CAB. XVIII

1Nish va Jehoshaphat er vishaghey dy mooar ayns berchys as onnor, as ren eh cleunys rish Ahab. 2As lurg shiartanse dy vleeantyn hie eh sheese dy yeeaghyn Ahab gys Samaria; as ren Ahab cuirraghyn mooar lesh ymmodee kirree as dew er e hon, as son y cheshaght va mârish, as chleaynee eh eh dy gholl seose mârish noi Ramoth-gilead. 3As dooyrt Ahab ree Israel rish Jehoshaphat ree Yudah, Jed uss mârym noi Ramoth-gilead? As dreggyr eh, Ta mish myr t’ou uss, as my phobble myr dty phobble’s, as bee mayd mayrt ayns y chaggey.

4As dooyrt Jehoshaphat rish ree Israel, Jean briaght, ta mee guee ort, ec goo’n Chiarn jiu. 5Shen-y-fa ren ree Israel sumney cooidjagh jeh ny phadeyryn kiare cheead dooinney, as dooyrt eh roo, Jem mayd dy chaggey noi Ramoth-gilead, ny lhig-ym shaghey? As dooyrt ad, Immee seose, son nee yn Chiarn y livrey eh gys laue yn ree. 6Agh dooyrt Jehoshaphat, Nagh vel ayns shoh phadeyr erbee elley lesh y Chiarn, dy vod mayd briaght jehsyn? 7As dooyrt ree Israel rish Jehoshaphat, Ta ayn foast un dooinney liorishyn foddee mayd briaght jeh’n Chiarn: agh ta dwoaie aym er, son cha vel eh shen dy bragh jannoo phadeyrys mie my-mychione’s, agh dy kinjagh drogh phadeyrys: ta’n er cheddin Micaiah mac Imla. As dooyrt Jehoshaphat, Ny lhig da’n ree gra shen. 8As deïe ree Israel er offishear huggey, as dooyrt eh, Lhiat ayns shoh dy tappee Micaiah mac Imla. 9As hoie ree Israel as Jehoshaphat ree Yudah, dagh unnane er e stoyl-reeoil, ayns nyn goamraghyn reeoil, as v’ad nyn soie ’sy chooyrt foshlit ec giat Samaria, as ren ooilley ny phadeyryn phadeyrys y yannoo kiongoyrt roo. 10As ren Zedekiah mac Chenaanah eairkyn yiarn, as dooyrt eh, Myr shoh ta’n Chiarn dy ghra, Lhieu shoh nee oo Syria y woalley, derrey vees ad er nyn stroie. 11As ren ooilley ny phadeyryn phadeyrys er yn aght cheddin, gra, Gow seose noi Ramoth-gilead, as aïgh mie lhiat: son nee’n Chiarn y livrey eh gys laue y ree. 12As loayr y chaghter hie dy eamagh er Micaiah rish, gra, Cur-my-ner, ta goan ny phadeyryn fockley mie da’n ree lesh un veeal: lhig dty ghoan’s er-y-fa shen, ta mee guee ort, ve cordail rish goan fer jeusyn, as loayr uss shen ny ta mie. 13As dooyrt Micaiah, Myr ta’n Chiarn bio, dy jarroo cre-erbee jir my Yee rhym, shen nee’m loayrt. 14As tra v’eh er jeet gys y ree, dooyrt y ree rish, Vicaiah, jem mayd seose noi Ramoth-gilead dy chaggey, ny lhig-ym shaghey? As dooyrt eh, Gow-jee seose, as y varriaght lhiat, as bee ad er nyn livrey gys nyn laue. 15As dooyrt y ree rish, Caïd shegin dou uss y harey nagh n’insh oo dou nhee erbee agh yn irriney, ayns ennym y Chiarn? 