CAB. XXVIII

1Va Ahaz feed bleïn d’eash tra ren eh toshiaght dy reill, as ren eh reill shey bleeaney jeig ayns Jerusalem; agh cha ren eh shen ny va jeeragh ayns shilley’n Chiarn, goll-rish David e ayr. 2Son jimmee eh ayns raaidyn reeaghyn Israel, as ren eh myrgeddin jallooyn lheït son Baalim. 3Marish shoh, ren eh lostey incense ayns coan mac Hinnom, as heb eh e chloan son oural-losht, lurg cliaghtey eajee ny ashoonee va’n Chiarn er n’imman magh roish cloan Israel. 4Ren eh oural myrgeddin, as lostey incense ayns ny ard-ynnydyn, as er ny croink, as fo dagh billey glass. 5Shen-y-fa ren y Chiarn e Yee eh y livrey gys laue ree Syria, as woaill ad eh, as hug ad lhieu ersooyl earroo mooar jeu nyn gappee gys Damascus: as v’eh myrgeddin er ny livrey gys laue ree Israel, ren y woalley eh lesh baase mooarane sleih.

6Son va Pekah mac Remaliah ayns Judah er stroie shey-feed thousane ayns un laa, ooilley deiney niartal; er-y-fa dy row ad er hreigeil y Chiarn Jee nyn ayraghyn. 7As varr Zichri, dooinney pooaral dy Ephraim, Maaseiah mac y ree, as Azrikam kiannoort y thie, as Elkanah by-niessey da’n ree. 8As hug cloan Israel lhieu ersooyl ayns cappeeys veih nyn mraaraghyn, daa cheead thousane ben, mec as inneenyn, as ghow ad myrgeddin ymmodee spooilley, as hug ad lhieu yn spooilley gys Samaria. 9Agh va phadeyr y Chiarn ayns shen, va e ennym Oded: as hie eh magh quail y cheshaght-chaggee haink gys Samaria, as dooyrt eh roo, Cur-my-ner, er-yn-oyr dy row’n Chiarn Jee nyn ayraghyn corree rish Judah, t’eh er livrey ad gys nyn laue, as ta shiu er varroo ad ayns jymmoose, ta geamagh gys niau son cooilleeney. 10As nish ta shiu kiarail dy reayll cloan Yudah as Yerusalem fo bondiaght, chammah deiney as mraane: agh nagh vel ny mast’ eu, eer ny mast’ eu hene, peccaghyn trome noi’n Chiarn nyn Yee? 11Nish clasht-jee rhym’s er-y-fa shen, as livrey-jee reesht ny cappee, ta shiu er ghoaill jeh nyn mraaraghyn: son ta jymmoose dewil y Chiarn aarloo dy huittym erriu. 12Eisht Azariah mac Johanan, Berechiah mac Meshillemoth, as Jehizkiah mac Shallum, as Amasa mac Hadlai, ard-gheiney mastey cloan Ephraim, hass ad seose nyn ’oï ocsyn haink veih’n chaggey, 13As dooyrt ad roo, Cha jean mie diu dy choyrt lhieu ny cappee ayns shoh: son ayns wheesh as dy vel shin hannah er ve foiljagh noi’n Chiarn, ta shiu kiarail dy yannoo nyn beccaghyn as nyn loght ny s’trimmey: son s’mooar ta nyn loght, as ta jymmoose dewil noi Israel. 14Myr shen daag ny deiney caggee ny cappee, as y spooilley, kiongoyrt rish ny princeyn as y slane sheshaght. 15As ny deiney va roïe enmyssit, hrog ad orroo, as ghow ad ny cappee, as lesh y spooilley ren ad coamrey ooilley ny va rooisht ny mast’ oc, as hug ad eaddagh as braagyn orroo, as hug ad bee as jough daue, as dooilee ad ad, as hug ad ooilley ny annooinee er assylyn gys Jericho, ard-valley ny biljyn-palm, gys nyn mraaraghyn: myr shen hyndaa ad reesht gys Samaria.

16Ec y traa shen hug ree Ahaz fys gys ree Assyria dy chooney lesh. 17Son va ny Edomiteyn er jeet reesht as er woalley Judah, as er choyrt lhieu ersooyl cappee. 18Va ny Philistinee myrgeddin er vrishey stiagh er ard-valjyn ny strahghyn, as my-yiass jeh Judah, as er ghoaill Beth-shemesh, as Ajalon, as Gederoth, as Shocho lesh e baljyn, as Timnah lesh e baljyn, Gimzo myrgeddin as e baljyn: as ren ad cummal ayndoo. 19Son va’n Chiarn er hayrn Judah feer injil, er coontey Ahaz ree Yudah; my-chyndagh rish ny peccaghyn echeysyn noi’n Chiarn, va Judah faagit gyn cooney. 20As haink Tilgath-pilneser ree Assyria huggey, as v’eh laad er, ayns ynnyd cooney. 21Son ghow Ahaz kuse ass tashtaghyn thie’n Chiarn, ass thie’n ree, as veih ny princeyn, as hug eh shoh da ree Assyria: agh cha row e chooney gys veg yn ymmyd.

22As ayns earish e arkys hie eh er e hoshiaght ayns peccah noi’n Chiarn. Shen ree Ahaz diu. 23Son heb eh oural gys jeeghyn Damascus, e noidyn: as dooyrt eh, Er-yn-oyr, dy vel jeeghyn Syria er chooney lesh ny reeaghyn ocsyn, shen-y-fa neem’s ouralley daue, dy vod ad cooney lhiam’s: agh hug ad shoh yn drogh-yerrey er hene, as er ooilley Israel. 24As ren Ahaz chaglym cooidjagh siyn thie Yee, as yiare eh ad ayns peeshyn, as ghooin eh seose dorryssyn thie’n Chiarn, as hrog eh altaryn da hene ayns dy chooilley chorneil dy Yerusalem. 25As ayns ooilley ard-valjyn Yudah ren eh ard-ynnydyn dy lostey incense da jeeghyn joarree, dy vrasnaghey yn Chiarn, Jee e ayraghyn.

26Nish y chooid elley jeh e obbraghyn, as jeh ooilley e raaidyn, toshiaght as jerrey, cur-my-ner, t’ad scruit ayns lioar reeaghyn Yudah as Israel. 27As chaddil Ahaz marish e ayraghyn, as doanluck ad eh ayns ard-valley Yerusalem: agh cha dug ad eh ayns oaiaghyn reeaghyn Israel: as ren Hezekiah e vac reill ayns e ynnyd.