CAB. XIII

1Shoh’n trass cheayrt ta mee cheet hiu: Ayns beeal ghaa ny three dy eanishyn bee dy chooilley ockle jeant mie. 2Dinsh mee diu roïe, as nish yn nah cheayrt ta mee coyrt raaue diu myr dy beign kionfenish, as nish nagh vel mee kionfenish, ta mee scrieu hucsyn ta roish shoh er n’yannoo peccah, as gys dy chooilley unnane elley, my hig-ym reesht, cha vow shiu foayr: 3Fakin dy vel shiu shirrey prowal jeh Creest loayrt aynym’s, eshyn nagh vel annoon hiuish, agh t’eh niartal ayndiu. 4Son ga dy row eh er ny chrossey trooid annooinid, ny-yeih t’eh bio liorish pooar Yee: Son ta shinyn myrgeddin annoon aynsyn, agh bee mayd bio mârishyn liorish pooar Yee soilshit diuish. 5Feysht-jee shiu hene, vel shiu ayns y chredjue; prow-jee shiu hene: nagh vel fys euish shiu hene, dy vel Yeesey Creest ayndiu; mannagh vel, ta shiu mee-lowit? 6Agh ta mee treishteil dy bee fys eu nagh vel shinyn fegooish y phrowal shoh. 7Nish yeearree-ym er Jee nagh jean shiu veg yn olk; cha nee dy hoilshaghey yn phrowal shoh, agh dy jinnagh shiu shen ny ta mie, ga dy beagh shinyn myr dy beagh eh fegooish yn phrowal shoh. 8Son cha vod shin veg y yannoo noi’n irriney, agh son yn irriney. 9Son ta boggey orrin tra ta shinyn annoon, as shiuish lajer: as shoh myrgeddin ta shin geearree, dy jarroo yn slane lhiassaghey bea eu. 10Shen-y-fa ta mee scrieu ny reddyn shoh, tra nagh vel mee mêriu, er-aggle tra hig-ym hiu, dy jean-ym shiu y smaghtaghey dy gyere cordail rish y phooar ta’n Chiarn er choyrt dooys son y vondeish [spyrrydoil,] as cha nee son yn assee eu. 11Er-jerrey, vraaraghyn, my vannaght mêriu: Bee-jee er nyn niartaghey dy cheilley, bee-jee er nyn gherjaghey, bee-jee jeh’n un aigney, jean-jee baghey ayns shee; as bee’n Jee dy ghraih as shee mêriu. 12Bannee-jee y cheilley lesh y phaag dy hee. 13Ta ooilley ny nooghyn coyrt nyn mannaght hiu. 14Grayse nyn Jiarn Yeesey Creest, as graih Yee, as sheshaght y Spyrryd Noo, dy row mêriu ooilley. Amen.