CAB. XXXIV

1Va Josiah hoght bleeaney d’eash tra ghow eh toshiaght dy reill, as ren eh reill ayns Jerusalem un vleïn jeig as feed. 2As ren eh shen ny va cairagh ayns shilley’n Chiarn, as jimmee eh ayns raaidyn Ghavid e ayr, chamoo ren eh leaystey gys y laue yesh ny gys y laue hoshtal.

3Son ayns y hoghtoo vleïn jeh e reill, choud’s v’eh foast aeg, v’eh aggindagh dy hirveish Jee Ghavid e ayr: as ’sy nah vleïn yeig ren eh toshiaght dy scughey ass Judah as Jerusalem ny ard-ynnydyn, as ny keylljyn, as ny jallooyn grainnit, as ny jallooyn lheït. 4As lhieg eh sheese altaryn Vaalim ayns e enish; as jallooyn ard ny greiney yiare eh sheese, as ny keylljyn, as ny jallooyn grainnit, as ny jallooyn lheït vrish eh ayns peeshyn, as ren eh joan jeu, as spreih eh eh er ny oaiaghyn ocsyn va shirveish ad. 5As losht eh craueyn ny saggyrtyn er nyn altaryn, as ren eh Judah as Jerusalem y ghlenney. 6As myr shoh ren eh ayns ard-valjyn Vanasseh, as Ephraim, as Simeon, eer gys Naphtali, lesh nyn oayrdyn ooilley mygeayrt. 7As tra v’eh er lhieggal sheese ny altaryn, as ny keylljyn, as er n’yannoo joan jeh ny jallooyn grainnit, as er yiarey sheese ooilley ny jallooyn trooid ooilley cheer Israel, haink eh reesht gys Jerusalem.

8Nish ’sy hoghtoo vleïn jeig jeh e reill, tra v’eh myr shoh er ghlenney’n cheer, as thie Yee, hug eh Shaphan mac Azaliah, as Maaseiah kiannoort yn ard-valley, as Joah mac Yoahaz cleragh ny recortyssyn, dy choamrey thie yn Chiarn e Yee. 9As tra haink ad gys Hilkiah yn ard-saggyrt, livrey ad yn argid va troggit ayns thie Yee, va ny Leviteyn, va currym ny dorryssyn orroo, er haglym veih laue Vanasseh as Ephraim, as veih’n chooid elley jeh fooilliagh Israel, as voish ooilley Judah, as Benjamin, as hyndaa ad reesht gys Jerusalem. 10As hug ad eh ayns laue ny oaseiryn va harrish obbyr thie’n Chiarn, dy eeck ny obbreeyn va coamrey as kerraghey’n thie. 11Eer da mainshtyryn-obbree, seiyr as masoonee hug ad eh, dy chionnaghey claghyn obbrit, as fuygh son cubbil, as son lout ny thieyn, va reeaghyn Yudah er stroie. 12As ren ny deiney yn obbyr dy firrinagh: as va ny oaseiryn v’orroo Jahath, as Obadiah, ny Leviteyn, jeh mec Merari; as Zechariah, as Meshullam, jeh mec ny Kohathiteyn, dy chur yn obbyr er y hoshiaght; as Leviteyn elley, schleioil er greinyn bingys. 13Va sooill oc myrgeddin orroosyn va gymmyrkey erraghyn as harrish ooilley shirveishee yn obbyr as jeh ny Leviteyn va scrudeyryn, as mainshtyryn-obbree, as porteryn.

