CAB. III

1Lhiass dooin ny-sodjey shin hene y voylley? ny vel shin, myr feallagh elley, feme screeuyn moyllee hiuish, ny screeuyn moyllee veue? 2Shiuish yn screeuyn ainyn scruit ayns nyn greeaghyn, toiggit as lhaiht liorish dy chooilley ghooinney: 3Son wheesh as dy vel shiu dy cronnal er nyn soilshaghey dy ve screeuyn Chreest, t’er ny hirveish liorinyn, scruit cha nee lesh ink, agh lesh Spyrryd yn Jee bio; cha nee er buird chloaie, agh er buird foalley’n chree. 4As lheid y treishteil shen ta ain trooid Creest ayns Jee. 5Cha nee dy vel shin fondagh j’in hene dy smooinaghtyn nhee erbee myr j’in hene; agh ta’n phooar ain veih Jee. 6Eh ta myrgeddin er n’yannoo shin shirveishee cooie jeh’n chonaant noa; cha nee jeh’n leigh, agh jeh’n spyrryd: son ta’n leigh gobbraghey baase, agh ta’n spyrryd coyrt bioys. 7Agh my va shirveish y vaaish, scruit as grainnit er claghyn, gloyroil; myr shen nagh voddagh cloan Israel jeeaghyn dy gyere er eddin Voses, son sollyssid e eddin, yn sollyssid cheddin va dy lheïe ersooyl. 8Kys nagh bee shirveish y spyrryd ny smoo gloyroil? 9Son my va shirveish yn deyrey gloyroil, foddey smoo ta’n chirveish dy ynrickys er-e-skyn ayns gloyr. 10Son eer shen va jeant gloyroil, cha row gloyr ayn er yn ayrn shoh, er coontey yn ghloyr ta er-e-skyn. 11Son my va shen t’er ny choyrt naardey gloyroil, foddey smoo ta shen ta farraghtyn gloyroil. 12Fakin eisht dy vel ain lheid y treishteil, ta shin goaill orrin dy loayrt lesh slane reamys. 13As cha nee myr Moses, hug coodagh er e eddin, nagh voddagh cloan Israel dy baghtal cur-my-ner jerrey [yn leigh] shen ta [nish] er ny choyrt ergooyl. 14Agh va nyn aignaghyn dollit: son gys y laa t’ayn jiu ta’n coodagh cheddin er-mayrn orroo, ayns lhaih yn chenn chonaant; yn coodagh cheddin ta goit jeh ayns Creest. 15Agh gys yn eer laa jiu, tra ta Moses er ny lhaih, ta’n coodagh er nyn greeaghyn. 16Ny-yeih, tra hyndaa-ys ad gys y Chiarn, bee’n coodagh er ny ghoaill ersooyl. 17Nish she’n Chiarn yn Spyrryd shen: as raad ta Spyrryd y Chiarn, shen y raad ta reamys. 18Agh shinyn ooilley lesh eddin foshlit, cur-my-ner myr ayns gless gloyr y Chiarn, ta shin er nyn gaghlaa gys y chaslys cheddin, veih gloyr gys gloyr, myr liorish Spyrryd y Chiarn.