CAB. VIII

1Nish, (ec kione feed bleïn, erreish da Solomon v’er hroggal thie’n Chiarn, as e hie hene) 2Dy ren Solomon ny ard-valjyn shen y hroggal va Huram er livrey da reesht, as hug eh er cloan Israel dy chummal ayndoo. 3As hie Solomon gys Hamath-zobah, as hooar eh yn varriaght er. 4As hrog eh Tadmor ’syn aasagh, as ooilley ny ard-valjyn-stoyr, hrog eh ayns Hamath. 5Myrgeddin hrog eh Beth-horon heose, as Beth-horon wass, ard-valjyn lajer, lesh voallaghyn, giattyn, as boltyn: 6As Baalath, as ooilley ny ard-valjyn-stoyr v’ec Solomon, as ooilley ard-valjyn ny ainee, as ard-valjyn ny markee, as ooilley ny va Solomon aggindagh dy hroggal ayns Jerusalem, as ayns Lebanon, as trooid ooilley cheer e rheam.

7Agh son ooilley yn pobble va faagit jeh ny Hittiteyn, as ny Amoriteyn, as ny Perizziteyn, as ny Hiviteyn, as ny Jebusiteyn nagh row jeh Israel; 8Agh jeh’n chloan ocsyn va faagit nyn yeï ’sy cheer, nagh row cloan Israel er stroie; ad shoh hug Solomon fo keesh, gys y traa t’ayn. 9Agh cha ren Solomon veg jeh cloan Israel y choyrt fo shirveish bondiaght: agh v’ad e gheiney-caggee, as e ard-chaptanyn, as captanyn e ainee, as e varkee. 10As v’ad shoh ny ard-offishearyn va harrish obbyr ree Solomon, eer daa cheead as jeih as da-eed, va reill harrish y pobble.

11As hug Solomon lesh seose inneen Pharaoh, ass ard-valley Ghavid, gys y thie v’eh er hroggal jee; son dooyrt eh, Cha nhegin da’n ven aym’s cummal ayns thie Ghavid ree Israel, er coontey casherickys yn ynnyd, raad ta arg y Chiarn er jeet.

12Eisht heb Solomon ourallyn-losht da’n Chiarn, er altar y Chiarn, v’eh er hroggal roish y phorch: 13Eer chebbal wheesh shen dagh laa, cordail rish sarey Voses, er ny dooneeyn, as er ny eaystyn-noa, as er ny ard feaillaghyn, three keayrtyn ’sy vleïn, eer er feailley ny caisht, as er feailley ny shiaghtinyn, as er feailley ny cabbaneyn.

14As phoint eh, cordail rish oardagh e ayr David coorseyn ny saggyrtyn gys y chirveish oc, as ny Leviteyn gys nyn gurmyn, dy chur moylley as dy hirveish kiongoyrt rish ny saggyrtyn, myr va currym dagh-laa cheet mygeayrt, ny arreyderyn neesht lurg nyn goorseyn, ec dagh giat; son myr shoh va David yn dooinney dy Yee er harey, 15As va ny saggyrtyn as ny Leviteyn feer tastagh dy chooilleeney sarey’n ree, mychione cooish erbee, ny mychione ny tashtaghyn. 16Nish va ooilley’n stoo son obbyr Solomon kiarit ro-laue er-dyn laa hie undin thie’n Chiarn er hoiaghey, derrey va kione er yn obbyr; shoh myr va thie’n Chiarn er ny hroggal.

17Eisht hie Solomon gys Ezion-geber, as gys Eloth, rish oirr ny marrey ayns cheer Edom. 18As hug Huram huggey liorish e harvaantyn lhongyn, as shoalteyryn schleioil; as hie ad marish marrinee Solomon gys Ophir, as hug ad lhieu veih shen kiare cheead as jeih talentyn as da-eed dy airh, er coontey ree Solomon.