CAB. VI

1Ta shinyn eisht, myr fir-choonee mârishyn, guee erriuish myrgeddin, nagh jean shiu grayse Yee y ghoaill ayns fardail: 2(Son t’eh gra, Ta mee er dty chlashtyn ayns earish ghraysoil, as ayns laa yn taualtys ta mee er choyrt couyr dhyt: cur-my-ner, nish ta’n earish ghraysoil ayn; jeeagh, nish ta’n laa dy haualtys.) 3Ny lhig dooin oyr dy scammylt y choyrt ayns nhee erbee, nagh bee cômys er ny choyrt da’n oik ain: 4Agh ayns dy chooilley nhee soilshaghey shin hene magh myr shirveishee Yee, ayns lane meenid, ayns seaghyn, ayns êgin, ayns chennid, 5Ayns buillaghyn, ayns pryssooney, ayns irree-magh nyn ’oï, ayns tooilleil, ayns watchal, ayns trostey; 6Liorish glennid-bea, liorish tushtey, liorish surranse-foddey, liorish kenjallys, liorish y Spyrryd Noo, liorish graih gyn foalsaght, 7Liorish y goo dy irrinys, liorish pooar Yee, liorish yn eïlley dy chairys er y laue yesh as y laue chiare, 8Liorish ooashley as mee-ooashley, liorish drogh ghoo as goo mie; myr molteyryn, as ny-yeih firrinagh; 9Myr sleih nagh vel enney er ny choyrt orrin, as foast ta enney vie; myr goll dy baase, as cur-my-ner ta shin bio; myr smaghtit, as gyn v’er nyn goyrt dy baase; 10Myr lane dy hrimshey, foast dy kinjagh gennal; myr boghtyn, foast jannoo ymmodee berchagh; myr nagh beagh ain nhee erbee, as foast dy chooilley nhee ain. 11O shiuish Chorinthianee, ta’n beeal ain er ny osley [ayns graih] hiuish, ta’n cree ain er ny heeyney magh erriu. 12Cha vel shiuish er nyn jionney ayninyn, agh ta shiuish chionnit ayns ny creeaghyn eu hene. 13Nish son cooilleeney ayns y red cheddin (ta mee loayrt myr rish my chloan) lhig da’n cree euish myrgeddin roshtyn orrym’s. 14Ny bee-jee dy neu-chorrym sniemmit cooidjagh marish ny mee-chredjuee: son cre’n sheshaght t’ec cairys rish mee-chairys? ny cre’n chommeeys t’ec soilshey rish dorraghys? 15As cre’n choardail t’ec Creest rish Belial? ny cre’n ayrn ta echeysyn ta credjal, marish an-chreestee? 16As cre’n chaarjys t’ec chiamble Yee rish jallooyn? son ta shiuish chiamble yn Jee bio; myr ta Jee er ghra, Neem’s baghey ayndoo, as gimmeeaght mâroo; as beem’s yn Jee ocsyn, as bee adsyn yn pobble aym’s. 17Shen-y-fa tar-jee magh veih nyn mast’ oc, as bee-jee er nyn scarrey voue, ta’n Chiarn dy ghra, as ny benn-jee rish yn red neu-ghlen; as neem’s goaill riu, 18As beem’s my Ayr diuish, as bee shiuish ny mec as ny inneenyn aym’s, ta’n Chiarn Ooilley-niartal dy ghra.