CAB. XXXVI

1Eisht ghow pobble y cheer Jehoahaz mac Yosiah, as ren ad eh ny ree ayns ynnyd e ayr, ayns Jerusalem. 2Va Jehoahaz three bleeaney as feed d’eash tra ghow eh toshiaght dy reill, as ren eh reill three meeaghyn ayns Jerusalem. 3As scugh ree Egypt sheese eh veih reill ayns Jerusalem, as hug eh yn cheer fo keesh dy cheead talent dy argid as talent dy airh. 4As ren ree Egypt Eliakim e vraar yn ree harrish Judah as Jerusalem, as chaghlaa eh e ennym gys Jehoiakim. As ghow Necho Jehoahaz e vraar, as hug eh lesh eh gys Egypt.

5Va Jehoiakim queig bleeaney as feed d’eash tra ren eh toshiaght dy reill, as ren eh reill un vleïn jeig ayns Jerusalem: as ren eh shen ny va olk ayns shilley’n Chiarn e Yee. 6N’oï haink seose Nebuchadnezzar ree Vabylon, as chiangle eh eh ayns geulaghyn, dy choyrt lesh eh gys Babylon. 7Hug Nebuchadnezzar lesh myrgeddin siyn casherick thie’n Chiarn gys Babylon, as hug eh ad ayns e hiamble hene ec Babylon. 8Nish son y chooid elley dy obbraghyn Yehoiakim, as ny jallooyn ren eh, as ooilley e ghrogh-yannoo, cur-my-ner, t’ad scruit ayns lioar reeaghyn Israel as Yudah: as ren Jehoiachin e vac reill ayns e ynnyd.

9Va Jehoiachin hoght bleeaney jeig d’eash tra ren eh toshiaght dy reill, as ren eh reill three meeaghyn as jeih laa ayns Jerusalem, as ren eh shen ny va olk ayns shilley’n Chiarn. 10As ec kione ny bleeaney, hug ree Nebuchadnezzar fys, as hug eh lesh eh gys Babylon, marish siyn aalin thie’n Chiarn, as ren eh Zedekiah e vraar ny ree harrish Judah as Jerusalem.

11Va Zedekiah un vleïn as feed d’eash tra ghow eh toshiaght dy reill, as ren eh reill un vleïn jeig ayns Jerusalem. 12As ren eh shen ny va olk ayns shilley’n Chiarn e Yee, as cha ren eh eh-hene y injillaghey kiongoyrt rish Jeremiah yn phadeyr, va loayrt veih beeal y Chiarn. 13As dirree eh magh myrgeddin noi ree Nebuchadnezzar, hug eh fo kiangley loo liorish Jee: agh v’eh creoi-wannallagh, as ard-chreeagh noi chyndaa gys y Chiarn Jee Israel.

14Marish shoh, hie ooilley ny ard-gheiney, as ny saggyrtyn dy mooar er-shaghryn, lurg ooilley drogh chliaghtaghyn ny ashoonee, as ren ad thie’n Chiarn, v’eshyn er ny chasherickey ayns Jerusalem, y yannoo an-chasherick. 15As hug y Chiarn Jee nyn ayraghyn huc e haghteryn, coyrlaghey ad dy kinjagh as dy kiaralagh; son dy row chymmey echey er e phobble, as er e chummal chasherick. 16Agh ren ad gannidys er chaghteryn Yee, as hoie ad beg jeh e ghoan, as hug ad drogh ghellal da e adeyryn derrey va jymmoose y Chiarn er ny vrasnaghey noi e phobble, nagh row saase nyn gour. 17Shen-y-fa hug eh lesh orroo ree ny Caldeanee, ren ny deiney aegey oc y varroo lesh y chliwe, ’sy chiamble casherick, as cha row chymmey erbee oc er dooinney aeg, ny moidyn, er shenn ghooinney, ny ersyn va croymmey lesh eash: livrey eh ad ooilley gys e laue. 18As ooilley siyn thie Yee, mooar as beg, as tashtaghyn thie’n Chiarn, as tashtaghyn y ree, as e phrinceyn; ad shoh ooilley hug eh lesh gys Babylon. 19As losht ad thie Yee, as vrish ad sheese voalley Yerusalem, as losht ad ooilley e phlaaseyn lesh aile, as spooill ad ooilley ny siyn aalin. 20As adsyn v’er scapail veih’n chliwe, hug eh lesh ersooyl gys Babylon: raad v’ad ayns bondiaght da hene as da e vec, derrey reill ree Phersia. 21Dy chooilleeney goo’n Chiarn liorish beeal Yeremiah, derrey va’n thalloo er gheddyn fea e dooneeyn: son choud’s v’ee ny lhie follym-faase dreill ee doonaght, dy yannoo magh three-feed as jeih bleeaney.

22Nish ’sy chied vleïn jeh Cyrus ree Phersia (dy voddagh goo’n Chiarn hie er loayrt liorish beeal Yeremiah ve cooilleenit) ren y Chiarn greinnaghey spyrryd Cyrus ree Phersia, dy dug eh magh sarey scruit trooid ooilley e reeriaght, gra, 23Myr shoh ta Cyrus ree Phersia dy ghra, Ta’n Chiarn, Jee niau, er choyrt dooys ooilley reeriaghtyn y theihll, as t’eh er my harey dy hroggal thie da ayns Jerusalem, ta ayns Judah: quoi ny mast’ eu ta er-mayrn jeh ooilley e phobble? dy bee’n Chiarn e Yee mârish, as lhig da goll seose.