CAB. XXXI

1Nish tra va shoh ooilley harrish, hie ooilley Israel va kionfenish magh trooid ard-valjyn Yudah, as vrish ad ny jallooyn ayns peeshyn, as yiare ad sheese ny keylljyn, as lhieg ad ny ard-ynnydyn as ny altaryn trooid ooilley Judah as Benjamin, ayns Ephraim myrgeddin as Manasseh, derrey v’ad dy bollagh er stroie ad ooilley. Eisht hyndaa ooilley cloan Israel reesht dagh dooinney gys e chummal, ayns e ard-valjyn hene.

2As doardee Hezekiah currym ny saggyrtyn as ny Leviteyn, lurg nyn goorseyn, dagh dooinney cordail rish e hirveish, ny saggyrtyn as ny Leviteyn son ourallyn-losht, as son ourallyn-shee, dy hirveish, as dy choyrt booise, as dy choyrt moylley ayns giattyn cooyrtyn y Chiarn. 3Phoint eh myrgeddin yn ayrn va’n ree dy choyrt jeh e chooid hene, son ny ourallyn-losht, ta shen, son ny ourallyn-losht moghrey as fastyr, as ourallyn-losht y doonaght, as er yn eayst-noa, as er ny feaillaghyn elley, myr te scruit ayns leigh’n Chiarn. 4Marish shoh, doardee eh da cummaltee Yerusalem, dy choyrt da ny saggyrtyn, as ny Leviteyn nyn gair, dy niartaghey ad ayns shirveish y Chiarn.

5As cha leah’s haink y sarey magh, hug cloan Israel lhieu ayns palchey ny chied-vessyn jeh’n arroo, feeyn, ooil, as mill, as jeh ooilley mess y vagher, as y jaghee jeh dy chooilley nhee hug ad lhieu stiagh ayns palchey. 6As cloan Israel as Yudah, va cummal ayns ard-valjyn Yudah, hug adsyn myrgeddin lhieu stiagh yn jaghee dy ghew as kirree, as jaghee yn chooid, v’er ny chasherickey da’n Chiarn nyn Yee, as ren ad stoyr jeu. 7’Sy trass vee ren ad toshiaght dy ghoaill stiagh ny stoyryn, as va ooilley sthie oc ’sy chiaghtoo vee. 8As tra haink Hezekiah as ny princeyn, as honnick ad ny tashtaghyn, vannee ad y Chiarn as e phobble Israel. 9Eisht ren Hezekiah briaght jeh ny saggyrtyn as ny Leviteyn, mychione ny tashtaghyn. 10As dreggyr Azariah ard-saggyrt thie Zadok eh, as dooyrt eh, Er-dyn traa ren y pobble toshiaght dy chur lhieu ny ourallyn stiagh ayns thie yn Chiarn, ta dy liooar er ve ain son beaghey, as nyn saie fooilliagh: son ta’n Chiarn er vannaghey e phobble; as shen ny ta faagit, yn stoyr mooar shoh.

11Eisht doardee Hezekiah dy chiartaghey shamyryn-stoyr ayns thie yn Chiarn, as hooar ad aarloo ad. 12As hug ad lhieu stiagh ny ourallyn as ny jagheenyn, as y chooid chasherick ayns coontey kiart: yn currym oc va er Cononiah yn Levite, as er Shimei e vraar fo; 13As va Jehiel, as Azaziah, as Nahath, as Asahel, as Jerimoth, as Jozabad, as Eliel, as Ismachiah, as Mahath, as Benaiah, nyn stiurtyn fo Cononiah, as Shimei e vraar, lurg sarey Hezekiah yn ree, as Azariah ard-saggyrt thie Yee. 14As va Kore mac Imnah yn Levite porter y yiat har, harrish ourallyn-arryltagh Yee, dy rheynn chebballyn y Chiarn, as ny reddyn smoo casherick. 15As by-niessey dasyn va Eden, as Benjamin, as Jeshua, as Shemaiah, Amariah, as Shecaniah, ayns ard-valjyn ny saggyrtyn, ayns nyn oik, dy hirveish er nyn mraaraghyn, myr va nyn goorse, chammah da shenn as aeg. 16Er-lhimmey jeh ny mec, veih three bleeaney d’eash as erskyn, eer da dagh unnane ta goll stiagh ayns thie yn Chiarn, e ayrn gagh-laa son y chirveish oc ayns nyn gurrym, rere nyn goorseyn: 17Chammah da sluight ny saggyrtyn, rere thie nyn ayraghyn, as da ny Leviteyn seose veih feed bleïn d’eash, ayns nyn gurmyn myr va nyn goorse cheet magh: 18As da slane sheshaght nyn vooinjer veggey, nyn mraane, nyn mec, as nyn inneenyn: son ren ny fir-oik nyn gurmyn y chooilleeney ayns ynrickys. 19Myrgeddin jeh mec Aaron ny saggyrtyn va cummal ayns thalloo ny gleebyn mysh dagh ard-valley, va deiney enmyssit, dy hirveish nyn meaghey da ooilley mec ny saggyrtyn, as da ooilley ny va jeh kynney ny Leviteyn.

20As shoh myr ren Hezekiah trooid ooilley Judah: as ren eh shen ny va mie as cairagh, as ynrick fenish y Chiarn e Yee. 21As ayns dy chooilley obbyr ghow eh ayns laue dy yannoo ayns shirveish thie Yee, as cordail rish y leigh, as ny annaghyn, dy hirrey e Yee, shen ren eh lesh ooilley e chree, as haink eh lesh myrgeddin.