CAB. XX

1As haink eh gy-kione, lurg shoh myrgeddin, dy daink cloan Voab, as cloan Ammon, as sheshaght elley marish ny Ammoniteyn, noi Jehoshaphat dy chaggey. 2Eisht ve er ny insh da Jehoshaphat, gra, Ta sheshaght vooar cheet dt’oï veih cheu elley jeh’n aarkey, cheu shoh dy Syria, as cur-my-ner, t’ad ayns Hazazon-tamar, ta shen En-gedi. 3As va aggle er Jehoshaphat, as chiare eh dy hirrey yn Chiarn, as doardee eh trostey dy ve er ny reayll trooid ooilley Judah. 4As va Judah er nyn jaglym cooidjagh, dy hirrey cooney veih’n Chiarn: eer ass ooilley ard-valjyn Yudah haink ad dy hirrey gys y Chiarn.

5As hass Jehoshaphat seose ayns chaglym-cooidjagh Yudah as Yerusalem, ayns thie’n Chiarn roish y chooyrt noa, 6As dooyrt eh, O Hiarn Yee nyn ayraghyn, nagh nee uss yn Jee t’ayns niau? as nagh nee uss ta reill harrish ooilley reeriaghtyn ny ashoonee? as ayns dty laue’s nagh vel pooar as niart, myr shen nagh vod unnane erbee shassoo dt’oï? 7Nagh nee uss y Jee ainyn, deiyr magh cummaltee yn cheer shoh roish dty phobble Israel, as hug oo eh da sluight Abraham dty charrey, son dy bragh? 8As t’ad er chummal ayn, as er hroggal dhyt’s ynnyd casherick son dt’ennym’s, gra, 9Tra hig olk erbee orrin, myr y cliwe, briwnys, y chramp, ny genney, my nee mayd shassoo roish y thie shoh, as ayns dt’enish, (son ta dt’ennym ’sy thie shoh) as geamagh hood’s ayns nyn seaghyn, eisht nee oo clashtyn as ver oo cooney. 10As nish, cur-my-ner, er son cloan Ammon, as Moab, as cronk Seir, orroo cha lhiggagh oo da Israel eïe y choyrt, tra haink ad ass cheer Egypt, agh hyndaa ad voue, fegooish ad y stroie; 11Jeeagh, Ta mee gra, kys t’ad dy chooilleeney shin, dy heet dy hilgey magh shin ass dty chummal, t’ou er choyrt dooin son eiraght. 12O nyn Yee, nagh jean oo ad y vriwnys? son s’beg ta’n niart ainyn noi’n cheshaght vooar shoh ta cheet orrin: chamoo ta fys ain cre nee mayd, agh ort’s ta nyn sooillyn. 13As hass ooilley Judah kiongoyrt rish y Chiarn, marish nyn vooinjer veggey, nyn mraane, as nyn gloan.

14Eisht haink Spyrryd y Chiarn ayns mean y cheshaght er Jahaziel mac Zechariah, mac Benaiah, mac Jehiel, mac Mattaniah, ny Levite jeh mec Asaph: 15As dooyrt eh, Clasht-jee, ooilley Yudah, as shiuish chummaltee Yerusalem, as uss ree Yehoshaphat, Myr shoh ta’n Chiarn dy ghra riu, Ny bee-jee fo aggle ny atchim erbee, kyndagh rish y cheshaght vooar shoh; son cha nee lhieuish ta’n caggey, agh lesh Jee. 16Mairagh gow-jee sheese nyn ’oï: cur-my-ner, t’ad cheet seose raad liargagh Ziz, as hee shiu ad ec kione y choan, liorish faasagh Jeruel. 17Cha bee feme eu builley ’choyrt ’sy chaggey shoh; jean-jee farkiagh, shass-jee raad ta shiu, as cur-jee my-ner saualtys y Chiarn mêriu, O Yudah as Yerusalem, ny bee aggle ny atchim erriu: mairagh gow-jee magh nyn ’oï, son bee’n Chiarn mêriu. 18As chroym Jehoshaphat e chione, lesh e eddin gys y thalloo: as huitt ooilley Judah as cummaltee Yerusalem sheese roish y Chiarn, cur ooashley da’n Chiarn. 19As ren ny Leviteyn, jeh cloan ny Kohathiteyn, as jeh cloan ny Korhiteyn, shassoo seose dy chur moylley da’n Chiarn, Jee Israel, lesh ard choraa, er yn yrjid.

