CAB. XIX

1As hyndaa Jehoshaphat ree Yudah reesht gys e hie ayns shee, gys Jerusalem. 2As hie Jehu mac Hanani yn fakyder magh ny whail, as dooyrt eh rish ree Jehoshaphat, Cre v’ayd’s dy yannoo ayns cooney lesh ny mee-chrauee, as dy hassoo lhieusyn ta dwoaie oc er y Chiarn? shen-y-fa ta’n Chiarn neu-wooiagh jeed. 3Ny-yeih, t’ou er n’yannoo reddyn ennagh dy mie, ayns dy vel oo er ghoaill ersooyl ny jallooyn ass y cheer, as er hoiaghey dty chree, dy eiyrt er Jee. 4As ren Jehoshaphat cummal ec Jerusalem: as hie eh magh reesht trooid y pobble, veih Beer-sheba gys cronk Ephraim, as hug eh lesh ad back reesht gys y Chiarn Jee nyn ayraghyn.

5As phoint eh briwnyn ’sy cheer, trooid ooilley ard-valjyn voallit Yudah, ayns dagh ard-valley. 6As dooyrt eh rish ny briwnyn, Gow-jee tastey cre ta shiu jannoo: er-yn-oyr nagh vel shiu briwnys son dooinney, agh son y Chiarn, ta mêriu ayns briwnys. 7Shen-y-fa nish, lhig da aggle y Chiarn ve erriu, bee-jee er nyn dwoaie, as jean-jee nyn gurrym: son cha vel mee-chairys erbee marish y Chiarn nyn Yee, chamoo t’eh soiaghey jeh persoonyn, ny goaill giootyn. 8Myrgeddin, ayns Jerusalem, ren Jehoshaphat pointeil jeh ny Leviteyn, as jeh ny saggyrtyn, as jeh ard-gheiney ayraghyn Israel, son briwnys y Chiarn, as son streeuaghyn y reaghey, tra hyndaa ad reesht gys Jerusalem. 9As hug eh currym orroo, gra, Myr shoh nee shiu y yannoo ayns aggle y Chiarn, dy firrinagh, as lesh cree ynrick. 10As cre-erbee’n chooish hig reue eddyr nyn mraaraghyn ta cummal ayns nyn ard-valjyn, eddyr fuill as fuill, eddyr leigh as oardagh, slattyssyn as briwnyssyn, ver shiu dy jarroo sarey daue nagh brish ad leigh’n Chiarn, as nagh jig kerraghey erriu hene, as er nyn mraaraghyn: jean-jee shoh, as cha bee shiu kyndagh, 11As cur-my-ner, ta Amariah yn ard-saggyrt harrishdiu ayns ooilley cooishyn y Chiarn; as Zebadiah mac Ishmael, fer-reill thie Yudah, son ooilley cooishyn y ree: bee ny Leviteyn mêriu myrgeddin dy chooney lhieu. Dell-jee dy dunnal, as bee’n Chiarn er cheu’n chairys.