CAB. XV

1As haink Spyrryd Yee er Azariah mac Obed. 2As hie eh magh quail Asa, as dooyrt eh rish, Clasht-jee rhym’s Asa, as ooilley Yudah as Venjamin, Ta’n Chiarn mêriu, choud as vees shiu mârishyn; as my nee shiu shirrey huggeysyn, bee eh er ny gheddyn lieriu; agh my hreigys shiu eshyn, nee eh shiuish y hreigeil. 3Nish son foddey dy hraa ta Israel er ve fegooish y Jee firrinagh, as fegooish saggyrt-ynsee, as fegooish y leigh. 4Agh ayns nyn seaghyn my nee ad chyndaa gys y Chiarn Jee Israel, as shirrey huggey, bee eh ry-gheddyn lioroo. 5As ayns ny traaghyn shoh, cha bee veg y shee ny chour-syn hed magh, ny eshyn hig stiagh, agh bee seaghyn trome er ooilley cummaltee ny cheeraghyn. 6As bee ashoon er ny stroie liorish ashoon, as ard-valley liorish ard-valley; son nee Jee ad y heaghney lesh dy chooilley arkys. 7Bee-jee dunnal er-y-fa shen, as ny bee-jee lhag-laueeagh: son bee nyn obbyr er ny chooilleeney. 8As tra cheayll Asa ny goan shoh, as phadeyrys Obed y phadeyr, ghow eh cree, as hug eh ersooyl ny jallooyn eajee ass ooilley cheer Yudah as Venjamin, as veih ny ard-valjyn v’eh er ghoaill veih cronk Ephraim, as ren eh altar y Chiarn y choamrey ass-y-noa, va roish porch y Chiarn. 9As ren eh ooilley Judah as Benjamin y haglym cooidjagh, as ny joarreeyn mâroo, ass Ephraim, as Manasseh, as veih Simeon: (son haink harrish huggey ass Israel ymmodee sleih, tra honnick ad dy row yn Chiarn e Yee mârish). 10Myr shen ren ad ad-hene y haglym cooidjagh ec Jerusalem ’sy trass vee, ayns y wheiggoo vleïn jeig jeh reill Asa. 11As heb ad gys y Chiarn ec y traa cheddin, jeh’n spooilley v’ad er choyrt lhieu, shiaght cheead dow, as shiaght thousane keyrrey. 12As chiangle ad ad-hene ayns conaant dy hirrey eddin y Chiarn Jee nyn ayraghyn, lesh ooilley nyn gree, as lesh ooilley nyn annym: 13Quoi-erbee nagh jinnagh yn Chiarn Jee Israel y hirveish, dy beagh eh shen er ny choyrt gy-baase, edyr beg ny mooar, edyr dooinney ny ben. 14As ren ad breearrey ’yannoo da’n Chiarn lesh ard choraa, as lesh yllagh, as lesh trumpetyn, as lesh cayrnyn. 15As ghow ooilley Judah boggey jeh’n breearrey: son v’ad er n’yannoo yn breearrey lesh slane cree, as er hirrey eh lesh ooilley nyn yeearree, as v’eh er ny gheddyn lioroo: as hug y Chiarn fea daue ooilley mygeayrt.

16As myrgeddin Maachah moir Asa yn ree, hug eh sheese ee nagh beagh ee ny ben-reïn, er-yn-oyr dy row ee er hoiaghey seose jalloo ayns keyll: as yiare Asa sheese y jalloo eck, as vrish eh eh dy peeshyn, as losht eh eh liorish y strooan Kidron. 17Agh cha row ny ard-ynnydyn er ny ghoaill ersooyl ass Israel: ny-yeih, va cree Asa ynrick ooilley e laghyn.

18As hug eh lesh stiagh gys thie Yee ny reddyn va e ayr er chasherickey, as ad shen v’eh hene er chasherickey, argid, as airh, as siyn. 19As cha row caggey ayn arragh derrey’n wheiggoo vleïn jeig as feed dy reill Asa.