CAB. VII

1Nish erreish da Solomon v’er n’yannoo jerrey er e phadjer, haink aile neose veih niau, as losht eh seose ny chebballyn as ny ourallyn; as ren gloyr y Chiarn yn thie y lhieeney. 2As cha voddagh ny saggyrtyn goll stiagh ayns thie yn Chiarn, er-yn-oyr, dy row gloyr y Chiarn er lhieeney thie yn Chiarn. 3As tra honnick ooilley cloan Israel kys haink yn aile neose, as gloyr y Chiarn er y thie, chroym ad ad-hene lesh nyn eddinyn gys y thalloo er y phavement, as hug ad ooashley as moylley da’n Chiarn, gra, Son t’eshyn mie, son ta e vyghin farraghtyn son dy bragh.

4Eisht ren y ree as ooilley’n pobble chebbal ourallyn kiongoyrt rish y Chiarn. 5As ren ree Solomon chebbal oural daa housane as feed dy ghew, as shey-feed thousane keyrrey: myr shoh ren y ree as ooilley’n pobble thie Yee y chasherickey. 6As va ny saggyrtyn shirveish ayns nyn oik: ny Leviteyn myrgeddin lesh greinyn-kiaullee yn Chiarn, va David y ree er n’yannoo son moylley da’n Chiarn, er-y-fa dy vel e vyghin farraghtyn son dy bragh, tra hug David moylley liorish y chirveish oc: as ren ny saggyrtyn ny trumpetyn y heidey kiongoyrt roo, as va ooilley Israel nyn shassoo. 7Myrgeddin, ren Solomon yn chooyrt meanagh va roish thie yn Chiarn y chasherickey: son ayns shen heb eh ourallyn-losht, as eeh ny ourallyn-shee, er-yn-oyr nagh row room er yn altar prash va Solomon er n’yannoo dy ghoaill ny ourallyn-losht, as ny ourallyn-arran, as yn eeh.

8Myrgeddin, ec y traa cheddin dreill Solomon yn feailley shiaght laghyn, as ooilley Israel mârish, sheshaght erskyn-earroo dy leih, veih cagliagh Hamath gys awin Egypt. 9As er y hoghtoo laa, va chaglym-cooidjagh casherick: son dreill ad shiaght laa er coontey’n altar y chasherickey, as feailley ny cabbaneyn shiaght laghyn. 10As er y trass laa as feed jeh’n chiaghtoo vee lhig eh da’n pobble goll roue gys nyn gummallyn, lesh boggey as gennallys cree, son y chenjallys va’n Chiarn er hoilshaghey da David, as da Solomon, as da Israel e phobble. 11Myr shoh hug Solomon kione er obbyr thie’n Chiarn, as thie y ree: as ooilley ny va ayns cree Solomon dy yannoo ayns thie’n Chiarn, as ’sy thie echey hene, haink eh lesh dy chooilleeney.

12As haink y Chiarn gys Solomon ’syn oie, as dooyrt eh rish, Ta mee er chlashtyn dty phadjer, as er reih yn ynnyd shoh dou hene son thie my ourallyn casherick. 13My nee’m yn aer y ghooney seose nagh bee fliaghey ayn, ny my ver-ym sarey da ny locustyn dy chur mow yn cheer, ny my ver-ym y chramp magh mastey my phobble; 14My nee my phobble ta enmyssit orrym, ad-hene y injillaghey, as padjer y yannoo, as shirrey my eddin, as chyndaa veih nyn ghrogh raaidyn: eisht ver-ym clashtyn veih niau, as neem’s yn peccah oc y leih, as slaanee-ym yn cheer. 15Eisht bee my hooillyn foshlit, as my chlashtyn foayroil gys y phadjer vees jeant ’syn ynnyd shoh. 16Son ta mee nish er reih, as er chasherickey yn thie shoh, dy vod m’ennym ve ayn son dy bragh: as bee my hooillyn as my chree er dy kinjagh. 17As er dty hon’s, my nee oo gimmeeaght kiongoyrt rhym, myr ren David dty ayr gimmeeaght, as jannoo cordail rish ooilley ny ta mee er dty harey, as my lattyssyn as my vriwnyssyn y reayll: 18Eisht neem’s stoyl-reeoil dty reeriaght y hickyraghey, myr ren mee conaant rish David dt’ayr, gra, Cha bee dooinney jeh dty luight dty laccal dy reill ayns Israel. 19Agh my hyndaa-ys shiu ersooyl, as my lattyssyn as my annaghyn ta mee er hoiaghey kiongoyrt riu y hreigeil, as my hed shiu dy hirveish jeeghyn elley, as ooashley ’chur daue: 20Eisht nee’m ad y astyrt ass ny fraueyn veih’n cheer ta mee er choyrt daue; as y thie shoh ta mee er chasherickey son m’ennym, nee’m eh y scughey ass my hilley, as eh y yannoo ny an-ghoo as oltooan mastey dy chooilley ashoon. 21As y thie shoh ta cha ard, bee eh son yindys da dagh unnane ta goll shaghey; myr shen dy jir eh, Cre’n-fa ta’n Chiarn er n’yannoo myr shoh rish y cheer shoh, as rish y thie shoh? 22As shoh vees yn ansoor yiow eh, Er-yn-oyr dy hreig ad y Chiarn Jee nyn ayraghyn, hug lesh magh ad ass cheer Egypt, as dy dug ad nyn marrant er jeeghyn elley, as dy dug ad ooashley daue, as shirveish ad: shen-y-fa t’eh er chur lesh ooilley’n kerraghey shoh orroo.