CAB. XXXII

1Lurg da ny reddyn shoh ve soit magh, haink Sennacherib ree Assyria, as hie eh stiagh er Judah, as ren eh campal noi ny ard-valjyn voallit er-chee dy chosney ad da hene. 2As tra honnick Hezekiah dy row Sennacherib er jeet seose, as dy row eh kiarit dy chaggey noi Jerusalem. 3Ghow eh coyrle jeh e phrinceyn, as e gheiney niartal, dy yeigh seose ushtaghyn ny farraneyn, va cheu-mooie jeh’n ard-valley: as ren ad cooney lesh. 4Er shoh va ymmodee sleih er nyn jaglym cooidjagh, yeigh seose ooilley ny farraneyn, as y trooan va roie trooid mean y cheerey, gra, Cre’n-fa aagys shin vondeish yn ushtey shoh da reeaghyn Assyria, tra hig ad? 5Myrgeddin, ren eh eh-hene y niartaghey, as hrog eh ooilley yn voalley va brisht, as hrog eh seose eh gys ny tooryn, as voalley elley er cheu-mooie, as ren eh Millo ayns ard-valley Ghavid y yannoo ny s’troshey, as hooar eh aarloo ymmodee shleiyghyn as scapeyn. 6As phoint eh captanyn-caggee harrish y pobble, as haggil eh ad cooidjagh huggey ayns straid giat yn ard-valley, as loayr eh dy creeoil roo, gra, 7Bee-jee dunnal as jeh cree mie, gyn aggle ny atchim erriu roish ree Assyria, ny roish earroo mooar e heshaght-chaggee: son ny s’troshey t’adsyn ta lhien, na adsyn ta lhieusyn. 8Mârishyn ta niart y roih foalley, agh mârinyn ta’n Chiarn nyn Yee, dy chooney lhien, as dy chaggey ass nyn lieh. As hug y pobble nyn marrant er goan Hezekiah ree Yudah.

9Lurg shoh, hug Sennacherib ree Assyria e harvaantyn gys Jerusalem (agh v’eh hene er hoiaghey e champ noi Lachish, as ooilley e phooar-chaggee mârish) gys Hezekiah ree Yudah, as gys ooilley Judah, v’ec Jerusalem, gra, 10Myr shoh ta Sennacherib ree Assyria dy ghra, Quoi er ta shiu coyrt nyn marrant, dy vel shiu fuirriaght cruinnit seose ayns Jerusalem? 11Nagh vel Hezekiah dy nyn goyrlaghey dy livrey shiu hene seose dy gheddyn baase liorish genney as liorish paays, gra, Nee’n Chiarn y Jee ain livrey shin ass laue ree Assyria? 12Nagh nee shoh’n Hezekiah cheddin t’er ghoaill ersooyl ynnydyn ard as altaryn e Yee, as er harey Judah as Jerusalem, gra, Nee shiu ooashlaghey roish un altar, as incense y lostey er? 13Nagh vel fys eu cre ta mish as m’ayraghyn er n’yannoo rish ooilley pobble cheeraghyn elley? row fort edyr ec veg jeh jeeghyn ny ashoonyn shen dy livrey er aght erbee nyn jeeraghyn ass my laue’s? 14Quoi v’eh hene mastey ooilley jeeghyn ny ashoonyn shen, ren m’ayraghyn dy bollagh y stroie, va fort echey dy livrey e phobble ass my laue’s, dy beagh eh ayns pooar y Jee euish dy livrey shiuish ass my laue’s? 15Ny lhig da Hezekiah, er-y-fa shen, shiu y volley, ny y choyrlaghey shiu er yn aght shoh, chamoo cur-jee geill da: son cha row’n jee shen fud ashoon, ny reeriaght erbee abyl dy livrey e phobble ass my laue’s, ny ass laue m’ayraghyn: foddey sloo oddys y Jee euish shiuish y livrey ass my laue’s? 16As loayr e harvaantyn shoh, as foddey smoo noi’n Chiarn Jee, as noi e harvaant Hezekiah. 17Hug eh screeunyn myrgeddin dy oltooaney’n Chiarn, Jee Israel, as dy loayrt n’oï, gra, Myr nagh vel ny jeeghyn ny cheeraghyn elley er livrey nyn bobble ass my laue’s, chamoo nee Jee Hezekiah e phobble y livrey ass my laue’s. 18Eisht deïe ad lesh coraa ard, ayns glare ny Hewnyn, gys pobble Yerusalem v’er y voalley, dy agglaghey, as dy voirey ad, dy voddagh ad yn ard-valley y ghoaill. 19As loayr ad noi Jee Yerusalem, myr noi jeeghyn dy chooilley phobble elley, va obbyr laueyn dooinney. 20As son yn oyr shoh, ren Hezekiah y ree, as y phadeyr Isaiah mac Amoz, padjer y ghoaill, as troggal seose nyn goraa gys niau.

