CAB. XI

1Dy baillish Jee dy jinnagh shiu gymmyrkey lhiam red beg ayns my ommijys; as dy jarroo jean-jee gymmyrkey lhiam. 2Son ta mee eadolagh harrishdiu lesh eadolys chrauee, son ta mee er nastey shiu rish un heshey, dy voddym shiu y hebbal myr moidyn ghlen da Creest. 3Agh ta aggle orrym, myr ren yn ard-nieu Aue y volley liorish e chialgyn, myr shen dy beagh ny aignaghyn euish liorish saaseyn erbee er nyn gleaynaghey veih’n ônid shen t’ayns Creest. 4Son my t’eshyn ta cheet, preacheil Yeesey elley nagh vel shinyn er phreacheil, ny my ta shiu geddyn spyrryd elley, nagh vel shiu [hannah] er gheddyn, ny sushtal elley, nagh vel shiu er ghoaill rish, oddagh shiu dy mie gymmyrkey lesh. 5Son ta mee goaill orrym nagh row mee veg ergooyl ny eer ostyllyn b’yrjey. 6Agh ga dy vel mee moal ayns glare, ny-yeih cha vel mee myr shen ayns tushtey; agh ta shin er ve dy cronnal er ny hoilshaghey nyn mast’ eu ayns dy chooilley nhee. 7Vel mee er n’yannoo foill liorish mee hene y injillaghey, dy vod shiuish v’er nyn soiaghey seose, er-y-fa dy vel mee er phreacheil diuish sushtal Yee nastee? 8Ta mee er choyrt kialteenyn elley gys cost, goaill faill jeu, dy yannoo shirveish diuish. 9As tra va mee kionfenish mêriu, as ayns feme, cha dug mee dooinney erbee gys cost: agh shen ny va dy laccal orrym, ren ny braaraghyn haink veih Macedonia y yannoo magh: as ayns dy chooilley nhee ta mee er vreayll mee hene veih ve costyllagh diu, as shen myr nee’m mee hene y reayll. 10Myr ta firrinys Chreest aynym, cha jean dooinney erbee m’y lhiettal veih’n voggyssagh shoh ayns ardjyn Achaia. 11Cre’n-oyr? nee son nagh vel graih aym erriuish? ec Jee ta fys. 12Agh ny ta mee dy yannoo, nee’m jannoo, dy voddym leshtal y scughey vouesyn ta shirrey leshtal, ayns cre-erbee t’ad boggyssagh, dy vod ad v’er nyn gheddyn eer lheid as ta shinyn. 13Son ta nyn lheid oc shoh ostyllyn foalsey, obbreeyn molteyragh goaill orroo hene cummey ostyllyn Chreest. 14As cha nee yindys erbee eh; son ta Satan hene goaill er cummey ainle dy hoilshey. 15Myr shen cha nee yindys erbee eh my ta ny shirveishee echey myrgeddin goaill orroo cummey ny shirveishee dy chairys; bee yn jerrey oc shoh cordail rish nyn obbraghyn. 16Reesht ta mee gra, Ny lhig da dooinney erbee m’y ghoaill son ommydan; ny er aght elley, foast myr ommydan jean-jee gymmyrkey lhiam, dy voddym’s mee hene boggyssagh red beg. 17Shen ny ta mee dy loayrt, cha vel mee dy loayrt eh lurg y Chiarn, agh myr veagh eh dy ommijagh ayns y daanys shoh dy voggyssagh. 18Fakin dy vel ymmodee boggyssagh lurg yn eill, neem’s boggyssagh myrgeddin. 19Son ta shiu gymmyrkey lesh ommydanyn dy aggindagh, fakin dy vel shiuish shiu hene creeney. 20Son ta shiu fuilliaghtyn, my ta dooinney coyrt lesh shiu ayns bondiaght, my ta dooinney dy spooilley shiu, my ta dooinney goaill jiu, my ta dooinney troggal eh-hene seose dy mooaralagh, my ta dooinney bwoalley shiu er yn eddin. 21Ta mee loayrt shoh myr mychione scammylt, myr dy beagh shin hene er ve annoon: ny-yeih, ayns cre-erbee s’loys da dooinney erbee ve dunnal (ta mee loayrt dy ommijagh) s’loys dooys ve dunnal myrgeddin. 22Nee Hebrewnee ad? ta mish myrgeddin: nee Israeliteyn ad? ta mish myrgeddin: nee sluight Abraham ad? ta mish neesht. 23Nee shirveishee Chreest ad? (ta mee loayrt myr ommydan) ta mish er-nyn-skyn: ayns tooilleilyn ny s’palchey, ayns surranse buillaghyn erskyn towse, ayns pryssoonyn ny s’menkey, ayns gaue baaish dy mennick. 24Queig keayrtyn veih ny Hewnyn hooar mee da-eed builley er-lhimmey jeh unnane. 25Three keayrtyn va mee custit lesh slattyn, un cheayrt va mee er my chlaghey, three keayrtyn duillee mee coayl-lhuingey oie as laa ta mee er ve ayns y diunid: 26Ayns jurnaaghyn dy mennick ayns gaue ushtaghyn, ayns gaue roosteyryn, ayns gaue veih my gheiney-cheerey hene, ayns gaue veih ny Ashoonyn-quaagh, ayns gaue ’syn ard-valley, ayns gaue ’syn aasagh, ayns gaue er yn aarkey, ayns gaueghyn mastey braaraghyn foalsey; 27Ayns skeeys as doccar, ayns ve er my arrey dy mennick, ayns accyrys as paa, ayns trostey dy mennick, ayns feayraght as rooishtid: 28Marish ny reddyn shen t’er cheu-mooie, shen ny ta cheet orrym gagh laa, my imnea son ooilley ny kialteenyn. 29Quoi ta annoon, as nagh vel mish annoon? quoi t’er ghoaill oyr dy huittym, as nagh vel mish lostey? 30My shegin dou boggyssagh, nee’m boggyssagh jeh ny reddyn shen ta bentyn rish my annooinidyn hene. 31Ec Jee as Ayr nyn Jiarn Yeesey Creest, ta bannit son dy bragh, ta fys nagh vel mish jannoo breg. 32Ayns Damascus, va’n kiannoort fo Aretas y ree freaylley yn ard-valley jeh ny Damascenee lesh garrison, er-chee dy my ghoaill. 33As trooid uinniag lhig ad mee sheese ayns baskad rish y voalley, as chossyn mee veih ny laueyn echey.