CAB. XVI

1Ayns y cheyoo vleïn as feed jeh reill Asa haink Baasha ree Israel seose noi Judah, as hrog eh Ramah, nagh voddagh fer erbee dy sauchey goll magh, ny cheet stiagh gys Asa ree Yudah. 2Eisht hug Asa lesh magh argid as airh ass tashtaghyn thie’n Chiarn, as veih thie’n ree, as hug eh fys gys Ben-hadad ree Syria, va cummal ec Damascus, gra, 3Lhig da conaant ’ve eddyr mish as uss, myr va eddyr m’ayr’s as yn ayr ayd’s: cur-my-ner, ta mee er choyrt hood argid as airh; immee, brish dty chonaant rish Baasha ree Israel, dy vod eh chyndaa ersooyl voym. 4As ren Ben-hadad coardail rish ree Asa, as hug eh captanyn e heshaghtyn-caggee noi ard-valjyn Israel; as woaill ad Ijon, as Dan, as Abel-maim, as ooilley ard-valjyn lajer Naphtali. 5As haink eh gy-kione, tra cheayll Baasha jeh shoh, daag eh jeh veih niartaghey Ramah, as dy scuirr eh veih’n obbyr. 6Eisht ghow Asa yn ree ooilley Judah, as hug ad lhieu ersooyl ny claghyn, as y fuygh, lhieu va Baasha kiarail dy niartaghey Ramah, as hrog eh lhieu Geba as Mizpah.

7As ec y traa cheddin haink Hanani yn fakyder gys Asa ree Yudah, as dooyrt eh rish, Er-yn-oyr dy vel oo er choyrt dty varrant er ree Syria, as nagh dug oo dty varrant er y Chiarn dty Yee, shen-y-fa ta sheshaght-caggee ree Syria er scapail ass dty laue. 8Nagh row ny Ethiopianee as ny Lubimee, sheshaght-caggee mooar, lesh ymmodee fainee as markee? ny-yeih, er-y-fa dy dug oo dty varrant er y Chiarn, livrey eshyn ad gys dty laue. 9Son ta sooillyn y Chiarn roie noon as noal trooid y slane seihll, dy hoilshaghey eh-hene dy ve niartal er y cheu ocsyn ta lesh cree firrinagh treishteil ayn. Ayns shoh t’ou er n’yannoo dy ommijagh; shen-y-fa veih’n traa shoh magh bee oo seaghnit lesh caggey. 10Eisht va Asa jymmoosagh rish y phadeyr, as hug eh eh ayns pryssoon; son v’eh jiarg-chorree rish, son ny dooyrt eh. As ren Asa tranlaase er shiartanse jeh’n pobble ec y traa cheddin.

11As cur-my-ner, mychione obbraghyn Asa, toshiaght as jerrey, jeeagh, t’ad scruit ayns lioar reeaghyn Yudah as Israel. 12As ayns y nuyoo vleïn jeig as feed jeh e reill, va Asa dourinagh ’sy chassyn, derrey va e ghoghan erskyn-towse dewil: ny-yeih ayns e ghoghan cha jagh eh gys y Chiarn (son cooney) agh gys ny fir-lhee.

13As chaddil Asa marish e ayraghyn, as hooar eh baase ayns yn un vleïn as da-eed jeh e reill. 14As doanluck ad eh ’syn oaie, v’eh er n’yannoo da hene ayns ard-valley Ghavid, as hug ad eh ayns y lhiabbee, v’er ny lhieeney lesh soaryn miljey, as ymmodee sorch dy spiceyn jeant seose liorish schleï yn phothecary: as ren ad aile oanluckee mooar y yannoo er e hon.