CAB. XXV

1Va Amaziah queig bleeaney as feed d’eash tra ghow eh toshiaght dy reill, as ren eh reill nuy bleeaney as feed ayns Jerusalem: as va ennym e voir Jehoadan ayns Jerusalem. 2As ren eh shen ny va cairagh ayns shilley’n Chiarn, agh cha nee lesh slane ynrickys cree.

3Nish haink eh gy-kione, tra v’eh er ny hickyraghey ayns y reeriaght, dy varr eh ny sharvaantyn shen, v’er choyrt e ayr yn ree gy-baase. 4Agh cha varr eh yn chloan oc, agh ren eh myr te scruit ayns lioar Voses, raad doardee yn Chiarn, gra, Cha bee ny ayraghyn er nyn goyrt gy-baase son y chloan, ny foast yn chloan son nyn ayraghyn, agh bee dy chooilley ghooinney er ny choyrt gy-baase son e pheccah hene.

5As ren Amaziah Judah y haglym cooidjagh, as hoie eh harrystoo captanyn thousaneyn, as captanyn-keead, cordail rish thieyn nyn ayraghyn, trooid ooilley Judah as Benjamin: as ren eh ad y choontey seose veih feed bleïn d’eash, as hooar eh ad dy ve three cheead thousane reih deiney, fondagh son y chaggey, schleioil dy loaghtey shleiy as scape. 6Daill eh myrgeddin keead thousane dooinney niartal as dunnal ass Israel, son keead talent dy argid. 7Agh haink dooinney dy Yee huggey, gra, O ree, ny lhig da sheshaght-caggee Israel goll mayrt; son cha vel y Chiarn marish Israel, ny marish ooilley cloan Ephraim. 8Agh my hed oo, jean shen, bee lajer son y chaggey: ver Jee ort tuittym roish y noid: son ec Jee ta pooar dy chur cooney, as dy hilgey sheese. 9As dooyrt Amaziah rish dooinney Yee, Agh cre nee mayd son y keead talent ta mee er choyrt da sheshaght-caggee Israel? As dreggyr yn dooinney dy Yee, Te ayns pooar y Chiarn dy chur dhyt’s foddey smoo na shoh. 10Eisht ren Amaziah scarrey, veih e gheiney hene, sheshaght-caggee Ephraim, va er jeet dy chooney lesh, dy gholl rhymboo: shen-y-fa va nyn farg dy mooar er ny vrasnaghey noi Judah, as hie ad thie ayns jiarg-chorree.

11As ghow Amaziah cree, as leeid eh magh e gheiney, as hie eh gys y choan sailley, as woaill eh jeh cloan Seir, jeih thousaneyn. 12As ny jeih thousaneyn elley va er-mayrn, va cloan Yudah er ghoaill nyn bryssoonee, hug ad lhieu ad gys mullagh y chreg, as hilg ad sheese ad gour nyn mullee jeh’n chreg, as v’ad broojit dy baase.

13Agh sidooryn y cheshaght-chaggee va Amaziah er hyndaa thie, nagh ragh ad mârish gys y chaggey, huitt ad er ard-valjyn Yudah, veih Samaria eer gys Beth-horon, as woaill ad three thousaneyn jeu, as ghow ad mooarane spooilley.

14Nish haink eh gy-kione, lurg da Amaziah v’er jeet veih stroie ny Edomiteyn, dy dug eh lesh jeeaghyn cloan Seir, as hoie eh seose ad dy ve son jeeghyn da hene, as hug eh ooashley daue, as heb eh oural-millish kiongoyrt roo. 15Shen-y-fa va jymmoose y Chiarn er ny vrasnaghey noi Amaziah, as hug eh phadeyr er chaghteraght huggey, dooyrt rish, Cre’n-fa t’ou uss er n’eiyrt er jeeghyn y pobble, nagh voddagh y pobble oc hene y livrey ass dty laue? 16As haink eh gy-kione myr v’eh taggloo rish, dy dooyrt y ree rish, Nee uss fer jeh fir-choyrlee yn ree? bee dty host, nonney ver-ym gy-baase oo. Eisht cha jagh y phadeyr ny-sodjey lesh, agh dooyrt eh, Ta fys aym dy vel Jee er chiarail dy stroie oo, er-yn-oyr dy vel oo er n’yannoo shoh, as nagh vel oo er n’eaishtagh rish my choyrle’s.

17Eisht ghow Amaziah ree Yudah coyrle, as hug eh chaghteraght gys Joash mac Jehoahaz, mac Jehu ree Israel, gra, Tar, lhig dooin fakin y cheilley eddin dy eddin. 18As shoh va’n ansoor hyndaa Joash ree Israel da Amaziah ree Yudah, Hug yn onnane va ayns Lebanon, chaghteraght gys y cedar va ayns Lebanon, gra, Cur dt’inneen da my vac son ben: as haink beisht feïe va ayns Lebanon shaghey, as stamp eh sheese yn onnane. 19T’ou gra, Cur-my-ner, t’ou er woalley ny Edomiteyn, as ta dty chree dy dty hroggal seose lesh moyrn: fuirree nish ec y thie, cre’n-fa t’ou doostey olk gys dty assee, oo hene dy huittym, as Judah mayrt. 20Agh cha n’eaishtagh Amaziah, son veih Jee ve, dy livrey ad gys laue nyn noidyn, er-yn-oyr dy deiyr ad er jeeghyn Edom. 21Myr shoh hie Joash ree Israel seose, as honnick ad y cheilley noi-ry-hoi, chammah eh-hene as Amaziah ree Yudah, ec Beth-shemesh, ayns Judah. 22As hooar Judah yn chooid smessey veih Israel, as roie ad er-chea, dagh dooinney gys e chummal. 23As ghow Joash ree Israel Amaziah ree Yudah mac Joash, mac Jehoahaz, ec Beth-shemesh, as hug eh lesh eh gys Jerusalem, as vrish eh sheese voalley Yerusalem, veih giat Ephraim gys giat y chorneil, kiare cheead cubit. 24As ghow eh ooilley’n airh as yn argid, as ooilley ny siyn v’er ny gheddyn ayns thie Yee fo currym Obed-edom, as tashtaghyn thie’n ree, as raanteenyn myrgeddin, as hyndaa eh reesht gys Samaria.

25As va Amaziah mac Joash ree Yudah bio, lurg baase Joash mac Jehoahaz ree Israel, queig bleeaney jeig. 26Nish yn chooid elley dy obbraghyn Amaziah, toshiaght as jerrey, cur-my-ner nagh vel ad scruit ayns lioar reeaghyn Yudah as Israel?

27Nish lurg y traa hyndaa Amaziah ersooyl veih geiyrt er y Chiarn, dirree ad magh n’oï ayns Jerusalem, as chossyn eh roish gys Lachish: agh deiyr ad er gys Lachish, as varr ad eh ayns shen. 28As hug ad lhieu eh lesh cabbil, as doanluck ad eh marish e ayraghyn ayns ard-valley Yudah.