shoh: O Hiarn, she uss nyn Yee, ny lhig da dooinney goaill niart ort. 12Myr shen woaill yn Chiarn ny Ethiopianee roish Asa, as Judah, as hug ny Ethiopianee cooyl roo. 13As deiyr Asa as e gheiney orroo gys Gerar; as va niart ny Ethiopianee er ny vrishey, nagh voddagh ad shassoo cooidjagh; son v’ad er nyn stroie roish y Chiarn, as roish e heshaght-chaggee, as hug ad lhieu ersooyl mooarane spooilley. 14As woaill ad ooilley ny ard-valjyn mygeayrt Gerar, son haink aggle atchimagh y Chiarn orroo: as spooill ad ooilley ny ard-valjyn, son va ymmodee spooilley ayndoo. 15Ghow ad myrgeddin cabbaneyn ny bochillyn, as hug ad lhieu ersooyl ymmodee kirree as camelyn, as hyndaa ad reesht gys Jerusalem.