CAB. VIII

1Ta shin myrgeddin, vraaraghyn, soilshaghey diu grayse Yee v’er ny hirveish ayns kialteenyn Macedonia: 2Kys fo prowal gyere dy heaghyn, ren yrjid y voggey oc, as nyn moghtynid hrome, bishaghey gys berchys nyn ghiastyllys. 3Son gys rere nyn booar (ta mee gymmyrkey feanish) dy jarroo, as erskyn ny va fort oc, v’ad arryltagh jeu hene: 4Guee orrin dy jeean, dy jinnagh shin soiaghey jeh’n gioot, as goaill orrin yn currym dy rheynn eh er ny nooghyn. 5As shoh ren ad, cha nee myr va shin jerkal rish, agh hoshiaght heb ad ad-hene gys y Chiarn, as hooinyn liorish aigney Yee. 6Ayns wheesh as dy ren shin geearree er Titus, myr v’eh er n’yannoo toshiaght, dy jinnagh eh neesht goll trooid lesh y ghiastyllys cheddin ny-vud eu. 7Shen-y-fa myr ta shiu jeant magh ayns dy chooilley nhee, ayns credjue, ayns goan, as tushtey, as ayns dy chooilley chiarail, as ayns nyn ghraih er nyn son; jeeagh-jee dy jean shiu bishaghey ayns y ghrayse shoh myrgeddin. 8Cha vel mee loayrt liorish sarey, agh er coontey arryltys feallagh elley, as dy phrowal firrinys yn ghraih euish. 9Son shione diu grayse nyn Jiarn Yeesey Creest, ga dy row eh berchagh, ny-yeih er y ghraih euish ghow eh er dy ve boght, trooid y voghtynid echeysyn dy voddagh shiuish ve jeant berchagh. 10As ayns shoh ta mee coyrt my choyrle: son ta shoh son y goo mie euish, t’er n’yannoo toshiaght ro-laue, cha nee ny-lomarcan dy yannoo, agh myrgeddin dy ve arryltagh bleïn er-dy-henney. 11Nish er-y-fa shen cur-jee mullagh er yn obbyr; myr va aigney arryltagh eu, dy vod shen myrgeddin ve jeant mie ass shen ny ta fo nyn rere. 12Son my ta’n aigney hoshiaght arryltagh, ta soiagh jeant jeh cordail rish fort y dooinney, as cha nee cordail rish shen nagh vel echey. 13Son cha vel mee cheet er liorish shoh dy lhiggey lesh feallagh elley, as shiuish ve laadit: 14Agh liorish corrymid, ec y traa t’ayn nish dy vod yn phalchey euish jannoo feaysley er y feme ocsyn, as dy vod yn phalchey ocsyn myrgeddin jannoo feaysley er y feme euish, dy vod yn errey ve co-trome, 15Myr te scruit, Eshyn ren chaglym mooarane, cha row veg smoo echey; as eshyn ren chaglym kuse fardalagh, cha row laccal er. 16Agh booise dy row gys Jee, hug yn chiarail jeean cheddin ayns cree Titus er nyn son. 17Son dy jarroo ghow eh yn choyrle, agh myr v’eh hene ny s’arryltee, hie eh hiu jeh ’aigney hene. 18As ta shin er choyrt mârish yn braar, ta’n moylley echey ayns y sushtal, mastey ooilley ny kialteenyn: 19(As cha nee ynrycan shen, agh v’eh myrgeddin er ny reih liorish ny kialteenyn, dy hroailt mârin lesh y ghiastyllys shoh, t’er ny hirveish liorinyn gys gloyr y Chiarn cheddin, as gys prowal jeh’n aigney arryltagh euish.) 20Shaghney shoh, nagh der dooinney erbee cômys hooin ayns y phalchey shoh t’er ny hirveish liorin: 21Kiarail ro-laue reddyn onneragh, cha nee ny-lomarcan ayns shilley’n Chiarn, agh myrgeddin ayns shilley gheiney. 22As ta shin er choyrt mâroosyn nyn mraar, eh ta shin dy mennick er gheddyn kiaralagh ayns ymmodee reddyn, agh nish foddey s’kiaralee, liorish yn treishteil shickyr t’aym’s ayndiuish. 23My ta veg eu briaght lurg Titus, t’eh my heshey, as my cho-obbree er y lieh euish: ny my ta briaght jeant lurg nyn mraaraghyn, t’adsyn chaghteryn ny kialteenyn, as gloyr Chreest. 24Shen-y-fa jeeagh-jee dauesyn, as fenish ny kialteenyn prowal jeh’n ghraih eu, as jeh’n voggyssagh ain er y lieh euish.