16Eisht dooyrt eh, Honnick mee ooilley Israel er nyn skeayley er ny sleityn, myr kirree fegooish bochilley: as dooyrt y Chiarn, Cha vel mainshtyr oc shoh; lhig da dy chooilley ghooinney jeu chyndaa gys e hie ayns shee. 17(As dooyrt ree Israel rish Jehoshaphat, Nagh dinsh mee dhyt, nagh jinnagh eh shoh mie y phadeyrys my-mychione’s, agh olk?) 18Reesht dooyrt eh, Eaisht uss, er-y-fa shen, rish goo’n Chiarn, Honnick mee yn Chiarn ny hoie er e stoyl-reeoil, as ooilley sheshaght-flaunyss nyn shassoo er e laue yesh, as er e laue chiare. 19As dooyrt y Chiarn, Quoi nee Ahab ree Israel y chleayney, dy gholl seose, as dy huittym ec Ramoth-gilead, as loayr fer, er yn aght shoh, as fer er aght elley. 20Eisht haink spyrryd magh, as hass eh kiongoyrt rish y Chiarn, as dooyrt eh, Cleaynee-yms eh. As dooyrt y Chiarn rish, Cre lesh? 21As dooyrt eh, Hem’s magh, as bee’m my spyrryd breagagh ayns beeal ooilley e adeyryn. As dooyrt y Chiarn, Cleaynee oo eh, as hig eh lhiat myrgeddin: Immee, as jean myr shen 22Nish, er-y-fa shen, cur-my-ner, ta’n Chiarn er choyrt spyrryd breagagh ayns beeal ooilley ad shoh dty adeyryn, as ta’n Chiarn er loayrt olk dt’oï. 23Eisht haink Zedekiah mac Chenaanah er-gerrey, as woaill eh Micaiah er e lieckan, as dooyrt eh, Cre’n raad ghow Spyrryd y Chiarn voym’s, dy loayrt rhyt’s? 24As dooyrt Micaiah, Cur-my-ner, hee oo er y laa shen, tra hed oo stiagh gys y chiamyr sodjey sthie dy ollaghey oo-hene. 25Eisht dooyrt ree Israel, Gow-jee Micaiah, as cur-jee lhieu eh mêriu gys Amon kiannoort yn ard-valley, as gys Joash mac y ree. 26As abbyr-jee, Myr shoh ta’n ree dy ghra, Cur-jee yn fer shoh ayns pryssoon, as jean-jee y veaghey eh lesh yn arran dy heaghyn, as lesh yn ushtey dy heaghyn, derrey hyndaa-yms reesht ayns shee. 27As dooyrt Micaiah, My hig uss dy bragh back ayns shee, eisht cha vel y Chiarn er loayrt liorym’s. As dooyrt eh, Eaisht-jee, O phobble, dy chooilley unnane eu. 28Myr shen hie ree Israel, as Jehoshaphat ree Yudah seose noi Ramoth-gilead. 29As dooyrt ree Israel rish Jehoshaphat, Ver-yms mee hene ayns cummey elley, as hem gys y chaggey, agh cur uss ort dty choamraghyn reeoil. Myr shen hug ree Israel coamrey elley er hene, as hie ad gys y chaggey. 30Nish va ree Syria er harey captanyn ny fainee va mârish, gra, Ny jean-jee caggey rish beg ny mooar, agh ynrycan rish ree Israel. 31As haink eh gy-kione, tra honnick captanyn ny fainee Jehoshaphat, dy dooyrt ad, She ree Israel t’ayn: shen-y-fa chruinnee ad mysh dy chaggey: agh deïe Jehoshaphat magh, as ren y Chiarn cooney lesh, as hug Jee ayns nyn gree dy hyndaa veih. 32Son haink eh gy-kione, tra ghow captanyn ny fainee tastey nagh nee ree Israel v’ayn, dy hyndaa ad back veih chionney er. 33As hayrn dooinney dy row bow er ventyr, as woaill eh ree Israel eddyr juntyn e chooat-caggee: shen-y-fa dooyrt eh rish immanagh e ainagh, Chyndaa dty laue, dy vod oo mee y choyrt lhiat magh ass y cheshaght-chaggee, son ta mee guint. 34As va’n caggey feer chion er y laa shen: ny-yeih ren ree Israel cummal rish ayns e ainagh noi ny Syrianee, derrey’n astyr: as mysh lhie ny greiney hooar eh baase.