20As hie ad magh dy moghey gys faasagh Tekoa: as myr v’ad goll magh, hass Jehoshaphat, as dooyrt eh, Clasht-jee rhym’s, O Yudah, as shiuish chummaltee Yerusalem, cred-jee ayns y Chiarn nyn Yee, myr shen bee shiu er nyn niartaghey; cred-jee e adeyryn, myr shen nee shiu bishaghey. 21As tra v’eh er ghoaill coyrle y pobble, phoint eh arrane dy choyrt ard-voylley da’n Chiarn ayns aalid e chasherickys, myr v’ad goll magh roish y cheshaght-chaggee, as dy ghra, Moylley-jee’n Chiarn, son ta e vyghin farraghtyn son dy bragh.

22As cha leah’s hie ad lesh ny arraneyn-moyllee, hug y Chiarn er cummaltee Seir, va nyn lhie cooyl-chlea noi Judah, dy huittym ayns marranys, er cloan Ammon as Moab, as v’ad er nyn mwoalley. 23Agh hyndaa cloan Ammon as Moab reesht noi cummaltee cronk Seir, dy stroie ad dy bollagh: as tra v’ad er yiarey jeh cloan Seir, stroie ad-hene yn derrey yeh yn jeh elley. 24As tra va Judah er roshtyn gys toor yn arrey, lesh yn aasagh, yeeagh ad magh son y cheshaght vooar shoh, as cur-my-ner, honnick ad dy row’n thalloo coodit lesh ny kirp marroo oc, as cha ren fer jeu scapail. 25As tra haink Jehoshaphat as e phobble dy hroggal y spooilley, hooar ad palchey mooar berchys, as jewellyn costal er ny merriu (ren ad y roostey daue hene) ny smoo na oddagh ad coyrt lhieu; as va’n spooilley wheesh, dy row ad three laa dy haglym eh.

26As er y chiarroo laa haink ad cooidjagh ayns coan Berachah; son ayns shen vannee ad y Chiarn: shen-y-fa va’n boayl cheddin enmyssit coan Berachah, gys y traa t’ayn. 27Eisht hyndaa ooilley deiney Yudah as Yerusalem, as Jehoshaphat ec y chione oc, dy gholl reesht gys Jerusalem lesh boggey: son va’n Chiarn er choyrt daue boggey harrish nyn noidyn. 28As haink ad gys Jerusalem lesh psaltereeyn, as claasaghyn, as trumpetyn, gys thie’n Chiarn. 29As va aggle Yee er ooilley reeriaghtyn ny cheeraghyn shoh, tra cheayll ad dy row’n Chiarn er chaggey noi noidyn Israel. 30Myr shoh va reeriaght Jehoshaphat ayns shee: son va e Yee er chur fea da er dy chooilley heu.

31As ren Jehoshaphat reill harrish Judah: v’eh queig bleeaney jeig as feed dy eash, tra ren eh toshiaght dy reill; as ren eh reill queig bleeaney as feed ayns Jerusalem: as va ennym e voir Azubah inneen Shilhi. 32As ren eh gimmeeaght ayns raad Asa e ayr, as cha hyndaa eh dy lhiattee, jannoo shen ny va cairagh ayns shilley’n Chiarn. 33Ny-yeih, cha row ny ard-ynnydyn dy bollagh er ny ghoaill ersooyl; son cha row’n pobble foast dy slane er hoiaghey nyn greeaghyn er Jee nyn ayraghyn. 34Nish y chooid elley dy obbraghyn Jehoshaphat, toshiaght as jerrey, cur-my-ner, t’ad scruit ayns lioar Jehu mac Hanani, ta enmyssit ayns lioar reeaghyn Israel.

35As lurg shoh ren Jehoshaphat ree Yudah conaant rish Ahaziah ree Israel, dooinney feer vee-chrauee. 36As hie eh ayrn rish ayns jannoo lhongyn dy gholl gys Tarshish: as hrog ad ny lhongyn ayns Ezion-geber. 37Eisht ren Eliezer, mac Dodavah jeh Mareshah, phadeyrys noi Jehoshaphat, gra, Er-yn-oyr dy vel oo er n’yannoo conaant rish Ahaziah, ta’n Chiarn cur naardey dt’obbraghyn. As va ny lhongyn brisht, nagh row ad son goll gys Tarshish.