CAB. XXVI

1Eisht ghow ooilley pobble Yudah Uzziah, va shey bleeaney jeig d’eash, as ren ad eh ny ree ayns ynnyd e ayr Amaziah. 2Hrog eh Eloth, erreish da v’er chosney eh reesht da Judah, lurg baase e ayrey. 3Shey bleeaney jeig d’eash va Uzziah, tra ren eh toshiaght dy reill, as ren eh reill daa vleïn jeig as da-eed ayns Jerusalem: va ennym e voir myrgeddin Jecoliah jeh Jerusalem. 4As ren eh shen ny va cairagh ayns shilley’n Chiarn, cordail rish ooilley ny ren e ayr Amaziah. 5As hir eh lurg Jee ayns laghyn Zechariah, va tushtagh ayns ashlishyn Yee: as choud as hirveish eh yn Chiarn, hug Jee er dy vishaghey. 6As hie eh magh as ren eh caggey noi ny Philistinee, as lhieg eh sheese voallaghyn Ghath, as voallaghyn Jabneh, as voallaghyn Ashdod as hrog eh ard-valjyn mygeayrt-y-mysh Ashdod, as mastey ny Philistinee. 7As chooin Jee lesh noi ny Philistinee, as noi ny Arabianee va cummal ayns Gur-baal, as ny Mehunimee. 8As deeck ny Ammoniteyn keesh da Uzziah, as ren e ghoo skeayley dy lhean, eer gys cagliagh Egypt, son ren eh eh-hene y niartaghey erskyn towse. 9Marish shoh, hrog Uzziah tooryn ayns Jerusalem, ec y yiat corneilagh, as ec giat ny glionney, as ec corneil y voalley, as ren eh ad y niartaghey. 10Hrog eh myrgeddin tooryn ’syn aasagh, as chleiy eh ymmodee chibbraghyn, son va mooarane maase echey, chammah ’sy cheer-injil, as ’sy cheer-rea: eirinnee neesht, as labreeyn gour ny biljyn-feeyney hoie eh ayns ny sleityn, as ayns Carmel: son va taitnys echey ayns obbyr thallooin. 11Marish shoh, va ec Uzziah sheshaght vooar dy gheiney-caggee, hie magh dy chaggey ayns sheshaghtyn, cordail rish nyn earroo, liorish laue Jeiel yn scrudeyr, as Maaseiah yn er-reill, fo laue Hananiah, jeh captanyn y ree. 12Va slane coontey ard-leeideilee ny deiney niartal caggee, daa housane as shey cheead. 13As fo’n laue ocsyn va sheshaght-caggee three cheead thousane as shiaght thousaneyn as queig cheead, ren caggey lesh pooar niartal, dy chooney lesh y ree noi’n noid. 14As ren Uzziah ooilley’n cheshaght-chaggee y yannoo magh lesh scapeyn, as shleiyghyn, as bayrnyn-caggee, as eilley-broghil, as bowghyn, as slingyn dy hilgey claghyn. 15As hooar eh jeant ayns Jerusalem liorish deiney schleioil greinyn lajer caggee, dy ve er ny tooryn as er ny bulwarkyn, dy lhiggey sideyn as claghyn mooarey lhieu: as hie goo jeh magh foddey as gerrit, son dy ren y Chiarn dy mooar cooney lesh, as niartaghey eh.

16Agh ayns mooads e niart, va e chree troggit seose gys e hoyrt-mow: son ren eh peccah noi’n Chiarn e Yee, liorish goll stiagh ayns chiamble y Chiarn, dy hebbal incense er altar yn oural-millish. 17As hie Azariah yn saggyrt stiagh geiyrt er, as mârishyn kiare-feed jeh saggyrtyn y Chiarn, va deiney dunnal. 18As hass ad seose noi Uzziah yn ree, as dooyrt ad rish, Cha vel eh lowal dhyt’s, Uzziah, dy hebbal incense gys y Chiarn, son ta shen er currym ny saggyrtyn mec Aaron, t’er nyn gasherickey dy hebbal incense: faag yn ynnyd casherick shoh, son t’ou er gholl harrish y leigh, chamoo vees eh gys dt’onnor veih’n Chiarn Jee. 19Eisht va farg er Uzziah, as va censer echey ny laue, dy lostey incense: as choud’s v’eh baggyrt er ny saggyrtyn, hrog y louraanys chelleeragh ayns glaare e eddin, kiongoyrt rish ny saggyrtyn ayns thie yn Chiarn, rish lhiattee altar yn incense. 20As yeeagh Azariah yn ard-saggyrt, as ooilley ny saggyrtyn er, as cur-my-ner va’n louraanys ayns glaare e eddin, as deiyr ad magh eh, as v’eh hene dy jarroo ayns siyr dy chosney magh, er-y-fa dy row yn Chiarn er woalley eh. 21As va Uzziah yn ree ny lourane gys laa e vaaish, as ren eh cummal ayns thie er-lheh myr v’eh ny lourane, son v’eh giarit magh veih thie’n Chiarn: as va Jotham e vac harrish thie’n ree, briwnys pobble ny cheerey.

22Nish y chooid elley dy obbraghyn Uzziah, toshiaght as jerrey, ren Isaiah yn phadeyr mac Amoz y scrieu. 23Myr shoh chaddil Uzziah marish e ayraghyn, as doanluck ad eh marish e ayraghyn ’sy vagher-oanluckee va lesh ny reeaghyn; son dooyrt ad, T’eh ny lourane: as ren Jotham e vac reill ayns e ynnyd.