CAB. IV

1Ren eh myrgeddin, altar prashey, feed cubit er lhiurid, as feed cubit er lheead, as jeih er yrjid.

2Ren eh myrgeddin keayn lheït jeh jeih cubityn, veih oirr gy oirr, runt ayns combaase, as queig cubityn er yrjid, as va’n slane combaase echey jeih cubityn as feed. 3As fo va caslys dew, va ooilley mygeayrt-y-mysh: ayns combaase va’n keayn jeih cubityn veih ooir gy oirr: hie daa roa dy ghew er lheïe, tra hie eh er lheïe. 4Ve soit er daa ghow jeig, three jeeaghyn lesh y twoaie, as three lesh y sheear, as three lesh y jiass, as three lesh y shiar: as va’n keayn soit er y dreeym oc, as va ooilley’n lieh jerree oc sthie fo e vean. 5As va’n cheeid echey lheead-bass, as yn oirr goll-rish obbyr oirr cappan, myr lileeyn foshlit; as ve goaill as cummal three thousane bath.

6Ren eh myrgeddin jeih tubbyryn, as hug eh queig er y laue yesh, as queig er y laue chiare, ry-hoi niee ayndoo: lheid ny reddyn as v’ad dy hebbal son yn oural-losht, v’ad niee ayndoo; agh va’n keayn gour ny saggyrtyn dy niee ayn. 7As ren eh jeih kainlereyn airhey lurg nyn gummey, as hoie eh ad ’sy chiamble, queig er y laue yesh, as queig er y laue chiare. 8Ren eh myrgeddin jeih buird, as hoie eh ad ’sy chiamble, queig er y cheu yesh, as queig er y cheu chiare: as ren eh keead bason dy airh.

9Ren eh, myrgeddin, cooyrt ny saggyrtyn, as y chooyrt vooar, as dorryssyn ny cooyrtey, as choodee eh ny coollaghyn oc harrish lesh prash. 10As hoie eh yn keayn er cheu yesh y chione har, lesh y jiass. 11As ren Huram ny coirraghyn, as ny sleaystyn aile, as ny basonyn, as hug Huram kione er yn obbyr v’echey dy yannoo da ree Solomon, son thie Yee. 12Ta shen, yn daa phillar, as ny booghyn, as ny atteeyn v’er kione y daa phillar, as yn daa chassey dy choodaghey’n daa cheeill ny atteeyn v’er kione ny pillaryn: 13As kiare cheead pomegranate er y daa obbyr cast; daa roa dy phomegranateyn er dagh cassey, dy choodaghey daa voogh ny atteeyn v’er ny pillaryn. 14Ren eh, myrgeddin, stuill; as hoie eh tubbyryn er ny stuill, 15Un cheayn, as y daa ghow jeig fo: 16Ny coirraghyn myrgeddin as ny sleaystyn aile, as ny aalyn, as ooilley ny greinyn oc, ren Huram e ayr y yannoo da ree Solomon son thie yn Chiarn dy phrash sollys. 17Ayns thalloo-rea Yordan ren y ree ad y lheïe, ’sy thalloo craie eddyr Succoth as Zeredathah. 18Shoh myr ren Solomon palchey vooar jeh ooilley ny siyn shoh: son va towse y phrash erskyn coontey.

19As ren Solomon ooilley ny siyn va son thie Yee, yn altar airh myrgeddin, as ny buird orroo va’n arran casherick soit; 20Ny kainlereyn neesht jeh glen airh lesh nyn lampyn dy lossey, lurg yn oardagh, roish yn ynnyd casherick: 21As ny blaaghyn, as ny lampyn, as ny cloughyn airhey, ad shoh ooilley jeh’n airh s’glenney. 22As ny smalyderyn, as ny basonyn, as ny spainyn, as ny censeryn, dy airh ghlen: as jeushanyn dorrys yn ynnyd smoo casherick er cheu-sthie, as dorryssyn thie yn chiamble, v’ad jeant dy airh.