CAB. XXIX

1Ren Hezekiah toshiaght dy reill tra v’eh queig bleeaney as feed d’eash, as ren eh reill nuy bleeaney as feed ayns Jerusalem: as va ennym e voir Abijah inneen Zechariah. 2As ren eh shen ny va cairagh ayns shilley’n Chiarn, cordail rish ooilley ny va e ayr David er n’yannoo.

3’Sy chied vleïn jeh e reill, ’sy chied vee, doshil eh dorryssyn thie’n Chiarn, as choamree eh ad. 4As hug eh lesh stiagh ny saggyrtyn as ny Leviteyn, as ren eh ad y haglym cooidjagh ayns y straid har, 5As dooyrt eh roo, Eaisht-jee rhym’s, shiuish Leviteyn, jean-jee shiu hene y chasherickey, as jean-jee thie yn Chiarn Jee nyn ayraghyn y chasherickey, as glen-jee magh dy chooilley vroïd ass yn ynnyd casherick. 6Son ta nyn ayraghyn er n’yannoo peccah, as er chur rish shen ny va olk ayns shilley’n Chiarn nyn Yee, as er hreigeil eh, as er hyndaa nyn eddinyn, as er choyrt cooyl rish thie yn Chiarn. 7T’ad myrgeddin er yeigh seose dorryssyn y phorch, as er vooghey ny lampyn, as cha vel ad er lostey incense, ny er hebbal ourallyn-losht ’syn ynnyd casherick, da Jee Israel. 8Shen-y-fa va jymmoose y Chiarn er Judah as Jerusalem, as t’eh er livrey ad gys seaghyn, gys atchim, as gys an-ghoo, myr ta shiu dy akin lesh nyn sooillyn. 9Son cur-my-ner, ta nyn ayraghyn er duittym liorish y chliwe, as son shoh ta nyn mec, nyn inneenyn, as nyn mraane ayns cappeeys. 10Nish te ayns my chree dy yannoo conaant rish y Chiarn, Jee Israel, dy vod eulys e yymmoose v’er ny hyndaa ersooyl voïn. 11My chloan, ny bee-jee nish almoragh: son ta’n Chiarn er reih shiuish dy hassoo kiongoyrt rish, dy hirveish eh, dy choyrt ooashley da, as dy hebbal oural.

12Eisht hrog ny Leviteyn orroo, Mahath mac Amasai, as Joel mac Azariah, jeh mec ny Kohathiteyn: as jeh mec Merari; Kish mac Abdi, as Azariah mac Jehalelel: as jeh ny Gershoniteyn; Joah mac Zimmah, as Eden mac Yoah: 13As jeh mec Elizaphan; Shimri as Jeiel: as jeh mec Asaph; Zechariah as Mattaniah: 14As jeh mec Heman; Jehiel as Shimei: as jeh mec Yeduthun; Shemaiah as Uzziel. 15As haggil ad nyn mraaraghyn cooidjagh, dy ve er nyn gasherickey, as haink ad ec sarey’n ree, liorish goo’n Chiarn, dy ghlenney thie’n Chiarn. 16As hie ny saggyrtyn stiagh gys ynnyd smoo casherick thie’n Chiarn, dy ghlenney, as dy chartey magh ooilley’n vroïd hooar ad ayns chiamble y Chiarn, gys cooyrt thie’n Chiarn. As hrog ny Leviteyn lhieu magh eh gys strooan Kidron. 17Nish ren ad toshiaght er y chied laa jeh’n chied vee dy ghlenney, as er y hoghtoo laa jeh’n vee haink ad gys porch y Chiarn: myr shoh ren ad thie’n Chiarn y ghlenney magh ayns hoght laa, as er y cheyoo laa yeig jeh’n chied vee va kione er nyn obbyr. 18Eisht hie ad stiagh gys Hezekiah yn ree, as dooyrt ad, Ta shin er ghlenney ooilley thie’n Chiarn, as altar yn oural-losht, as ooilley ny siyn, as boayrd yn arran casherick, as ooilley e hiyn. 19Marish shoh, ooilley ny siyn, jeu va ree Ahaz dy mee-viallagh er n’yannoo ymmyd neu-chooie, rish y lhing echeysyn, ta shinyn er ghlenney as er chasherickey, as cur-my-ner, t’ad roish altar y Chiarn.