21As hug y Chiarn magh ainle ren stroie ooilley ny deiney niartal caggee, as ny leeideilee as ny captanyn, ayns camp ree Assyria: myr shen hyndaa eh reesht lesh nearey eddin gys e heer hene. As tra v’eh er jeet stiagh ayns thie e Yee, ren adsyn haink magh ass e veeghyn, y varroo eh ayns shen lesh y chliwe. 22Myr shoh ren y Chiarn coadey Hezekiah, as cummaltee Yerusalem, veih laue Sennacherib ree Assyria, as veih laue dy chooilley noid elley, as hug eh daue shee er dy chooilley heu. 23As hug ymmodee lhieu ourallyn gys y Chiarn gys Jerusalem, as giootyn gys Hezekiah ree Yudah: myr shen dy row ard-soiagh jeant jeh ayns shilley dy chooilley ashoon, veih’n traa shen magh.

24Lurg ny laghyn shoh va Hezekiah ching as raad y vaaish, as ghow eh padjer gys y Chiarn: as cheayll Jee eh, as hug eh cowrey da. 25Agh cha row Hezekiah booisal corrym rish y bannaght v’er ny hoilshaghey: son va e chree troggit seose; shen-y-fa haink magh jymmoose n’oï hene as noi Judah as Jerusalem. 26Ny-yeih, ren Hezekiah eh-hene y injillaghey son mooaralys e chree (chammah eh-hene, as cummaltee Yerusalem) myr shen nagh ren corree’n Chiarn brishey magh orroo rish lhing Hezekiah.

27As va Hezekiah erskyn-towse berchagh as onnoroil: as ren eh thieyn-stoyr son argid, as son airh, as son claghyn costal, as son spiceyn, as son eilley-caggee, as son dy chooilley horch dy yewellyn aalin; 28Thieyn-tashtee myrgeddin son mess yn arroo, feeyn, as ooil: as stabyllyn son dy chooilley cheint dy veïyn, as bwaneyn son shioltaneyn. 29Marish shoh hrog eh da hene ard-valjyn, as va echey ymmodee shioltaneyn, as shellooyn ayns palchey: son va Jee er choyrt da ymmodee cooid-seihlt. 30Shoh’n Hezekiah cheddin yeigh seose coorse-ushtey Ghihon heose, as hug eh chyndaa da jeeragh sheese cheu-heear dy ard-valley Ghavid. As haink ooilley obbraghyn Hezekiah lesh dy mie. 31Ny-yeih, ayns cooish princeyn Vabylon, haink er chaghteraght huggey dy vriaght mychione y cowrey mirrilagh va jeant ’sy cheer, daag Jee eh da hene dy phrowal eh, as dy choyrt toiggal da jeh annooinid e chree hene.

32Nish y chooid elley dy obbraghyn Hezekiah, as ny ren eh dy vieys, cur-my-ner, t’ad scruit ayns ashlish Isaiah yn phadeyr, mac Amoz, as ayns lioar reeaghyn Yudah as Israel. 33As chaddil Hezekiah marish e ayraghyn, as doanluck ad eh ayns y reih jeh oaiaghyn mec Ghavid: as ren ooilley Judah as cummaltee Yerusalem oanluckey onnoroil er e hon: as ren Manasseh e vac reill ayns e ynnyd.