14As tra hug ad lhieu magh yn argid hie er chaglym ayns thie yn Chiarn, hooar Hilkiah yn saggyrt lioar leigh’n Chiarn liorish Moses. 15As dansoor Hilkiah as dooyrt eh rish Shaphan yn scrudeyr, Ta mee er gheddyn lioar y leigh ayns thie’n Chiarn. As livrey Hilkiah yn lioar da Shaphan: 16As hug Shaphan lesh y lioar gys y ree, as dooyrt eh rish, Ta dty harvaantyn er chooilleeney ooilley ny doardee oo daue. 17As t’ad er choyrt cooidjagh yn argid hie er chaglym ayns thie’n Chiarn, as er livrey eh gys laue ny oaseiryn, as gys laue ny mainshtyryn-obbree. 18Eisht haink Shaphan yn scrudeyr, as dinsh eh da’n ree, gra, Ta Hilkiah yn saggyrt er choyrt lioar dou. As lhaih Shaphan eh ayns clashtyn y ree. 19As haink eh gy-kione, tra cheayll y ree goan y leigh, dy raip eh e choamraghyn. 20As doardee yn ree da Hilkiah, as da Ahikam mac Shaphan, as da Abdon mac Vicah, as da Shaphan yn scrudeyr, as da Asaiah fer-oik y ree, gra, 21Immee-jee, guee-jee gys y Chiarn er my hon’s, as er nyn son ocsyn ta faagit ayns Israel, as ayns Judah, er coontey goan y lioar, t’er ny gheddyn: son s’mooar ta jymmoose y Chiarn, t’er ny gheayrtey orrin, er-yn-oyr nagh vel nyn ayraghyn er vreayll goo’n Chiarn, cordail rish bree’n lioar shoh. 22As hie Hilkiah, as adsyn va’n ree er phointeil, gys Huldah yn phadeyr, ben Shallum mac Tikvath, mac Hasrah, va currym ny coamraghyn reeoil er; (nish v’ee cummal ayns Jerusalem ’sy chollege) as loayr ad ree mychione y chooish.

23As dansoor ee ad, Shoh myr ta’n Chiarn, Jee Israel dy ghra, Insh-jee da’n dooinney hug shiu er chaghteraght hym’s, 24Myr shoh ta’n Chiarn dy ghra, Cur-my-ner, Ver-yms lhiam olk er yn ynnyd shoh, as er e chummaltee, eer ooilley ny mollaghtyn ta scruit ’sy lioar t’ad er lhaih ayns clashtyn ree Yudah. 25Er-yn-oyr dy vel ad er my hreigeil, as er hebbal incense da jeeghyn joarree, dy my vrasnaghey gys corree lesh ooilley obbraghyn nyn laueyn; shen-y-fa bee my yymmoose er ny gheayrtey magh er yn ynnyd shoh; as cha bee eh er ny vooghey. 26As er son ree Yudah, hug shiuish hym’s dy vriaght jeh’n Chiarn, myr shoh jir shiu rishyn, Shoh myr ta’n Chiarn Jee Israel dy ghra mychione ny goan t’ou er chlashtyn, 27Er-yn-oyr dy row dty chree meiygh as dy ren oo oo-hene y injillaghey kiongoyrt rish Jee, tra cheayll oo e ghoan noi’n ynnyd shoh, as noi e chummaltee, as dy vel oo er injillaghey oo hene, as er raipey dty choamrey, as er ghobberan kiongoyrt rhym, ta mish myrgeddin er choyrt clashtyn dhyt, ta’n Chiarn dy ghra, 28Cur-my-ner, neem’s oo y haglym gys dt’ayraghyn, as bee oo ec fea ayns dt’oaie, chamoo nee dty hooillyn fakin ooilley’n olk ver-yms lhiam er yn ynnyd shoh, as er e chummaltee. As hoilshee ad ny goan shoh da’n ree.

29Eisht hug yn ree fys, as haggil eh cooidjagh ooilley shanstyr Yudah as Yerusalem. 30As hie yn ree seose gys thie’n Chiarn, as ooilley deiney Yudah, as cummaltee Yerusalem, as ny saggyrtyn, as ny Leviteyn, as ooilley’n pobble mooar as beg: as lhaih eh ’sy chlashtyn oc ooilley goan lioar y chonaant, va er ny gheddyn ayns thie’n Chiarn. 31As hass y ree ayns e ynnyd, as ren eh conaant fenish y Chiarn, dy immeeaght lurg y Chiarn, as dy reayll e annaghyn, as e recortyssyn, as e lattyssyn lesh ooilley e chree, as lesh ooilley e annym, dy chooilleeney goan y chonaant ta scruit ’sy lioar shoh. 32As hug eh er ooilley ny va kionfenish ayns Jerusalem as Benjamin, dy hassoo huggey. As ren cummaltee Yerusalem cordail rish conaant Yee, Jee nyn ayraghyn. 33As ghow Josiah ersooyl ooilley ny jallooyn ass ooilley ny cheeraghyn va lesh cloan Israel, as hug eh er ooilley ny va kionfenish ayns Israel dy hirveish, eer dy hirveish yn Chiarn nyn Yee. As rish y slane lhing echeysyn, cha hreig ad y Chiarn, Jee nyn ayraghyn.