CAB. XXXIII

1Va Manasseh daa vleïn jeig d’eash tra ren eh toshiaght dy reill, as ren eh reill queig bleeaney jeig as da-eed ayns Jerusalem: 2Agh ren eh shen ny va olk ayns shilley’n Chiarn, lurg peccaghyn dwoaiagh ny ashoonee, va’n Chiarn er n’eiyrt magh roish cloan Israel.

3Son hrog eh reesht ny ard-ynnydyn va Hezekiah e ayr er lhieggal, as hrog eh altaryn son Baalim, as ayns ny keylljyn, hug eh ooashley da ooilley pooaraghyn yn aer, as hirveish eh ad. 4Myrgeddin hrog eh altaryn ayns thie’n Chiarn, my-e-chione va’n Chiarn er ghra, Ayns Jerusalem bee m’ennym’s son dy bragh. 5As hrog eh altaryn son ooilley pooaraghyn yn aer, ayns daa chooyrt thie’n Chiarn. 6As hug eh er e chloan dy gholl trooid yn aile, ayns coan mac Hinnom: myrgeddin hug eh geill da traaghyn, as deiyr eh er obbeeys, as chliaghtee eh buitcheraght, as ren eh dellal rish spyrrydyn faishnee, as rish fir-obbee: dobbree eh shen ny va olk ayns shilley yn Chiarn, dy vrasnaghey eh gys corree. 7As hoie eh seose jalloo grainnit (yn jalloo v’eh er n’yannoo) ayns thie Yee, my-e-chione va Jee er ghra rish David, as rish Solomon e vac, ’Sy thie shoh, as ayns Jerusalem, ta mee er reih roish ooilley tribeyn Israel, ver-ym’s m’ennym son dy bragh. 8Chamoo nee’m arragh cass Israel y scughey ass y cheer ta mee er phointeil da nyn ayraghyn; my she shen dy gow ad tastey dy yannoo ooilley ny ta mish er harey daue, cordail rish y slane leigh, as ny slattyssyn, as ny oardaghyn liorish laue Voses. 9Myr shoh hug Manasseh Judah as cummaltee Yerusalem er-shaghryn, as dy yannoo ny smessey na ny ashoonee, va’n Chiarn er stroie roish cloan Israel. 10As loayr y Chiarn rish Manasseh, as rish e phobble: agh cha jinnagh ad geaishtagh.

11Shen-y-fa hug y Chiarn lesh orroo captanyn sheshaght-caggee ree Assyria, haare Manasseh mastey ny drineyn, as chiangle ad eh lesh geulaghyn, as hug ad lhieu eh gys Babylon. 12As tra v’eh ayns seaghyn, ren eh aghin gys y Chiarn e Yee, as ren eh eh-hene y injillaghey dy mooar kiongoyrt rish Jee e ayraghyn. 13As ghow eh padjer huggey, as hooar eh e aghin, as deaisht eh rish e accan, as hug eh lesh eh reesht gys Jerusalem gys e reeriaght hene. Eisht hoig Manasseh dy nee’n Chiarn va yn Jee. 14Nish lurg shoh, hrog eh voalley er cheu-mooie jeh ard-valley Ghavid, er cheu-heear Ghihon, ’sy choan, eer gys entreil y yiat-eeastee, as ghow eh stiagh Ophel, as hrog eh eh gys yrjid feer vooar, as hug eh captanyn-caggee ayns ooilley ard-valjyn voallit Yudah. 15As ghow eh ersooyl ny jeeghyn joarree, as y jalloo ass thie’n Chiarn, as ooilley ny altaryn v’eh er hroggal ayns cronk thie’n Chiarn, as ayns Jerusalem, as hilg eh ad magh ass yn ard-valley. 16As ren eh altar y Chiarn y choamrey, as heb eh er ourallyn-shee, as ourallyn-booise, as doardee eh Judah dy hirveish yn Chiarn Jee Israel. 17Ny-yeih, ren y pobble foast ouralley ayns ny ard-ynnydyn: agh ve gys y Chiarn yn Jee oc hene ny-lomarcan.

18Nish son y chooid elley jeh obbraghyn Vanasseh, as e phadjer gys Jee, as goan ny ashleyderyn loayr rish ayns ennym y Chiarn Jee Israel, cur-my-ner, t’ad scruit ayns lioar reeaghyn Israel. 19E phadjer myrgeddin, as kys va myghin ec Jee er, as ooilley e pheccah, as e loght, as ny ard-ynnydyn hrog eh, as ny keylljyn, as ny jallooyn grainnit v’echey roish e arrys: cur-my-ner t’ad scruit mastey raaghyn ny ashleyderyn.

20Myr shoh chaddil Manasseh marish e ayraghyn, as doanluck ad eh ’sy hie hene: as ren Amon e vac reill ayns e ynnyd.

21Va Amon daa vleïn as feed d’eash tra ren eh toshiaght dy reill, as ren eh reill daa vleïn ayns Jerusalem. 22Agh ren eh shen ny va olk ayns shilley’n Chiarn, myr ren Manasseh e ayr: son ren Amon oural da ooilley ny jallooyn grainnit, va Manasseh e ayr er n’yannoo, as hirveish eh ad. 23As cha ren eh eh-hene y injillaghey kiongoyrt rish y Chiarn, myr va Manasseh e ayr er n’yannoo; agh hie Amon er e hoshiaght ny smessey ass ny smessey. 24As dirree e harvaantyn magh n’oï, as varr ad eh ayns e hie hene.

25Agh hug pobble y cheer gy-baase adsyn ooilley v’er n’irree-magh noi ree Amon, as ren ad e vac Josiah ny ree ayns e ynnyd.