CAB. VII

1Fakin eisht dy vel ny gialdynyn shoh ain (my ghraihyn deyr) lhig dooin glenney shin hene veih dy chooilley vroïd jeh’n eill as jeh’n spyrryd, cooilleeney casherickys ayns aggle Yee. 2Gow-jee rooin: cha vel shin er n’yannoo aggair da dooinney erbee, cha vel shin er choyrt dooinney erbee er-shaghryn, cha vel shin er ghoaill vondeish er dooinney erbee. 3Cha vel mee loayrt shoh dy gheyrey shiu: son ta mee roïe er ghra, dy vel shiu ayns nyn gree, dy ve mêriu ayns baase ny bioys. 4S’mooar ta reamys my ghlare hiuish, s’mooar ta my voggyssagh jiuish: ta mee lhieent lesh gerjagh, ta mee goaill boggey erskyn towse ayns ooilley yn seaghyn ain. 5Son tra va shin er jeet gys Macedonia, cha row fea ain ’sy challin, agh va shin seaghnit er dy chooilley heu; cheu-mooie va caggey, cheu-sthie va aggle. 6Ny-yeih, Jee, ta gerjaghey adsyn ta tilgit sheese, ren gerjaghey shinyn liorish cheet Titus: 7As cha nee ynrycan liorish y cheet echeysyn, agh liorish y gherjagh hooar eh ayndiu, tra dinsh eh dooin yn yeearree jeean eu, yn dobberan eu, yn aigney graihagh eu hym’s; myr shen dy row my voggey ny smoo. 8Son ga dy dug mee trimshey erriu lesh screeuyn, cha vel arrys orrym jeh, ga dy row mee jeh aigney elley: son ta mee toiggal dy ren y screeuyn cheddin shiuish trimshagh, ga nagh row eh agh son tammylt. 9Nish ta boggey orrym, cha nee son dy row shiuish jeant trimshagh, agh dy ren shiu trimshey gys arrys: son va shiu trimshagh lurg aght crauee, nagh beagh assee eu liorinyn ayns nhee erbee. 10Son ta trimshey crauee gobbraghey arrys gys saualtys, nagh vel arrys dy v’er ny ghoaill jeh: agh ta trimshey’n theihll gobbraghey baase. 11Son cur-my-ner, yn red shoh hene, dy row shiu trimshagh lurg aght crauee, cre’n imnea ghooisht eh ayndiu, dy jarroo, cre’n seyrey j’iu hene, dy jarroo, cre’n jymmoose, dy jarroo, cre’n aggle, dy jarroo, cre’n yeearree aggindagh, dy jarroo, cre’n jeeanid, dy jarroo, cre’n kerraghey? ayns dy chooilley nhee ta shiu er phrowal shiu hene seyr ayns y chooish shoh. 12Shen-y-fa ga dy scrieu mish hiu, cha ren mee shen er y choontey echeysyn ren yn aggair, ny er y choontey echeysyn hurr yn aggair, agh dy voddagh yn imnea ainyn er nyn son euish ayns shilley Yee v’er ny hoilshaghey diu. 13Er-yn-oyr shoh va shinyn er nyn gherjaghey son y gherjagh euish: dy jarroo, as va foddey smoo dy voggey orrin er coontey Titus, er-yn-oyr dy row yn spyrryd echey er ny gherjaghey lieriu ooilley. 14Son my ren mee boggyssagh jiuish ayns nhee erbee rishyn, cha vel nearey orrym; agh myr ta shin loayrt dy chooilley nhee riu ayns firrinys, myr shen ta’n voggyssagh ain, ren mee fenish Titus, er ny gheddyn firrinagh. 15As ta graih jeean e chree hiuish foddey s’troshey, tra t’eh gimraa er y viallys eu ooilley, kys lesh aggle as craa ren shiu goaill rish. 16Ta boggey orrym eisht, dy voddym my varrant y choyrt erriu ayns dy chooilley nhee.