CAB. IV

1Fakin er-y-fa shen dy vel yn oik shoh ain, myr ta shin er gheddyn myghin, cha vel shin lhiggey nyn gree voïn: 2Agh ta shin er choyrt slane obbal da ny cliaghtaghyn follit scammyltagh, cha nee gimmeeaght ayns molteyrys, chamoo shirveish goo Yee dy foalsey, agh liorish soilshaghey magh yn irriney, faagail shin hene gys [briwnys] cooinsheanse dy chooilley ghooinney ayns fenish Yee. 3Agh my ta’n sushtal ain follit, te follit vouesyn ta caillit: 4Ny-vud oc ta Jee yn seihll shoh er choyrt fo dorraghys ny smooinaghtyn ocsyn nagh vel credjal, nagh jinnagh soilshey sushtal gloyroil Chreest, ta co-chaslys Yee, soilshean hucsyn. 5Son cha nee shin hene ta shin dy phreacheil, agh Creest Yeesey yn Chiarn: as shin hene ny sharvaantyn euish er graih Yeesey. 6Son ta Jee, doardee yn soilshey dy hoilshean ass y dorraghys, er hoilshean ayns ny creeaghyn ain, dy chur soilshey jeh tushtey dy ghloyr Yee, ayns fenish Yeesey Creest. 7Agh ta’n verchys shoh ainyn ayns siyn craie, dy vod ard-ooashley yn phooar ve veih Jee, as cha nee voïnyn. 8Ta shin seaghnit er dagh cheu, agh cha vel shin ayns chennid: ta shin êginit, agh cha vel shin fo mee-hreishteil; 9Tranlaasit, agh cha nee treigit; tilgit sheese, agh cha nee er nyn stroie; 10Dy kinjagh gymmyrkey mygeayrt-y-mooin ayns y chorp, baase y Chiarn Yeesey, dy voddagh bioys Yeesey ve myrgeddin jeant cronnal ayns y chorp ainyn. 11Son ta shinyn ta bio, dy kinjagh er nyn livrey gys baase er graih Yeesey, dy voddagh bioys Yeesey ve myrgeddin jeant cronnal ayns yn eill marvaanagh ainyn. 12Myr shen eisht, ta baase gobbraghey aynin, agh bioys ayndiuish. 13Fakin dy vel ainyn yn spyrryd cheddin dy chredjue, myr te scruit, Ren mee credjal, as er-y-fa shen ren mee loayrt: ta shinyn neesht credjal, as er-y-fa shen loayrt; 14Toiggal dy jean eshyn hrog seose y Chiarn Yeesey, shinyn myrgeddin y hroggal liorish Yeesey, as shinyn y ghoaill stiagh mêriu. 15Son ta dy chooilley nhee er y ghraih euish, dy voddagh yn ghrayse feoilt, trooid toyrt-booise ymmodee, bishaghey gys gloyr Yee. 16Son yn oyr shen cha vel shin lhiggey nyn gree voïn, agh ga dy vel y dooinney ain er cheu-mooie goll naardey, foast ta’n dooinney er cheu-sthie er ny niartaghey laa lurg laa. 17Son ta’n seaghyn eddrym ain, nagh vel agh son shallid, gobbraghey nyn gour towse erskyn-earroo foddey smoo as dy bragh farraghtyn dy ghloyr; 18Choud as ta sooill ain, cha nee er ny reddyn ta ayns fakin, agh er ny reddyn nagh vel ayns fakin: son cha vel ny reddyn t’ayns fakin agh son tammylt; agh ny reddyn nagh vel ayns fakin, t’ad dy bragh farraghtyn.