CAB. XII

1Agh cha lhiass dou boggyssagh veg sodjey: hig-ym nish gys shillaghyn as ashlishyn y Chiarn. 2Bione dou dooinney dy row ayns Creest erskyn kiare bleeaney jeig er-dy-henney (ny ayns y chorp v’eh, cha voddym gra; ny ass y chorp v’eh, cha voddym gra; ec Jee ta fys) goit seose gys ny niaughyn syrjey. 3As bione dou lheid y dooinney (nee ayns y chorp, ny ass y chorp v’eh, cha voddym gra; ec Jee ta fys.) 4Kys dy row eh er ny ghoaill seose gys paradise, as cheayll eh goan erskyn insh, lheid as nagh vel lowit da dooinney dy ockley. 5Jeh lheid shen nee’m boggyssagh: foast jee’m pene cha jean-ym boggyssagh, agh ayns my annooinidyn. 6Son ga dy beagh aigney aym dy voggyssagh, cha bee’m my ommydan; son loayr-ym yn irriney: agh nish ta mee lhiggey shaghey, er-aggle dy jinnagh dooinney erbee smooinaghtyn jee’m erskyn ny t’eh fakin mee dy ve, ny shen t’eh dy chlashtyn jee’m. 7As er-yn-oyr nagh goïn rouyr orrym trooid yrjid ny ashlishyn, va jolg er ny choyrt dooys ayns yn eill, chaghter Satan dy my smaghtaghey, er-aggle dy beign ro ard-aignagh. 8Son y red shoh ren mish guee gys y Chiarn three keayrtyn, dy scughey voym eh. 9As dooyrt eh rhym, Ta’n ghrayse aym’s fondagh er dty hon; son ta’n niart aym’s dy slane er ny hoilshaghey ayns annooinid. Ny s’arryltee er-y-fa shen neem’s boggyssagh ayns my annooinidyn, dy vod pooar Chreest ve breeoil aynym. 10Shen-y-fa ta mee goaill boggey ayns annooinid, ayns oltooanyn, ayns êgin, ayns tranlaase, ayns chennid er graih Chreest: son tra ta mee annoon, eisht ta mee lajer. 11Ta mee er jeet dy ve my ommydan ayns boggyssagh, shiu hene ta er m’êginaghey; son shiuish lhisagh v’er my voylley: son ayns nhee erbee cha vel mee ergooyl ny eer ostyllyn syrjey, ga nagh vel mee veg. 12Dy firrinagh va cowraghyn jeh ostyl obbrit ny-vud eu ayns dy chooilley hurranse, ayns cowraghyn as yindyssyn, as obbraghyn niartal. 13Son cre eh, ayn va shiuish ergooyl rish kialteenyn elley, mannagh row eh son nagh dug mee shiu gys cost? leih-jee dou yn aggair shoh. 14Cur-jee my-ner, yn trass cheayrt ta mish aarloo dy heet hiu; as cha bee’m costyllagh diu; son cha vel mee shirrey nyn gooid, agh shiu hene: son cha lhisagh y chloan cur ro-laue cour ny ayraghyn, agh ny ayraghyn cour y chloan. 15As dy feer arryltagh nee’m baarail, as bee’m er my vaarail er nyn son eu; ga myr smoo dy mooar ta mish graihagh erriuish, sloo dy ghraih t’euish orrym. 16Agh gow-jee myr shen eh, cha dug mee currym erriu: ny-yeih, myr ta mee croutagh, [jir ad] ghow mee shiu lesh kialgyn. 17Ren mish vondeish y yannoo jiuish liorish unnane erbee jeusyn hug mee hiu? 18Hir mee er Titus, as hug mee braar mârish: ren Titus vondeish j’iu? nagh jimmee shin ayns yn un spyrryd? nagh huill shin ayns ny kesmadyn cheddin? 19Reesht, vel shiu smooinaghtyn dy vel shin jannoo leshtallyn? ta shin loayrt fenish Yee ayns Creest: agh ta shin jannoo dy chooilley nhee, chaarjyn ennoil, dy chur tushtey sodjey diu. 20Agh ta mee goaill aggle tra hig-ym’s, nagh voym shiuish lheid as baillym, as beem’s er my gheddyn lieriuish lheid as nagh bailliu: er-aggle dy bee ny-vud eu anvea, troo, jymmoose, streeu, cooyl-chassid, tutleraght, mooaralys, irree-magh: 21As er-aggle tra hig-ym reesht, dy jean my Yee m’y injillaghey nyn mast’ eu, as dy bee oyr trimshey aym er coontey ymmodee ta hannah er n’yannoo peccah, as nagh vel er ghoaill arrys jeh’n neu-ghlennid, as y vaarderys, as y rouanys shen, t’ad er ny ve cur rish.