20Eisht dirree ree Hezekiah dy moghey, as ren eh fir-reill yn ard-valley y haglym cooidjagh, as hie eh seose gys thie yn Chiarn. 21As hug ad lhieu shiaght dew, as shiaght reaghyn, as shiaght eayin, as shiaght goair fyrryn, dy ve oural-peccah son y reeriaght, as son yn ynnyd casherick, as son Judah; as doardee eh ny saggyrtyn mec Aaron dy hebbal ad er altar y Chiarn. 22Myr shen varr ad ny dew, as ghow ny saggyrtyn yn uill, as spreih ad eh er yn altar: myrgeddin tra v’ad er varroo ny reaghyn, spreih ad yn uill er yn altar: varr ad myrgeddin ny eayin, as spreih ad yn uill er yn altar. 23As hug ad lhieu magh ny goair fyrryn son yn oural-peccah, fenish y ree as y pobble, as hug ad nyn laueyn orroo: 24As varr ny saggyrtyn ad, as ren ad lhiasaghey lesh yn uill oc er yn altar, dy yannoo coardail son ooilley Israel: son doardee yn ree dy beagh yn oural-losht as yn oural-peccah er ny hebbal son ooilley Israel. 25As hoie eh ny Leviteyn ayns thie yn Chiarn lesh cymballyn, lesh psaltereeyn, as claasaghyn, cordail rish sarey Ghavid, as Gad ashleyder y ree, as Nathan y phadeyr: son myr shoh va sarey’n Chiarn liorish e adeyryn. 26As hass ny Leviteyn lesh greinyn-kiaullee Ghavid, as ny saggyrtyn lesh ny trumpetyn. 27As doardee Hezekiah dy hebbal yn oural-losht er yn altar: as ec toshiaght yn oural-losht, hie ad myrgeddin lesh arrane y Chiarn lesh ny trumpetyn, as lesh ny greinyn-kiaullee lurg oardagh Ghavid ree Israel. 28As hug ooilley’n pobble ooashley, as hie ny arranee lesh nyn giaull, as heid ny trumpeteryn: as darr shoh derrey va’n oural dy slane losht. 29As tra va’n chirveish harrish, ren y ree as ooilley ny va kionfenish mârish croymmey, as hug ad ooashley. 30Marish shoh, doardee ree Hezekiah, as ny princeyn da ny Leviteyn dy ghoaill arraneyn-moyllee da’n Chiarn, lesh goan Ghavid, as Asaph yn ashleyder: as ghow ad arraneyn-moyllee lesh boggey, as chroym ad nyn ghing, as hug ad ooashley. 31Eisht doardee Hezekiah as dooyrt eh, Nish ta shiu er chasherickey shiu hene gys y Chiarn, tar-jee er-gerrey, as cur-jee lhieu ourallyn, as chebballyn-booise gys thie’n Chiarn. As hug y pobble lhieu stiagh ourallyn, as chebballyn-booise, as ourallyn-losht lesh cree arryltagh. 32As va coontey ny ourallyn ren y pobble y hebbal, three-feed as jeih dow, keead rea, as daa cheead eayn: v’ad shoh ooilley son oural-losht da’n Chiarn. 33As ren ad casherickey shey cheead dow, as three thousane keyrrey. 34Agh va beggan jeh ny saggyrtyn ayn, dy roshtyn er fanney ooilley ny ourallyn: shen-y-fa, ren nyn mraaraghyn ny Leviteyn cooney lhieu derrey va’n obbyr harrish, as derrey va ny saggyrtyn er nyn gasherickey: son va ny Leviteyn ny sassey er nyn gasherickey, na ny saggyrtyn. 35As ymmodee myrgeddin va ny ourallyn-losht, marish meeaylys ny ourallyn-shee, as ny ourallyn-feeyney son dagh oural-losht. Myr shoh va shirveish thie yn Chiarn er n’oardrail, 36As ghow Hezekiah, as ooilley’n pobble boggey, dy row Jee er niartaghey lhieu: son va’n obbyr jeant dy arryltagh.