CAB. V

1Myr shoh hug Solomon mullagh er ooilley’n obbyr v’eh er n’yannoo son thie yn Chiarn: as hug Solomon lesh stiagh ooilley ny reddyn va David e ayr er chasherickey: yn argid, as yn airh, as ooilley ny siyn, hug eh mastey tashtaghyn thie Yee.

2Eisht haggil Solomon cooidjagh shanstyr Israel, as ooilley king ny tribeyn, ard-gheiney ayraghyn cloan Israel gys Jerusalem, dy chur lhieu seose arg conaant y Chiarn, ass ard-valley Ghavid, ta shen Zion. 3Shen-y-fa, haggil ooilley deiney Israel ad-hene cooidjagh gys y ree, er y feailley, va ayns y chiaghtoo vee. 4As haink ooilley shanstyr Israel, as hrog ny Leviteyn seose yn arg. 5As hug ad lhieu seose yn arg, as y cabbane-agglish, as ooilley ny siyn casherick va ’sy chabbane, ad shoh hug ny saggyrtyn as ny Leviteyn lhieu seose. 6Myrgeddin, ren ree Solomon as ooilley sheshaght Israel v’er nyn jaglym cooidjagh huggey kiongoyrt rish yn arg, dew as kirree y hebbal son oural, nagh voddagh ve coontit, v’ad whilleen ayns earroo. 7As hug ny saggyrtyn lhieu stiagh arg conaant y Chiarn gys e ynnyd, eer gys ynnyd smoo casherick y thie; ta shen, fo skianyn ny cherubim. 8Son ren ny cherubim nyn skianyn y skeayley magh harrish ynnyd yn arg, as ren ny cherubim yn arg as ny looghyn mullee echey y choodaghey. 9As hayrn ad magh looghyn yn arg, dy row king ny looghyn ry-akin veih’n arg cheu-sthie roish yn ynnyd casherick, agh cha row ad ry-akin cheu-mooie. As shen y raad t’ad gys y laa t’ayn jiu. 10Cha row nhee erbee ’syn arg agh y daa voayrd hug Moses ayn ec Horeb, raad ren y Chiarn conaant rish cloan Israel, tra haink ad magh ass Egypt.

11As haink eh gy-kione, tra va ny saggyrtyn er jeet magh ass yn ynnyd casherick (son va ooilley ny saggyrtyn va kionfenish er nyn gasherickey, as cha ren ad eisht shirveish ayns nyn goorse. 12Myrgeddin, ny Leviteyn, ny kiaulleyderyn, va fo Asaph, fo Heman, as Jeduthun, marish nyn mec, as nyn mraaraghyn, coamrit ayns aanrit gial lesh nyn cymballyn, as psaltereeyn, as claasaghyn, hass ad ec kione har yn altar, as mâroo shey-feed saggyrt, sheidey lesh trumpetyn). 13Haink eh eer gy-kione, myr va ny trumpeteryn hellym lesh cayrnyn, as ny fir-chiaullee goll lesh y cheilley ’syn un chiaull, ayns coyrt moylley as booise da’n Chiarn; as myr v’ad troggal seose nyn goraa dy ard lesh ny trumpetyn, as ny cymballyn, as ny greinyn bingys, as coyrt ard-voylley da’n Chiarn, gra, Son t’eshyn mie, son ta e vyghin farraghtyn son dy bragh: dy row eisht yn thie, eer thie’n Chiarn, er ny lhieeney lesh bodjal; 14Myr shen nagh voddagh ny saggyrtyn shassoo dy hirveish, kyndagh rish y vodjal: son va gloyr y Chiarn er lhieeney thie Yee.