CAB. XXIV

1Va Joash shiaght bleeaney dy eash tra ren eh toshiaght dy reill, as ren eh reill da-eed bleïn ayns Jerusalem: va ennym e voir myrgeddin Zibiah dy Veer-sheba. 2As ren Joash shen ny va cairagh ayns shilley’n Chiarn, ooilley laghyn Jehoiada yn saggyrt. 3Agh ghow Jehoiada daa ven er e hon, as hooar eh mec as inneenyn.

4As haink eh gy-kione ny lurg shoh, dy row Joash aignagh dy choamrey thie yn Chiarn. 5As haggil eh cooidjagh ny saggyrtyn as ny Leviteyn, as dooyrt eh roo, Gow-jee magh gys ard-valjyn Yudah, as trog-jee jeh ooilley Israel argid dy choamrey thie nyn Yee veih bleïn dy bleïn, as jeeagh dy der shiu yn chooish er y hoshiaght, ny-yeih cha dug ny Leviteyn er y hoshiaght eh. 6As deïe yn ree son Jehoiada yn ard-saggyrt, as dooyrt eh rish, Cre’n-fa nagh vel oo er harey ny Leviteyn dy chur lhieu stiagh ass Judah as veih Jerusalem, yn argid va troggit cordail rish sarey Voses sharvaant y Chiarn, as jeh chaglym-cooidjagh Israel, cour cabbane-agglish yn eanish? 7Son va mec Athaliah yn ven chustey shen er roostey thie Yee, as myrgeddin ooilley reddyn casherick thie yn Chiarn ren ad stowal er Baalim. 8As er sarey’n ree ren ad kishtey, as hoie ad eh cheu-mooie jeh giat thie’n Chiarn. 9As hug ad eam trooid Judah as Jerusalem, dy chur lhieu stiagh gys y Chiarn, yn cheesh doardee Moses sharvaant Yee ’syn aasagh er cloan Israel. 10As ghow ooilley ny princeyn as ooilley’n pobble boggey, as hug ad lhieu stiagh, as chur ad ’sy chishtey, derrey ve lane. 11Nish haink eh gy-kione, tra va’n kishtey er ny chur lesh gys thie-tashtee’n ree liorish ny Leviteyn; as tra honnick ad dy row mooarane argid ayn dy daink scrudeyr y ree, as fer-oik yn ard-saggyrt, as dolmee ad y kishtey, as ghow ad eh, as hug ad lhieu eh raad ve roie. Myr shoh ren ad veih traa dy traa, as haggil ad argid ayns palchey. 12As hug y ree as Jehoiada eh dauesyn ren shirveish ayns obbyr thie’n Chiarn, as daill ad masoonee as seyir, as myrgeddin obbreeyn yiarn as prash dy cherraghey thie’n Chiarn. 13Myr shoh hie ny obbreeyn er, derrey hug ad kione er yn obbyr, as hug ad thie Yee ayns y stayd cheddin dy aalid as niart, ve ayn roïe. 14As tra va kione er yn obbyr, hug ad lhieu yn chooid elley jeh’n argid gys y ree as Jehoiada, as ren ad siyn jeh son thie’n Chiarn, ta shen, siyn dy hirveish, as dy hebbal lhieu, as spainyn, as siyn airh as argid: as heb ad ourallyn-losht ayns thie’n Chiarn dy kinjagh, ooilley laghyn Jehoiada.

15Agh daase Jehoiada feer shenn, as dy eash vooar tra hooar eh baase; shey-feed as jeih bleeaney d’eash v’eh tra hooar eh baase. 16As doanluck ad eh ayns ard-valley Ghavid mastey ny reeaghyn, er-y-fa dy row eh er n’yannoo mie ayns Israel, chammah gys Jee, as da e hie. 17Nish lurg baase Yehoiada, haink princeyn Yudah, as ren ad nyn miallys da’n ree: as v’eh cleaynit dy eaishtagh roo. 18As hreig ad thie’n Chiarn Jee nyn ayraghyn, as hug ad ooashley da jallooyn ny keylley: as haink jymmoose er Judah as Jerusalem son shoh nyn beccah. 19Ny-yeih, haink phadeyryn huc, dy hyndaa ad reesht gys y Chiarn, as dymmyrk ad feanish nyn ’oï [ayns ennym y Chiarn] agh cha jinnagh ad geaishtagh. 20As haink Spyrryd Yee er Zechariah mac Jehoiada yn saggyrt, hass seose fenish y pobble, as dooyrt eh roo, Myr shoh ta Jee dy ghra, Cre’n-fa ta shiu brishey annaghyn y Chiarn, nagh vod shiu bishaghey? er-yn-oyr dy vel shiu er hreigeil y Chiarn, t’eshyn myrgeddin er hreigeil shiuish. 21As dirree ad magh n’oï, as chlagh ad eh gy-baase, ec sarey’n ree, ayns cooyrt thie’n Chiarn. 22Myr shoh cha chooinee Joash y ree er y chenjallys va Jehoiada ayr Zechariah er hoilshaghey da hene, agh hug eh e vac gy-baase: as tra v’eh paartail, dooyrt eh, Dy jeeagh y Chiarn er shoh, as goaill cooilleeney er y hon.

23As haink eh gy-kione ec jerrey ny bleeaney, dy daink sheshaght-caggee Syria seose n’oï: as haink ad gys Judah as Jerusalem, as stroie ad ooilley princeyn y pobble, as hug ad yn spooilley oc ersooyl gys ree Damascus. 24Son haink armee Syria lesh sheshaght fardalagh dy gheiney, as ren y Chiarn earroo yindyssagh dy leih y livrey gys nyn laue, er-y-fa dy row ad er hreigeil y Chiarn, Jee nyn ayraghyn: myr shen ren ad briwnys Yee y chooilleeney er Joash. 25As tra v’ad er n’immeeaght voish (son daag ad eh ayns doghanyn dewil) dirree ny sharvaantyn echey hene n’oï, son fuill mac Jehoiada yn saggyrt, as varr ad eh er e lhiabbee, as hooar eh baase: as doanluck ad eh ayns ard-valley Ghavid: agh cha nee ayns ny lhiaghtyn reeoil. 26As shoh ad dirree-magh n’oï; Zabad mac Shimeath ny Ammonitess, as Jehozabad mac Shimrith ny Moabitess.

27Nish mychione e vec, as mooad’s ny keeshyn hug ad er, as kys ren eh thie Yee y choamrey, cur-my-ner, ta coontey jeu scruit ayns lioar ny reeaghyn. As ren Amaziah e vac reill ayns e ynnyd.