CAB. IX

1As tra cheayll ben-reïn Sheba jeh goo Solomon, haink ee dy phrowal Solomon lesh questionyn dorraghey ec Jerusalem, marish sheshaght feer vooar, as camelyn laadit lesh spiceyn, mooarane airh, as claghyn costal: as tra haink ee gys Solomon, ren ee resooney rish mychione ooilley ny v’eck ayns e cree. 2As hug Solomon bun er ooilley ny questionyn eck: as cha row nhee erbee keillit veih Solomon nagh hoilshee eh jee. 3As tra va ben-reïn Sheba er vakin creenaght Solomon, as y thie v’eh er hroggal, 4As kys va e voayrd jeant magh, as stayd e ir-oik, as shirveish e gheiney ooasle, as nyn goamraghyn, e vutleryn myrgeddin, as nyn goamraghyn, as ny greeshyn orroo hie eh seose gys thie’n Chiarn; hie e tappey vo-ee. 5As dooyrt ee rish y ree, Spheer va’n goo cheayll mee ayns my heer hene, mychione dty obbraghyn, as dty chreenaght: 6Ny-yeih, cha chred mee ny goan oc, derrey haink mee hene, as dy vel my hooillyn er vakin eh: as cur-my-ner, cha row’n derrey lieh jeh mooads dty chreenaght inshit dou: son t’ou foddey erskyn y goo cheayll mee jeed. 7S’maynrey dty gheiney, as s’maynrey ad shoh dty harvaantyn, ta shassoo dy kinjagh kiongoyrt rhyt, as clashtyn dty chreenaght. 8Bannit dy row’n Chiarn dty Yee, t’er ghoaill taitnys aynyd dy hoiaghey oo er e stoyl-reeoil, dy ve ree son y Chiarn dty Yee: er-yn-oyr dy row dty Yee graihagh er Israel, dy niartaghey lhieu son dy bragh, shen-y-fa t’eh er n’yannoo uss dty ree harrystoo, dy choyrt briwnys as cairys. 9As hug ee da’n ree shey-feed talent dy airh, as palchey vooar dy spiceyn, as claghyn costal: cha row roïe lheid ny spiceyn ry-akin, as ad shoh hug ben-reïn Sheba da ree Solomon. 10As hug marrinee Huram myrgeddin, as marrinee Solomon lhieu veih Ophir airh, as biljyn-algum, as claghyn costal. 11As ren y ree greeshyn jeh ny biljyn-algum son thie’n Chiarn, as son plaase y ree, as claasaghyn as greinyn bingys son ny fir-chiaullee: as cha row veg nyn lheid er ny akin roïe, ayns cheer Yudah. 12As hug ree Solomon da ben-reïn Sheba ooilley’n yeearree eck, cre-erbee baillee shirrey, as foddey smoo ny v’ee hene er yiootal er y ree. Myr shen hyndaa ee, as hie ee ro-ee gys y cheer eck hene, ish as e sharvaantyn.

13Nish va trimmid yn airh haink gys Solomon ayns un vleïn, shey cheead three-feed as shey talentyn. 14Marish y custom v’eh troggal jeh ny dellaryn as ny marchanyn. As va ooilley reeaghyn Arabia, as kiannoortyn y cheer geeck keesh da Solomon ayns airh as argid.

15As ren ree Solomon daa cheead target dy airh hammarit: hie shey cheead shekel dy airh dy yannoo un target. 16As three cheead scape ren eh dy airh hammarit; hie three cheead shekel dy airh gys un scape. As hasht y ree ad ayns thie keylley Lebanon.

17Marish shoh, ren eh stoyl-reeoil mooar dy ivory, as choodee eh harrish eh lesh glen airh. 18As va shey greeshyn gys y stoyl-reeoil lesh stoyl-coshey dy airh, va jeant shickyr gys y stoyl-reeoil, as geayltyn er dagh cheu jeh’n ynnyd-soie, as daa lion nyn shassoo liorish ny geayltyn. 19As hass daa lion jeig ayns shen er y derrey heu, as er y cheu elley, er ny shey greeshyn. Cha row e lheid jeant ayns reeriaght erbee.

20As va ooilley siyn-iu Solomon dy airh, as va ooilley siyn thie keylley Lebanon jeh glen airh; cha row veg jeu dy argid; cha row scansh erbee jeant jeh rish lhing Solomon. 21Son hie lhongyn y ree gys Tarshish marish shoalteyryn Huram; keayrt ayns three bleeaney haink lhongyn Tarshish cur lhieu airh as argid, ivory, as apeyn, as peacockyn. 22As va ree Solomon erskyn ooilley reeaghyn ny hooirey, ayns berchys as creenaght.

23As va ooilley reeaghyn feaï-ny-cruinney mygeayrt aggindagh dy akin Solomon, dy chlashtyn e chreenaght, va Jee er choyrt ayns e chree. 24As hug ad lhieu dagh dooinney e yioot, siyn argid, as siyn airh, as coamraghyn, eilley-caggee, as spiceyn, cabbil, as muleyn, keesh cour ny bleeaney.

25As va ec Solomon kiare thousane manjoor son cabbil as thieyn fainee, as daa housane jeig dy varkee; ad shoh rheynn eh er ny ard-valjyn fainee, dy ve marish y ree ec Jerusalem.

26As ren eh reill harrish dy chooilley ree, veih’n awin eer gys cheer ny Philistinee, as gys slyst Egypt. 27As ren y ree er argid dy ve ayns Jerusalem cha palchey as claghyn, as ny biljyn-cedar dy ve myr ny biljyn-sycamore, ta ’sy choan cha palchey. 28As hug ad lhieu gys Solomon cabbil ass Egypt, as veih dy chooilley heer.

29Nish yn chooid elley dy obbraghyn Solomon, toshiaght as jerrey, nagh vel ad scruit ayns lioar Nathan y phadeyr, as ayns phadeyrys Ahijah yn Shilonite, as ayns ashlishyn Iddo yn fakyder, noi Jeroboam mac Nebat? 30As ren Solomon reill ayns Jerusalem harrish ooilley Israel da-eed bleïn. 31As ren Solomon cadley marish e ayraghyn, as v’eh oanluckit ayns ard-valley Ghavid e ayr. As ren Rehoboam e vac reill ayns e ynnyd.