CAB. VI

1Eisht dooyrt Solomon, Ta’n Chiarn er ghra, dy jinnagh eh cummal ’sy dorraghys dowin. 2Agh ta mish er hroggal thie er dty hon, as ynnyd son dty chummal kinjagh. 3As hyndaa y ree e eddin, as vannee eh yn slane chaglym-cooidjagh Israel: (as hass ooilley pobble Israel seose). 4As dooyrt eh, Bannit dy row’n Chiarn Jee Israel, ta lesh e laueyn er chooilleeney shen ny loayr eh lesh e veeal rish m’ayr David, gra, 5Er-dyn laa hug mee lhiam magh my phobble ass cheer Egypt, cha reih mee ard-valley erbee mastey ooilley tribeyn Israel, dy hroggal thie ayn, son m’ennym dy ve ayns shen; chamoo reih mee dooinney erbee dy ve my er-reill harrish my phobble Israel: 6Agh ta mee er reih Jerusalem, dy vod m’ennym ve ayns shen, as er reih David dy ve harrish my phobble Israel. 7Nish ve ayns cree Ghavid m’ayr dy hroggal thie son ennym y Chiarn Jee Israel. 8As dooyrt y Chiarn rish m’ayr David. Son wheesh as dy row eh ayns dty chree dy hroggal thie son m’ennym’s, ren oo dy mie dy row shen ayns dty chree: 9Ny-yeih, cha nee uss hroggys y thie, agh dty vac hig jeed, eshyn nee’n thie y hroggal son m’ennym. 10Ta’n Chiarn er-y-fa shen er chooilleeney e ghoo ren eh loayrt: son ta mish er n’irree seose ayns ynnyd Ghavid m’ayr, as soie er stoyl-reeoil Israel, myr yiall y Chiarn, as er hroggal y thie son ennym y Chiarn Jee Israel. 11As shen y raad ta mee er hoiaghey’n arg; ayn ta’n conaant ren y Chiarn rish cloan Israel.

12As hass eh kiongoyrt rish altar y Chiarn kionfenish slane chaglym-cooidjagh Israel, as skeayl eh magh e laueyn. 13(Son va Solomon er n’yannoo pulpit prashey, queig cubityn er lhiurid, as queig cubityn er lheead, as three cubityn er yrjid, as v’eh er hoiaghey eh ayns mean y chooyrt: as er shen hass eh, as ghlioon eh sheese er e ghlioonyn kiongoyrt rish ooilley chaglym-cooidjagh Israel, as skeayl eh magh e laueyn gys niau) 14As dooyrt eh, O Hiarn Yee Israel, cha vel Jee erbee goll rhyt’s ayns niau, ny er y thalloo; ta freayll conaant, as soilshaghey myghin da dty harvaantyn, ta gimmeeaght kiongoyrt rhyt lesh ooilley nyn gree: 15Oo t’er vreayll da dty harvaant David m’ayr, shen ny yiall oo da; as loayr oo lesh dty veeal, as er chooilleeney eh lesh dty laue, myr te yn laa jiu. 16Nish er-y-fa shen, O Hiarn Yee Israel, freill da dty harvaant David m’ayr shen ny yiall oo da, gra, Cha bee oo laccal dooinney ayns my hilley’s dy hoie er stoyl-reeoil Israel; my she shen, dy jean dty chloan tastey ’ghoaill jeh nyn raad dy hooyl ayns my leigh, myr t’ou uss er hooyl kiongoyrt rhym’s. 17Nish er-y-fa shen, O Hiarn Yee Israel, lhig da dty ghoo ve jeant mie, t’ou er loayrt rish dty harvaant David. 18(Agh jean Jee dy jarroo cummal marish deiney er y thalloo? cur-my-ner, cha vod niau, as niau ny niaughyn uss y ghoaill; cre-woad sloo yn thie shoh ta mish er hroggal?) 19Jean soiaghey, er-y-fa shen, jeh padjer as aghin dty harvaant, O Hiarn my Yee, dy eaishtagh rish yn eam as y phadjer ta dty harvaant jannoo kiongoyrt rhyt. 20Dy vod dty hooillyn ve foshlit er y thie shoh laa as oie, eer er yn ynnyd my-e-chione t’ou er ghra, dy jinnagh oo dt’ennym y choyrt ayns shen; dy eaishtagh rish y phadjer, ta dty harvaant goaill ’syn ynnyd shoh. 21Eaisht er-y-fa shen rish accanyn dty harvaant, as dty phobble Israel; nee ad y yannoo ’syn ynnyd shoh: cur clashtyn veih dty ynnyd-vaghee, eer veih niau; as tra t’ou clashtyn jean leih daue.

22My ta dooinney jannoo aggair da e naboo, as currym currit er dy ghoaill e loo, as y loo dy heet kiongoyrt rish dt’altar ’sy thie shoh. 23Eisht jean uss clashtyn veih niau, as cooilleen, as jean dty harvaantyn y vriwnys liorish deyrey yn vee-chrauee, dy chooilleeney e hoilchin er e chione hene, as liorish seyrey’n er cairagh, dy choyrt da cordail rish e chairys. 24As my vees dty phobble Israel fo barriaght nyn noidyn, er-yn-oyr dy vel ad er n’yannoo peccah dt’oï; as dy jyndaa ad reesht, as dy gow ad rish dt’ennym’s, as padjer as aghin y yannoo kiongoyrt rhyt’s ’sy thie shoh: 25Eisht jean uss clashtyn veih ny niaughyn, as leih peccah dty phobble Israel, as cur lhiat ad reesht gys y cheer hug oo daue, as da nyn ayraghyn.

