1Yn ostyl shinney gys y lady ooasle, as e cloan, shynney lhiam ayns yn irriney; as cha nee mish my-lomarcan, agh myrgeddin adsyn ooilley ta toiggal oc jeh’n irriney; 2Er graih yn irriney ta baghey aynin, as vees mârin son dy bragh: 3Grayse dy row mêriu, myghin, as shee veih Jee yn Ayr, as veih’n Chiarn Yeesey Creest, Mac yn Ayr, ayns ynrickys as graih. 4S’mooar va my voggey, dy dooar mee [paart] jeh dty chloan, gimmeeaght ’syn irriney, myr ta shin er gheddyn sarey veih’n Ayr. 5As nish ta mee guee ort, lady, cha nee myr dy beign scrieu hood anney noa, agh shen ny v’ain veih’n toshiaght, dy der mayd graih yn derrey yeh da’n jeh elley. 6As shoh’n ghraih, dy jean mayd gimmeeaght cordail rish e annaghyn. Shoh’n anney, myr ta shiu er chlashtyn veih’n toshiaght, dy lhisagh shiu gimmeeaght ayn. 7Son ta ymmodee molteyryn er n’gholl magh fud y theihll, nagh vel goaill-rish dy vel Yeesey Creest er jeet ayns yn eill. Shoh eh ta ny volteyr, as yn an-chreestee. 8Jeeagh-jee diu hene nagh gaill mayd ny reddyn shen ta shin er chosney, agh dy vow mayd slane leagh. 9Quoi-erbee ta treigeil, as nagh vel tannaghtyn ayns ynsagh Chreest, cha vel Jee echey: eshyn ta tannaghtyn ayns ynsagh Chreest, t’echey chammah yn Ayr as y Mac. 10My hig fer erbee hiu, as nagh vel cur lesh mârish yn ynsagh shoh, ny cur-jee room thie da, chamoo bannee-jee da. 11Son eshyn ta goltaghey da, t’eh paarteeas mârish ayns e ghrogh-yannoo. 12Myr va ymmodee reddyn aym dy scrieu hiu, cha jinnin ad lesh paper as ink; agh ta mee treishteil dy heet hiu, as dy loayrt riu eddin ry eddin, dy vod y boggey ain ve jeant magh. 13Ta cloan dty huyr reiht cur bea as slaynt hood. Amen.