CAB. I

1Paul ostyl Yeesey Creest, liorish aigney Yee, as Timothy nyn mraar, gys agglish Yee ta ec Corinth, marish ooilley ny nooghyn t’ayns Achaia; 2Grayse dy row hiu, as shee veih Jee nyn Ayr, as veih’n Chiarn Yeesey Creest. 3Bannit dy row Jee, eer Ayr nyn Jiarn Yeesey Creest, yn Ayr dy vyghinyn, as Jee dy chooilley gherjagh; 4Ta gerjaghey shinyn ayns ooilley nyn seaghyn, dy vod mayd ve abyl dy gherjaghey adsyn ta fo seaghyn erbee, lesh y gerjaghey liorish ta Jee dy gherjaghey shin hene. 5Son myr ta ny surranseyn ain son Creest bishaghey orrin, myr shen myrgeddin ta’n gerjagh ain bishaghey orrin veih Creest. 6As edyr shin ve seaghnit, te son y gerjagh as y saualtys euish, ta breeoil ayns gymmyrkey ny surranseyn cheddin mârin: ny edyr shin ve er nyn gherjaghey, te son y gerjagh as y saualtys eu. 7As ta treishteil shickyr ain jiuish, toiggal myr ta ayrn eu jeh’n surranse, dy bee eu myrgeddin jeh’n gherjagh. 8Son cha baill-lhien, vraaraghyn, dy beagh eh gyn-yss diu cre’n seaghyn haink orrin ayns Asia, dy row shin laadit ass towse erskyn nyn niart, ayns wheesh as nagh row veg y jerkal ain dy heet jeh lesh nyn mioys: 9Agh va shin fo briwnys y vaaish aynin hene, nagh jinnagh shin treishteil orrin hene, agh er Jee ta troggal ny merriu. 10Eh ren livrey shin veih baase cha dewil, as ta livrey shin: aynsyn ta shin treishteil dy jean eh foast livrey shin: 11Shiuish myrgeddin coyrt nyn gooney cooidjagh lesh padjeryn er nyn son, dy vod booise v’er ny choyrt liorish ymmodee son y bannaght hie er stowal orrin er graih ymmodee persoonyn. 12Son shoh nyn moggey, feanish nyn gooinsheanse, ayns ônid, as ynrickys crauee, cha nee lesh creenaght seihltagh, agh liorish grayse Yee, dy vel shin er n’ymmyrkey shin hene ’sy theihll, as foddey smoo ny mast’ euish. 13Son cha vel shin scrieu red erbee elley hiu, agh shen ny ta shin hene toiggal dy mie ny goaill-rish, as ta mee treishteil dy gow shiu rish gys y jerrey. 14Myr ta shiuish myrgeddin ayns ayrn er n’ghoaill rooinyn, dy vel shin yn boggey eu, dy jarroo myr ta shiuish neesht yn boggey ainyn ayns laa yn Chiarn Yeesey. 15As ayns y shickyrys shoh ve ayns m’aigney roish shoh dy heet hiu, dy voddagh bannaght dooble ve eu: 16As dy ghoaill shiuish er my raad gys Macedonia, as dy heet reesht veih Macedonia hiuish, as lieriuish dy ve er my choyrt lhiam er my raad gys Judea. 17Tra va mee eisht ’syn aigney shoh, row mee er daa ockle? ny shen ta mee kiarail dy yannoo, vel foym dy yannoo eh er oyryn seihltagh, mârym’s dy beagh she, she, as cha nee, cha nee? 18Agh myr ta Jee firrinagh, cha row yn goo ain hiuish she as cha nee. 19Son Mac Yee, Yeesey Creest, v’er ny phreacheil nyn mast’ eu liorinyn, dy jarroo liorym’s, as Silvanus, as Timotheus, cha row eh she as cha nee, agh aynsyn va she. 20Son ta ooilley gialdynyn Yee aynsyn she, as aynsyn Amen, gys gloyr Yee liorinyn. 21Nish eshyn ta dy niartaghey shinyn mêriuish ayns Creest, as ta er ooilaghey shin, she Jee eh: 22Ta myrgeddin er sealal shin, as ta coyrt dooin eearlys y Spyrryd ayns nyn greeaghyn. 23Ny-sodjey, ta mee goaill Jee son feanish er m’annym, er coontey dy ymmyrkey lhieu nagh daink mee foast gys Corinth. 24Cha nee dy vel shin gymmyrkey reill harrish nyn gredjue, agh ta shin fir-choonee dy vishaghey nyn moggey: son liorish credjue ta shiu shassoo.