26Tra ta’n aer dooint seose, as nagh vel veg y fliaghey, er-yn-oyr dy vel ad er n’yannoo peccah dt’oï; my t’ad guee lesh yn ynnyd shoh, as dy gow ad rish dt’ennym, as chyndaa veih nyn beccah tra t’ou seaghney ad: 27Eisht jean uss clashtyn veih niau, as leih peccah dty harvaantyn, as dty phobble Israel, as ynsee daue yn raad mie, ayn lhisagh ad gimmeeaght; as cur fliaghey er dty heer, t’ou er chur da dty phobble son eiraght.

28My vees gortey ’sy cheer, my vees y chramp ayn, my vees blest ayn, ny druight pyshoonagh, locustyn, ny praddagyn; my nee nyn noidyn ad y hionney stiagh ayns ard-valjyn nyn jeer, cre-erbee’n doghan, ny cre-erbee’n chingys vees ayn: 29Eisht cre-erbee’n phadjer, ny cre-erbee’n accan vees jeant liorish dooinney erbee, ny liorish ooilley dty phobble Israel, tra ta dy chooilley ghooinney toiggal e loght, as e hrimshey hene, as skeayley magh e laueyn ’sy thie shoh: 30Eisht jean uss clashtyn veih niau dt’ynnyd-vaghee, as jean leih, as cur cooilleeney da dy chooilley ghooinney cordail rish ooilley e raaidyn, ayd’s ta fys cre t’ayns e chree (son ayd’s dty-lomarcan ta fys cre t’ayns creeaghyn cloan gheiney.) 31Dy vod ad aggle y ghoaill royd, dy immeeaght ayns dty raaidyn choud as s’bio ad ’sy cheer hug oo da nyn ayraghyn.

32Myrgeddin, mychione y joarree, nagh vel jeh dty phobble Israel, agh t’er jeet veih cheer foddey er graih dt’ennym mooar, as dty laue niartal, as dty roih sheeynt magh; my hig ad as padjer y yannoo ’sy thie shoh: 33Eisht jean uss clashtyn veih ny niaughyn, eer veih dt’ynnyd-vaghee, as jean cordail rish ooilley ny ta’n joarree jannoo aghin hood er y hon; dy vod ooilley sheelnaue enney y choyrt er dt’ennym, as aggle ’ghoaill royd, myr ta dty phobble Israel, as dy vod fys ’ve oc dy vel y thie shoh ta mish er hroggal, enmyssit lurg dt’ennym: 34My hed dty phobble magh dy chaggey noi nyn noidyn, raad erbee dy der oo magh ad, as ad dy ghoaill padjer hood’s lesh yn ard-valley shoh t’ou er reih, as y thie ta mish er hroggal son dt’ennym: 35Eisht cur uss clashtyn veih ny niaughyn da nyn badjer as nyn accan, as gow yn chooish oc ayns laue. 36My nee ad peccah dt’oï, (son cha vel dooinney erbee nagh vel jannoo peccah) as uss dy ve jymmoosagh roo, as ad y livrey harrish gys nyn noidyn, as dy der ad lhieu ad ersooyl nyn bryssoonee gys cheer foddey ny gerrit. 37Ny-yeih, my smooinys ad orroo hene ’sy cheer raad t’ad er nyn goyrt lhieu ayns bondiaght, as my hyndaa-ys ad, as padjer y yannoo hood’s ayns cheer nyn gappeeys, gra, Ta shin er n’yannoo peccah, ta shin er n’yannoo dy aggairagh, as er ghellal dy mee-chrauee; 38My hyndaa-ys ad reesht hood’s lesh ooilley nyn gree, as lesh ooilley nyn annym, ayns cheer nyn gappeeys, huggey t’ad er nyn goyrt lhieu, as dy gow ad padjer lesh nyn eddin gys y cheer shoh hug oo da nyn ayraghyn, as gys yn ard-valley t’ou er reih, as gys y thie ta mish er hroggal son dt’ennym: 39Eisht cur uss clashtyn veih ny niaughyn, eer veih dty ynnyd-vaghee, da nyn badjeryn as nyn accanyn, as gow yn chooish oc ayns laue, as leih da dty phobble t’er n’yannoo peccah dt’oï, 40Nish, my Yee (ta mee guee ort) lhig da dty hooillyn ve foshlit, as cur clashtyn foayroil da’n phadjer t’er ny yannoo ’syn ynnyd shoh. 41Nish er-y-fa shen, trog ort, O Hiarn Yee, gys thie dty chummal hene, uss as arg dty niart: lhig da dty haggyrtyn, O Hiarn Yee, ve coamrit lesh saualtys, as lhig da dty nooghyn boggey ’ghoaill ayns mieys. 42O Hiarn Yee, ny chyndaa ersooyl eddin dt’er-ooilit: cooinee er myghinyn Ghavid dty harvaant.