CAB. XXX

1As hug Hezekiah fys gys ooilley Israel as Judah, as hug eh screeunyn myrgeddin gys Ephraim as Manasseh, ad dy heet seose gys thie’n Chiarn ec Jerusalem, dy reayll yn chaisht da’n Chiarn, Jee Israel. 2Son va’n ree, as e phrinceyn, as ooilley’n pobble ayns Jerusalem er choyrt nyn goyrle dy cheilley, dy reayll yn chaisht ’sy nah vee. 3Son cha voddagh ad y reayll eh ec y traa shen, er-yn-oyr nagh row traa ec ny saggyrtyn dy chasherickey ad-hene, ny foast ec y pobble dy heet cooidjagh ec Jerusalem. 4As my-haittin lesh y ree, as ooilley’n pobble dy beagh eh myr shen. 5Myr shen ren ad oardagh, dy chur eam trooid ooilley Israel, veih Beer-sheba eer gys Dan, dy darragh ad dy reayll yn chaisht da’n Chiarn, Jee Israel, ec Jerusalem: son cha row ad er vreayll eh ry-foddey dy hraa cordail rish y leigh. 6Myr shen hie ny chaghteryn lesh ny screeunyn veih’n ree as e phrinceyn trooid ooilley Israel as Judah, as cordail rish sarey’n ree, gra, Shiuish chloan Israel, chyndaa-jee reesht gys y Chiarn, Jee Abraham, Isaac, as Israel, as nee eshyn chyndaa hiuish ta er-mayrn, as er scapail veih laue reeaghyn Assyria. 7As ny bee-jee goll-rish nyn ayraghyn, as nyn mraaraghyn, ren peccah y yannoo noi’n Chiarn, Jee nyn ayraghyn, ren er-yn-oyr shen ad y livrey seose gys traartys, myr ta shin hene dy akin. 8Nish ny bee-jee creoi-wannallagh, myr va nyn ayraghyn agh livrey-jee shiu hene seose gys y Chiarn, as tar-jee gys yn ynnyd, t’eh er chasherickey son dy bragh: as shirveish-jee yn Chiarn y Jee eu, dy vod eulys e chorree chyndaa ersooyl veue. 9Son my hyndaa-ys shiu reesht gys y Chiarn, yiow nyn mraaraghyn as nyn gloan chymmey vouesyn ghow ad nyn gappee, myr shen dy jig ad reesht gys y cheer shoh: son ta’n Chiarn nyn Yee graysoil as myghinagh, as cha jean eshyn e eddin y hyndaa ersooyl veue, my hyndaa-ys shiuish reesht huggeysyn. 10Myr shoh hie ny chaghteryn er nyn doshiaght veih ard-valley dy ard-valley, trooid cheer Ephraim as Manasseh, eer gys Zebulun; agh cha ren ad agh craid jeu, as gannidys orroo. 11Ny-yeih, ren ymmodee jeh Asher as Manasseh, as jeh Zebulun ad-hene y injillaghey, as haink ad gys Jerusalem. 12Agh ayns Judah va laue Yee lhieu lesh un chree dy chooilleeney sarey’n ree as ny princeyn, liorish goo’n Chiarn.

13As va earroo mooar dy leih er nyn jaglym cooidjagh ec Jerusalem, dy reayll feailley’n chaisht ’syn nah vee. 14As hrog ad orroo, as ghow ad ersooyl ny altaryn va ayns Jerusalem, as ooilley ny altaryn-incense ren ad y lhieggal, as hilg ad ad ayns strooan Kidron. 15Eisht daarlee ad yn eayn-caisht er y chiarroo laa yeig jeh’n nah vee: as hyndaa ny saggyrtyn as ny Leviteyn, as ren ad ad-hene y chasherickey, as hug ad lhieu ny ourallyn-losht stiagh gys thie’n Chiarn. 16As hass ad ayns nyn ynnyd lurg nyn gliaghtey, cordail rish leigh Voses yn dooinney dy Yee: ren ny saggyrtyn yn uill y spreih, ghow ad veih laue ny Leviteyn. 17Son va ymmodee ’sy chaglym-cooidjagh nagh row er nyn gasherickey: shen-y-fa va’n currym er ny Leviteyn dy varroo ny eayin-caisht, son dagh unnane nagh row glen, dy chasherickey ad da’n Chiarn. 18Son va ymmodee jeh Ephraim as Manasseh, Issachar as Zebulun, nagh row er chasherickey ad-hene, ny-yeih d’ee ad yn eayn-caisht, agh cha nee myr ve scruit [’sy leigh:] 19Agh ghow Hezekiah padjer er nyn son, gra, Dy bee’n Chiarn mie myghinagh da dy chooilley unnane ta kiarail ayns ynrickys e chree dy hirrey Jee, yn Chiarn, Jee e ayraghyn, ga nagh vel eh er roshtyn gys slane glennid y leigh. 20As hug y Chiarn clashtyn da Hezekiah, as ren eh gymmyrkey lesh y pobble. 21As dreill cloan Israel feailley ny caisht ayns Jerusalem shiaght laa lesh ard-voggey: as hug ny Leviteyn as ny saggyrtyn moylley da’n Chiarn laa lurg laa, goaill arraneyn lesh greinyn-kiaullee ard da’n Chiarn. 22As loayr Hezekiah dy gerjoilagh rish ooilley ny Leviteyn, va cur er y hoshiaght tushtey mie yn Chiarn: as dreill ad seose gien y feailley slane shiaghtin, chebbal ourallyn-shee, as coyrt moylley da’n Chiarn, Jee nyn ayraghyn. 23As hug y slane chaglym-cooidjagh nyn goyrle dy cheilley dy reayll feailley shiaght laghyn elley: as dreill ad shiaght laghyn elley lesh gennallys cree. 24Son hug Hezekiah ree Yudah da’n cheshaght thousane dow, as shiaght thousane keyrrey; as hug ny princeyn daue thousane dow, as jeih thousane keyrrey: as ren earroo mooar jeh ny saggyrtyn ad-hene y chasherickey. 25As va ooilley pobble Yudah ayns ard-voggey, marish ny saggyrtyn as ny Leviteyn, as ooilley’n cheshaght haink ass Israel, as ny joarreeyn ass cheer Israel, mâroosyn va cummal ayns Judah. 26Myr shoh va ard-voggey ayns Jerusalem: son neayr’s lhing Solomon, mac Ghavid, ree Israel, cha row y lheid ayns Jerusalem.

27Eisht hass ny saggyrtyn ny Leviteyn seose, as vannee ad y pobble: as va nyn goraa er ny chlashtyn, as hie nyn badjer seose gys ynnyd e chasherickys, eer gys niau.