CAB. XI

1As tra honnick Athaliah, moir Ahaziah, dy row e mac er ny choyrt gy-baase, hrog ee urree, as stroie ee ooilley’n sluight reeoil. 2As ghow Jehosheba, inneen ree Joram, shuyr Ahaziah, Joash mac Ahaziah, as gheid ee eh veih mastey mec y ree v’er ny choyrt gy-baase; as dollee ad eh as e voandyr ayns shamyr veih Athaliah, myr shen nagh row eh er ny stroie. 3As v’eh mâree follit ayns thie’n Chiarn son shey bleeaney. As ren Athaliah reill harrish y cheer.

4As ayns y chiaghtoo vleïn, hug Jehoiada fys er ny fir-reill harrish keeadyn, marish ny captanyn as y gard, as hug eh lesh ad huggey gys thie’n Chiarn, as ren eh conaant roo, as ad y loo ayns thie’n Chiarn, as yeeagh eh daue mac y ree. 5As hug eh currym orroo, gra, Shoh myr nee shiu jannoo; Bee’n trass ayrn j’iu ta goll stiagh dy hirveish er y doonaght son gard da thie’n ree; 6As bee trass ayrn j’iu ec giat Sur; as trass ayrn ec y yiat cooyl y ghard: myr shen nee shiuish freayll arrey er y thie, nagh brish fer erbee stiagh erriu. 7As nee daa heshaght jiuish ooilley, ta goll magh er y doonaght, eer nee adsyn freayll arrey er thie’n Chiarn mygeayrt y ree. 8As nee shiu cruinnaghey mygeayrt y ree, dagh dooinney lesh e ghreinyn-caggee ayns e laue: as dy chooilley ghooinney ta cheet cheu-sthie jeh ny rankyn, cur-jee eh gy-baase: as bee-jee shiuish mysh y ree myr t’eh goll magh, as myr t’eh cheet stiagh. 9As ren ny captanyn-keead cordail rish dy chooilley nhee myr va Jehoiada yn saggyrt er harey: as ghow ad dagh dooinney e gheiney va dy heet stiagh er y doonaght, mâroosyn va dy gholl magh er y doonaght, as haink ad gys Jehoiada yn saggyrt. 10As hug y saggyrt da ny captanyn-keead shleiyghyn as scapeyn ree Ghavid, v’ayns chiamble y Chiarn. 11As hass y gard dy chooilley ghooinney mygeayrt y ree, lesh e wappin ayns e laue, veih corneil twoaie y chiamble gys corneil jiass y chiamble, kiart rish yn altar as y chiamble. 12As hug eh lesh magh mac y ree, as hug eh yn crown er, as livrey eh da lioar y leigh: as ren ad eh ny ree, as dooilee ad eh; as woaill ad nyn massyn cooidjagh, as dooyrt ad, Dy voddey beayn y ree.

13As tra cheayll Athaliah feiyr y ghard, as y pobble, haink ee gys y pobble, gys chiamble y Chiarn. 14As tra yeeagh ee, cur-my-ner, hass y ree liorish pillar, myr va’n cliaghtey, as ny princeyn as ny trumpeteryn liorish y ree; as ghow ooilley pobble ny cheerey boggey, sheidey lesh trumpetyn: as ren Athaliah raipey e coamrey, as deïe ee magh, Traitoorys, traitoorys! 15Agh hug Jehoiada yn saggyrt sarey da ny captanyn-keead, as leeideilee’n cheshaght-chaggee, as dooyrt eh roo, Magh lh’ee cheu-mooie jeh ny rankyn; as eshyn eiyrys urree, marr-jee lesh y chliwe. Son va’n saggyrt er ghra, Ny lhig j’ee v’er ny varroo ayns thie’n Chiarn. 16As ghreim ad ee, as hug ad lhieu ee er raad ny gabbyl gys thie’n ree; as ayns shen varr ad ee.

17As ren Jehoiada conaant eddyr y Chiarn, as y ree, as y pobble, dy beagh ad pobble y Chiarn; eddyr y ree myrgeddin as y pobble. 18As hie ooilley pobble ny cheerey stiagh ayns thie Vaal, as vrish ad eh sheese, e altaryn as e yallooyn vrish ad ayns peeshyn, as varr ad Mattan saggyrt Vaal ec ny altaryn. As doardee’n saggyrt shirveishee harrish thie’n Chiarn. 19As ghow eh ny fir-reill harrish keeadyn, as ny captanyn, as y gard, as ooilley pobble ny cheerey; as hug ad lhieu sheese y ree veih thie’n Chiarn, as haink ad rish raad giat y ghard gys thie’n ree. As hoie eh er stoyl-reeoil y ree. 20As ghow ooilley pobble ny cheerey boggey, as va’n ard-valley ayns shee: as va Athaliah er ny varroo lesh y chliwe liorish thie’n ree. 21Va Jehoash shiaght bleeaney dy eash tra ghow eh toshiaght dy reill.