CAB. III

1Eisht ren Solomon toshiaght dy hroggal thie’n Chiarn ayns Jerusalem er cronk Moriah, raad va’n Chiarn er hoilshaghey eh-hene da David e ayr, ’sy voayl kiarit liorish David ayns laare-arroo Ornan yn Jebusite. 2As ghow eh toshiaght dy hroggal er y nah laa jeh’n nah vee, ’sy chiarroo vleïn jeh e reill.

3Nish shoh yn towshan myr hug Jee roish Solomon son troggal thie Yee. Yn lhiurid ayns cubityn lurg y chied towse, va three-feed cubit, as y lheead feed cubit. 4As va lhiurid y phorch v’er eddin y thie feed cubit, cordail rish lheead y thie, as va’n yrjid shey-feed: as choodee eh eh harrish er cheu-sthie lesh glen airh. 5As y thie mooar hene ren eh eh y ceillal lesh fuygh-juys, as choodee eh shen harrish lesh glen airh, as ren eh grainney er biljyn-palm, as linkyn airh. 6As hoie eh magh y thie dy stoamey lesh claghyn costal son aalid: as va’n airh veih cheer Parvaim. 7Choodee eh myrgeddin yn thie, ny jeaystyn, ny pillaryn, as ny voallaghyn echey, as ny coollaghyn lesh airh, as ghrainnee eh cherubim er ny voallaghyn, 8As ren eh yn thie smoo casherick, va’n lhiurid echey cordail rish lheead y thie, feed cubit, as y lheead echey feed cubit: as choodee eh eh harrish lesh glen airh mysh shey cheead talent. 9As va towse ny treinaghyn jeih shekelyn as da-eed dy airh: as choodee eh ny shamyryn b’yrjey lesh airh. 10As ayns y thie smoo casherick ren eh daa cherubim dy obbyr ghrainnit, as choodee eh ad harrish lesh airh.

11As va skianyn ny cherubim feed cubit er lhiurid: va un skian y derrey cherub queig cubityn, roshtyn gys voalley’n thie: as y skian elley myrgeddin queig cubityn, roshtyn gys skian y cherub elley. 12As va skian y cherub elley queig cubityn, roshtyn gys voalley’n thie; as va’n skian elley queig cubityn, roshtyn gys skian yn cherub elley. 13Ren skianyn ny cherubim shoh skeayley ad-hene magh feed cubit; as v’ad shassoo er nyn gassyn, as va nyn eddinyn chyndaa stiagh.

14As ren eh yn coodagh va eddyr y chiamble as yn ynnyd casherick dy ghorrym, as purple, as scarleod, as aanrit keyl, as dobbree eh cherubim er. 15Myrgeddin ren eh roish y thie daa phillar jeh queig cubityn jeig as feed ayns yrjid, as va’n obbyr-attee v’er mullagh dagh pillar jeu queig cubityn. 16As ren eh linkyn airh, myr ’syn ynnyd casherick, as hug eh ad er king ny pillaryn, as ren eh keead pomegranate, as hug eh ad eddyr ny linkyn. 17As hoie eh seose ny pillaryn roish y chiamble, yn derrey yeh er y laue yesh, as y jeh elley er y laue chiare; as denmys eh shen v’er y laue yesh, Jachin, as shen v’er y laue chiare, Boaz.