CAB. IX

1Nish mychione shirveish er ny nooghyn, cha lhiass dou scrieu hiu. 2Son ta fys aym er arryltys nyn aigney, jeh shen ta mee boggyssagh roosyn ta jeh Macedonia, dy row Achaia aarloo bleïn er-dy-henney; as ta’n ghraih jeean euish er ghreinnaghey ymmodee. 3Ny-yeih hug mee ny braaraghyn hiu, er-aggle dy beagh yn voggyssagh ain jiuish ayns fardail ayns y chooish shoh; dy voddagh shiu, myr dooyrt mee, ve aarloo: 4Er-aggle my hig adsyn jeh Macedonia mârym, as shiuish y gheddyn ergooyl, dy beagh shinyn (cha nee dy ghra shiuish) naarit son y voggyssagh daaney shoh. 5Er shoh yeeagh mee er dy ve ymmyrchagh dy choyrlaghey ny braaraghyn, dy gholl hiu ro-laue, as ny toyrtyssyn eu y chur cooidjagh, jeh shoh va raaue eu roïe, dy voddagh yn chooid cheddin ve aarloo, myr toyrtys aggindagh, as cha nee myr êginit. 6As shoh ta mee dy ghra, Eshyn ta cuirr thanney, nee myrgeddin buinn thanney: as eshyn ta cuirr dy palchey, nee myrgeddin buinn dy palchey. 7Lhig da dy chooilley ghooinney coyrt da’n voght, myr ta e chree coyrt roish; cha nee mooaraghey, ny myr dy beagh eh êginit huggey: son shynney lesh Jee eshyn ta coyrt dy aggindagh. 8As ta Jee abyl dy chur er dy chooilley ghrayse bishaghey diu; ayns slane sonnys eu jeh dy chooilley nhee, dy vod shiu bishaghey ayns dy chooilley obbyr vie: 9(Myr te scruit, T’eh er skeayley dy lhean; t’eh er choyrt da ny boghtyn: ta e chairys farraghtyn son dy bragh. 10Nish dy jean eshyn ta shirveish rass er y chorreyder, chammah shirveish arran son nyn meaghey, as bishaghey nyn arroo-correy, as cur er-ash mess yn feoiltys eu.) 11Dy palchey er nyn yannoo magh ayns dy chooilley nhee gys dy chooilley feoiltys, ta coyrt oyr booise gys Jee er y choontey ainyn. 12Son cha vel shirveish y ghiastyllys shoh ny-lomarcan jannoo feaysley er ymmyrch ny nooghyn, agh te coyrt er y hoshiaght myrgeddin mooarane booise gys Jee; 13Tra liorish cowrey’n ghiastyllys shoh t’ad gloyraghey Jee son y viallys foshlit euish gys sushtal Chreest, as son y toyrtys feoilt eu daue hene, as da dy chooilley ghooinney. 14As liorish ny padjeryn ocsyn er nyn son, myr t’ad goaill foddeeaght ny lurg eu er coontey ard ghrayse Yee ayndiu, 15Booise dy row gys Jee son e ghioot erskyn insh.