CAB. XXIII

1As ayns y chiaghtoo vleïn ren Jehoiada eh-hene y niartaghey, as ghow eh ny captanyn-keead, Azariah mac Jeroham, as Ishmael mac Jehohanan, as Azariah mac Obed, as Maaseiah mac Adaiah, as Elishaphat mac Zichri, stiagh ayns conaant rish. 2As hie ad mygeayrt ayns Judah, as haggil ad ny Leviteyn ass ooilley ard-valjyn Yudah, as ard ayraghyn Israel, as haink ad gys Jerusalem. 3As ren ooilley’n pobble conaant y yannoo rish y ree ayns thie Yee; as dooyrt eh roo, Cur-my-ner, mac y ree nee reill, myr ta’n Chiarn er ghra mychione mec Ghavid. 4Shoh myr nee shiu; bee yn trass ayrn jeu, tra hed shiu stiagh er doonaght ny saggyrtyn as ny Leviteyn, son gard er ny dorryssyn, 5As bee trass ayrn ec thie yn ree, as trass ayrn ec giat yn undin: as y chooid elley jeh’n pobble ayns cooyrtyn thie’n Chiarn. 6Agh ny lhig da unnane erbee cheet stiagh ayns thie’n Chiarn er-lhimmey jeh ny saggyrtyn, as ny Leviteyn ny shirveishee, hed adsyn stiagh, son t’ad casherick: agh nee ooilley’n pobble freaylley arrey mysh thie’n Chiarn. 7As nee ny Leviteyn shassoo mygeayrt-y-mysh y ree, dagh dooinney lesh e ghreïnyn-caggee ny laue, as quoi-erbee elley hig stiagh ’sy thie, bee eh er ny choyrt gy-baase: as bee-jee shiuish marish y ree tra t’eh cheet stiagh, as tra t’eh goll magh. 8Myr shoh ren ny Leviteyn as ooilley Judah cordail rish dy chooilley nhee va Jehoiada yn saggyrt er harey, as ghow dagh dooinney e gheiney va dy heet stiagh er y doonaght, mâroosyn va dy gholl magh er y doonaght: son cha row Jehoiada yn saggyrt er chaghlaa nyn goorseyn. 9Ny-sodjey, ren Jehoiada yn saggyrt livrey da ny captanyn-keead, shleiyghyn as cooatyn-eilley, as scapeyn, v’er ve lesh ree David, va ayns thie Yee. 10As hoie eh ooilley yn pobble cruin mygeayrt y ree (dagh dooinney as e ghreïe-chaggey ny laue) veih cheu yesh y chiamble, gys cheu chiare y chiamble, rish yn altar as y chiamble. 11Eisht hug ad lhieu magh mac y ree, as hug ad er yn crown, as hug ad da yn recortys, as ren ad eh ny ree: as ren Jehoiada as e vec eh y ooilaghey, as dooyrt ad, Dy bannee Jee yn ree.

12Nish tra cheayll Athaliah feiyr y sleih, roie as bannaghey yn ree, haink ee stiagh mastey’n pobble ayns thie’n Chiarn. 13As yeeagh ee, as cur-my-ner, va’n ree ny hassoo liorish e phillar, ec y yiat, as ny princeyn as ny trumpeteryn mygeayrt y ree, as ooilley pobble y cheer ayns ard-voggey, as sheidey lesh trumpetyn, as ny fir-chiaullee myrgeddin lesh greïnyn bingys; as ny mainshteryn-kiaullee. Eisht raip Athaliah e coamraghyn, as dooyrt ee, Traitoorys, traitoorys. 14Eisht hug Jehoiada yn saggyrt lesh magh ny captanyn-keead, v’eh er hoiaghey harrish y cheshaght-chaggee, as dooyrt eh roo, Magh lh’ee ass ny rankyn: as quoi-erbee eiyrys urree, lhig da ve er ny varroo lesh y chliwe. Son dooyrt yn saggyrt, Ny marr-jee ee ayns thie’n Chiarn. 15Myr shen ghow ad ee; as tra v’ee er jeet gys giat ny gabbyl, liorish thie’n ree, varr ad ee ayns shen.

16As ren Jehoiada conaant eddyr eh-hene as ooilley’n pobble, as eddyr y ree, dy beagh ad pobble y Chiarn. 17Eisht hie ooilley’n pobble gys thie Vaal, as lhieg ad sheese eh, as vrish ad e altaryn, as e yallooyn dy peeshyn, as varr ad Mattan saggyrt Vaal kiongoyrt rish, ny altaryn. 18Myrgeddin ren Jehoiada pointeil shirveish thie’n Chiarn liorish ny saggyrtyn ny Leviteyn, va David er hoiaghey ayns thie’n Chiarn, dy hebbal ourallyn-losht y Chiarn, myr te scruit ayns leigh Voses, lesh boggey as lesh arraneyn, myr va David er n’oardaghey. 19As hoie eh gardyn ec giattyn thie’n Chiarn, dy reayll magh dy chooilley red neu-ghlen ayns nhee erbee. 20As ghow eh captanyn-keead, as ny deiney ooasle, as kiannoortyn y pobble, as ooilley sleih’n cheer, as hug ad lhieu yn ree sheese veih thie’n Chiarn: as haink ad trooid y giat ard stiagh gys thie yn ree, as hoie ad yn ree er stoyl-reeoil y reeriaght. 21As ghow ooilley pobble y cheer boggey: as va’n ard-valley ec fea, lurg daue v’er varroo Athaliah lesh y chliwe.