CAB. XVII

1As ren Jehoshaphat e vac reill ayns e ynnyd, as ren eh eh-hene y niartaghey noi Israel. 2As hoie eh sheshaghtyn-caggee ayns ooilley ard-valjyn voallit Yudah, as hrog eh garrisonyn ayns cheer Yudah, as ayns ard-valjyn Ephraim, va Asa e ayr er ghoaill. 3As va’n Chiarn marish Jehoshaphat, er-y-fa dy jimmee eh ayns ny shenn raaidyn e ayr David, as cha deiyr eh er Baalim; 4Agh deiyr eh er y Chiarn Jee e ayraghyn, as jimmee eh ayns e annaghyn, as cha nee lurg obbraghyn Israel: 5Shen-y-fa ren y Chiarn yn reeriaght y niartaghey ayns e laue, as hug ooilley Judah lhieu gys Jehoshaphat giootyn, dy ren eh bishaghey dy mooar ayns berchys as ooashley. 6As myr va e chree soit dy jeean er raaidyn y Chiarn, ghow eh ersooyl ny ard-ynnydyn, as keylljyn ny jallooyn ass Judah.

7Myrgeddin ’sy trass vleïn jeh e reill, hug eh magh jeh e phrinceyn, eer Ben-hail, as Obadiah, as Zechariah, as Nethaneel, as Micaiah, dy ynsaghey ayns ard-valjyn Yudah. 8As mâroosyn hug eh magh Leviteyn, eer Shemaiah, as Nethaniah, as Zebadiah, as Asahel, as Shemiramoth, as Jehonathan, as Adonijah, as Tobijah, as Tob-adonijah, Leviteyn; as mâroosyn Elishama, as Jehoram, saggyrtyn. 9As dynsee ad ayns Judah, as va lioar leigh yn Chiarn oc mâroo, as hie ad mygeayrt trooid ooilley ard-valjyn Yudah, as dynsee ad y pobble.

10As va atchim y Chiarn er ooilley reeriaghtyn ny cheeraghyn mygeayrt Judah, myr shen nagh ren ad caggey rish Jehoshaphat. 11Myrgeddin hug paart jeh ny Philistinee lhieu giootyn gys Jehoshaphat, as argid keesh; as hug ny Arabianee lhieu huggey shioltaneyn, shiaght thousane as shiaght cheead rea, as shiaght thousane as shiaght cheead goayr-fyrryn.

12As daase Jehoshaphat erskyn-towse pooaral: as hrog eh ayns Judah, cashtallyn, as ard-valjyn stoyr-caggee. 13As va niart obbyr echey goll er y hoshiaght ayns ard-valjyn Yudah: as va ny ard-gheiney, ny reih deiney caggee, ec Jerusalem. 14As shoh yn earroo oc lurg thie nyn ayraghyn: veih Judah ny captanyn-thousane: Adnah yn ard-er, as mârishyn three cheead thousane, deiney niartal caggee. 15As y nah er Johanan y captan, as fosyn va daa cheead as kiare-feed thousane. 16As by-niessey dasyn Amasiah mac Zichri, ren dy arryltagh chebbal eh-hene da’n Chiarn; as mârishyn daa cheead thousane dooinney niartal as dunnal. 17As veih Benjamin; Eliada dooinney niartal caggee, as fosyn deiney eïllit lesh bow as scape, daa cheead thousane. 18As ny lurg-syn Jehozabad, as fosyn nuy-feed thousane arryltagh gys caggey. 19Ad shoh va gard kinjagh y ree cheu-mooie jeusyn va’n ree er hoiaghey ayns ny ard-valjyn fencit, trooid magh ooilley Judah.