CAB. XXXV

1Eisht dreill Josiah caisht da’n Chiarn ayns Jerusalem: as daarlee ad yn eayn-caisht er y chiarroo laa yeig jeh’n chied vee. 2As hoie ny saggyrtyn ayns nyn goorseyn, as ghreinnee eh ad dy ve creeoil ayns shirveish thie’n Chiarn. 3As dooyrt eh rish ny Leviteyn, dynsee ooilley Israel, kys v’ad dy chasherickey ad hene gys y Chiarn, Cur-jee yn arg casherick ayns y thie, ren Solomon mac Ghavid ree Israel y hroggal: nagh beagh eh ny errey er nyn geayltyn: ta shiu nish dy yannoo shirveish elley da’n Chiarn nyn Yee, as da e phobble Israel, 4As bee-jee aarloo rere thieyn nyn ayraghyn, lurg nyn goorseyn, cordail rish oardagh Ghavid ree Israel, as oardagh scruit Solomon e vac, 5As shass-jee gys shirveish yn ynnyd casherick cordail rish thie ayraghyn kynney nyn bobble, as myr va thieyn ny Leviteyn er nyn rheynn. 6Eisht marr-jee yn eayn-caisht, as jean-jee shiu hene y chasherickey, as cur-jee roish nyn mraaraghyn, dy yannoo cordail rish goo’n Chiarn, fo laue Voses. 7As hug Josiah da ooilley’n pobble va kionfenish, eayin as mannanyn veih’n chioltane son ooilley ny ourallyn-caisht, choud’s jeih thousaneyn as feed, marish three thousane dow: v’ad shoh jeh cooid y ree. 8As hug e phrinceyn dy arryltagh da’n pobble, da ny saggyrtyn as da ny Leviteyn: hug Hilkiah as Zechariah, as Jehiel, fir-reill thie Yee, da ny saggyrtyn son ny ourallyn-caisht, daa housane as shey cheead eayin as mannanyn, as three cheead dow. 9Hug Conaniah myrgeddin, as Shemaiah, as Nethaneel, e vraaraghyn, as Hashabiah, as Jeiel, as Jozabad, ny ard Leviteyn, da ny Leviteyn son ourallyn-caisht, queig thousaneyn eayin as mannanyn, as queig cheead dow. 10Shoh myr va’n chirveish er ny oardaghey, as hass ny saggyrtyn ayns nyn ynnyd, as ny Leviteyn ayns nyn goorseyn cordail rish sarey’n ree. 11As daarlee ad ny eayin-caisht, as spreih ny saggyrtyn yn uill veih nyn laueyn, as ren ny Leviteyn fanney ad. 12As hug ad dy lhiattee shen ny va gour ny ourallyn-losht, dy voddagh ad rheynn er y pobble, cordail rish nyn lught-thie, shen ny va bentyn dauesyn [eayn son dagh thie] dy hebbal gys y Chiarn, myr te scruit ayns lioar Voses: as shen myr ren ad rish ny dew. 13As ren ad ny eayin-caisht y roastey lesh aile, cordail rish yn oardagh: agh ny chebballyn casherick elley vroie ad ayns pooiyt, as coirraghyn, as pannaghyn, as v’ad er ny hirveish chelleeragh mastey ooilley’n pobble. 14As ny lurg shen, daarlee ad er nyn son hene, as son ny saggyrtyn: er-y-fa dy row ny saggyrtyn mec Aaron preishal ayns chebbal ny ourallyn-losht, as yn eeh derrey’n astyr; shen-y-fa ren ny Leviteyn gaarlaghey daue hene as da ny saggyrtyn mec Aaron. 15As va ny arranee mec Asaph ayns nyn ynnyd hene, cordail rish sarey Ghavid, as Asaph, as Heman, as Jeduthun ashleyder y ree; as ren ny porteryn tendeil ec dagh giat; cha beign daue nyn gurrym y aagail; son ren nyn mraaraghyn ny Leviteyn kiarail nyn gour. 16Myr shen va slane shirveish y Chiarn er ny gheddyn aarloo yn laa cheddin, dy reayll yn chaisht as dy hebbal ourallyn-losht er altar y Chiarn, cordail rish sarey ree Josiah. 17As dreill cloan Israel va kionfenish yn chaisht ec y traa shen, as feailley yn arran-millish shiaght laa. 18As cha row caisht erbee er ny reayll goll-rish shen ayns Israel, er-dy laghyn Samuel y phadeyr, chamoo ren ooilley reeaghyn Israel freayll lheid y chaisht as dreill Josiah, as ny saggyrtyn, as ny Leviteyn, as ooilley Judah as Israel va kionfenish, marish cummaltee Yerusalem. 19’Sy hoghtoo vleïn jeig jeh reill Yosiah, va’n chaisht shoh er ny reayll.

20Lurg ooilley shoh, tra va Josiah dy slane er choamrey’n chiamble haink Necho ree Egypt seose dy chaggey noi Carchemish liorish Euphrates: as hie Josiah magh n’oï. 21Agh hug eh chaghteryn reeoil huggey, gra, Cre’n eïe t’ad orrym, uss ree Yudah? Cha nee dt’oï’s ta mee er jeet magh jiu, agh noi’n thie ta mee er chaggey rish: son doardee, Jee dou siyr y yannoo: ny gow ort dy lhiettal obbyr Yee, ta mârym’s, nagh stroie eshyn oo. 22Ny-yeih cha jinnagh Josiah e eddin y hyndaa voish, agh hug eh er cummey elley dy chaggey rish, as cha deaisht eh rish goan Necho veih beeal Yee, as haink eh dy chaggey ayns coan Vegiddo. 23As lhig ny sideyryn er ree Josiah; as dooyrt y ree rish e harvaantyn, Gow-jee mee ersooyl, son ta mee guint gy-baase. 24Hrog e harvaantyn eh, er-y-fa shen, ass yn ainagh shen, as hug ad eh ayns e nah ainagh share; as hug ad lhieu eh gys Jerusalem, raad hooar eh baase, as hie eh er oanluckey ayns unnane jeh oaiaghyn e ayrey: as ren ooilley Judah as Jerusalem dobberan son Josiah.

25As ren Jeremiah dobberan son Josiah, as ren ooilley ny arranee chammah deiney as mraane gimraa er Josiah ayns nyn gronneeaght trimshagh gys y traa t’ayn, as va shoh son oardagh ayns Israel: as cur-my-ner, t’ad scruit ayns lioar y dobberan. 26Nish y chooid elley dy obbraghyn Yosiah, as e vieys, cordail rish shen ny va scruit ayns leigh yn Chiarn, 27As e obbraghyn, toshiaght as jerrey, cur-my-ner, t’ad scruit ayns lioar reeaghyn Israel as Yudah.