CAB. XXVII

1Va Jotham queig bleeaney as feed d’eash, tra ren eh toshiaght dy reill, as ren eh reill shey bleeaney jeig ayns Jerusalem: va ennym e voir myrgeddin Jerushah, inneen Zadok. 2As ren eh shen ny va cairagh ayns shilley’n Chiarn, cordail rish ooilley ny ren e ayr Uzziah: ny-yeih cha jagh eh stiagh ayns chiamble y Chiarn. As cha row’n pobble foast ’sy raad chair. 3Hrog eh giat ard thie’n Chiarn, as ren eh mooarane obbyr er voalley Ophel. 4Hrog eh myrgeddin ard-valjyn ayns sleityn Yudah: as ayns ny keylljyn hrog eh cashtallyn as tooryn.

5Ren eh caggey myrgeddin rish ree ny Ammoniteyn, as hooar eh yn varriaght orroo. As hrog eh keesh jeh Ammon yn vleïn cheddin, keead talent d’argid, as jeih thousane towse dy churnagh, as jeih thousane dy oarn. Wheesh shoh deeck cloan Ammon da, chammah yn nah vleïn as y trass. 6Myr shoh haink Jotham dy ve niartal, er-y-fa dy row e raaidyn kiart kiongoyrt rish y Chiarn e Yee.

7Nish y chooid elley jeh obbraghyn Yotham as ooilley e chaggaghyn, as e raaidyn, cur-my-ner t’ad scruit ayns lioar reeaghyn Israel as Judah. 8V’eh queig bleeaney as feed d’eash, tra ren eh toshiaght dy reill, as ren eh reill shey bleeaney jeig ayns Jerusalem.

9As chaddil Jotham marish e ayraghyn, as doanluck ad eh ayns ard-valley Ghavid: as ren Ahaz e vac reill ayns e ynnyd.